Ջոն Դյուի՝ նախագծային մեթոդի հիմնադիր

[LZH]

<<Կրթությունը պատմելը և պատմություններ լսելը չէ․ այն ակտիվ և կառուցողական գործընթաց է>> Ջոն Դյուի

Նախագծերի մեթոդը (Project methods) ուսուցման համակարգ է, որի ընթացքում սովորողները գիտելիքներ, կարողություններ, հմտություններ են ձեռք բերում աստիճանաբար բարդացող գործնական նախագծերի պլանավորման և իրագործման ընթացքում: Համաշխարհային մանկավարժության մեջ այս մեթոդը նոր երևույթ չէ. Այն առաջին անգամ նկարագրվել է 20-րդ դարի 20-ական թվականներին ԱՄՆ-ում կրթական բարեփոխումների շրջանում, ինչի արդյունքում կրթությունը դարձավ աշակերտակենտրոն: Հետագայում այն լայն տարածում ստացավ եվրոպական երկրներում: Մեթոդի ի հայտ գալը կապվում է Ջոն Դյուիի անվան հետ, երբեմն անվանում են նաև հիմնախնդիրների մեթոդ:

[LZH]

Հարգելի գործընկերներ, եկեք առաջարկենք նոր և հետաքրքիր ուսումնական նախագծերի թեմաներ տարբեր առարկաներից։ Նաև նշենք հիմնախնդիրները, որոնք կարելի է վեր հանել և պրոդուկտները, որ կարելի է ստանալ նախագիծն իրականացնելու արդյունքում։

[arpi.kirishyan]

Նախագծային ուսուցումը արդյունավետ մեթոդ է, քանի որ այն միախառնում է բովանդակության յուրացումը, բովանդակալից աշխատանքը և անձնական կապը ուսումնառության արդյունավետ փորձառություններ ստեղծելու համար: Բազում հետազոտություններ վկայում են, որ նախագծային ուսուցումը կարող է շրջադարձային լինել սովորողների համար:
Ուսումնական նախագծերը ենթադրում են բազմաբնույթ աշխատանքներ, ընդ որում հետաքրքիր, գրավիչ, ինչն էլ առավել լայն հնարավորություններ է ընձեռում բոլոր սովորողների՝ այդ աշխատանքներին ակտիվ մասնակցությանն ու ներգրավմանը, ինչպես նաև նրանց համար հավասար պայմանների ապահովմանը։ Վերջինս ենթադրում է բոլոր սովորողների անհատական առանձնահատկությունների, նրանց ուժեղ կողմերի ու հնարավորությունների իմացում և խրախուսում՝ սովորողներին՝ նախագծային աշխատանքներին մասնակից դարձնելու և որոշակի խնդիրներ լուծելու, կոնկրետ աշխատանքներ կատարելու առումով:

[arpi.kirishyan]

Բոլոր նախագծային ուսուցման պրոեկտները պետք է հիմնականում լուծեն բարդ, մինչև այս չլուծված կամ նման ձևով չլուծված խնդիրներ, որոնք պետք է կապված լինեն իրական կյանքի հետ։

[Մարիետա]

Ուսումնական նախագծերի իրականացումն սովորողներին տալիս է այնպիսի գիտելիքի և փորձի ձեռքբերում, որը կիրառելի է նաև հետագա կյանքի ընթացքում և չի սահմանափակվում դասագրքից սովորելու պարզունակ ճանապարհով։ Մասնավորապես համացանցում տեղեկատվության որոնումը, ինչպես նաև այդ տեղեկատվության ստուգումը և հետագա օգտագործումը հմտություններ են, որոնք մարդիկ օգտագործում են ողջ կյանքի ընթացքում, այդ թվում նաև աշխատավայրում։

[Մարիետա]

Մենք բոլորս, ինչպես և սովորողները, լավագույնս սովորում ենք «անելով»։ Լավ մշակված ուսումնական նախագծում սովորողներն աշխատում են պրակտիկ․ նրանք տեղեկատվություն են հավաքում, հետազոտում են, ստեղծում են, փորձարկում են։ Սովորողները առաջ են քաշում իրենց մտքերը և լուծման իրենց պատկերացումները, ինչպես նաև սովորում են հիմնավորել և պաշտպանել իրենց տեսակետը քննարկումների ժամանակ։ Իրական մարդկանց, խնդիրների և մարտահրավերների հետ աշխատանքը սովորողների մոտ ստեղծում է արդիականության զգացում և հստակ ավելացնում է նրանց մոտիվացիան էլ ավելի լայն ներգրավվածություն ունենալ նախագծի աշխատանքներին։

[Մարիետա]

Խրախուսում է սովորողների ակտիվ ներգրավվածությունն ու մասնակցությունը ուսումնական գործընթացում, ինչպես նաև սովորողների մոտ ձևավորվում է թիմային աշխատանքի, ինչպես նաև ընդհանուր պատասխանատվության զգացում։

Համացանցի առկայությունը սովորողներին հնարավորություն է տալիս նաև ակտիվորեն շփվել (նաև այլ երկրներում ապրող) իրենց հասակակիցների հետ անկախ հեռավորությունից, ինչպես նաև՝ դասավանդողների և փորձագետների հետ, յուրացնել արտասահմանյան երկրների կրթական և մշակութային նվաճումները։

[arpi.kirishyan]

Նախագծային ուսուցումը կարող է անդրադառնալ տարբեր ոլորտների՝ գիտական, արվեստի, մշակույթի, ծրագրավորման, էլոլոգիական կամ բնապահպանական, ինժեներական և այլն։

[Մարի Գասպարյան]

Նախագծային ուսուցումը հանդիսանում է կառուցողական մանկավարժության ժամանակակից ուղղություններից մեկը։ Նախագծային աշխատանքներում սովորողը պասիվ կրավորական դերից ստանձնում է ակտիվ մասնակցի դերը։ Սովորողը տևական ժամանակ աշխատելով կոնկրետ խնդրի կամ հիմնախնդրի վրա, դառնում է իր գիտելիքի կերտողն ու կառոցողը։ Ձեռք է բերում հիմնարար մնայուն գիտելիքներ՝ ամբողջ կյանքի համար։

[Մարի Գասպարյան]

Նախագծային ուսուցումը սովորողակենտրոն ուսուցման մեթոդ է։ Ուսուցիչը, այս պարագայում, ստանձնում ուղղորդողի դեր։

[arpi.kirishyan]

Ուսումնական նախագծի վերջնարդյունքի տեսակներ են՝

• պաստառ
• գիրք(էլեկտրոնային գիրք)/գրքույկ
• նկար
• տեսահոլովակ
• թռուցիկ
• բաղադրատոմսերի հավաքածու
• շինության մոդել/մակետ
• բիզնես պլան
• բանավեճ և այլն։

[arpi.kirishyan]

Օրինակ, եթե թեման վերաբերում է գյուղատնտեսությանը, վերջնարդյունքի օրինակ կարող է լինել բիզնես պլանը, գրքույկը, տեսանյութը, պաստառը։

Ճարտարապետական թեմայով նախագծում վերջնարդյունքում կարելի է ստանալ շինության մոդել/մակետ, ինտերիերի ձևավորում, բանավեճ՝ Պահպանե՞լ, թե՞ ստեղծել նորը։

Աշխարհի խոհանոցներ թեմայի շրջանակներում վերջնարդյունքում կարելի է ստեղծել բաղադրատոմսերի հավաքածու, ուտեստի պատրաստման վերաբերյալ տեսանյութ, ինչպես նաև կազմակերպել թեմատիկ ճաշկերույթ։

Առողջ ապրելակերպ թեմայով վերջնարդյունքի օրինակ է առողջ սնունդի վերաբերյալ պաստառը,ինչպես նաև տեսանյութը, որտեղ ներկայացված են վարժանքներ, թռուցիկը՝ ինչպես պահպանել առողջությունը և այլն։