PDA

Դիտել ողջ տարբերակը : Երրորդ առցանց խորհրդաժողովի կազմակերպական հարցերի քննարկում



manush
06.06.2011, 16:12
Հարգելի գործընկերներ,

Կրթական տեխնոլոգիաների ազգային կենտրոնը (ԿՏԱԿ) «Հայկական կրթական միջավայր» ֆորումում հունիսի 25-30 կազմակերպում է առցանց խորհրդաժողով՝

«Դպրոցական կայքերի ստեղծման և զարգացման հիմնախնդիրները»։

Թեման բացել ենք առցանց խորհրդաժողովի նախապատրաստման, կազմակերպման աշխատանքները քննարկելու նպատակով։

Ակնկալում ենք դպրոցների ղեկավարների, ինֆորմատիկայի ուսուցիչների, համակարգչային ուսումնական կենտրոնները սպասարկող մասնագետների, աշակերտների, մի խոսքով՝ դպրոցական կայքերի առկայությունը կարևորող և շահագրգիռ մարդկանց ակտիվ մասնակցությունը։

manush
06.06.2011, 16:21
«Դպրոցական կայքերի ստեղծման և զարգացման հիմնախնդիրները»
առցանց խորհրդաժողովի հայտարարություն


Ժամանակակից տեղեկատվական տեխնոլոգիաները հրաշալի գործիք են ուսումնական գործընթացը կազմակերպելու, դրա արդյունավետությունն ու որակը բարձրացնելու համար: Այստեղ առանձնահատուկ դեր ունի ճիշտ կազմակերպված, անընդհատ թարմացվող դպրոցական կայքը, որի օգնությամբ կարելի է լուծել փոխհամագործակցության, տեղեկատվության, փորձի փոխանակման և այլ արդիական խնդիրները, այն դարձնել ընդգրկուն ու հարուստ ուսումնակրթական միջավայր։ Դրա վկայությունն է այն հանգամանքը, որ կան երկրներ, որտեղ օրենքով պահանջվում է համացանցում ստեղծել, վարել և պարբերաբար թարմացնել կրթական հաստատության պաշտոնական կայքը։

Ներկայումս Հայաստանի դպրոցների մեծ մասը չունի կայք, գործող կայքերն (1) էլ, բացառությամբ մի քանիսի, չեն լուծում վերը շարադրված խնդիրները, չեն պարունակում տեխնիկական ու բովանդակային անհրաժեշտ լուծումներ:

Դպրոցական արդիական կայքերի ստեղծման և զարգացման նպատակով Կրթական տեխնոլոգիաների ազգային կենտրոնը (ԿՏԱԿ) հայտարարում է առցանց խորհրդաժողով:
Խորհրդաժողովը կանցկացվի հունիսի 25-ից 30-ը՝ «Հայկական կրթական միջավայր» ֆորումում (http://forum.armedu.am/forum.php):

Առաջարկում ենք խորհրդաժողովի նյութերում ներկայացնել դպրոցական կայքի վերաբերյալ Ձեր տեսակետներն ու հիմնավորումները, ինչպես նաև հնարավորինս անդրադառնալ հետևյալ խնդիրներին.
- կայքի կառուցվածքի նկարագրությունը (անհրաժեշտ բաժինների ցանկ, լրացուցիչ բաժինների ցանկ),
- կայքի տեխնիկական հնարավորությունները (օգտագործվող պլատֆորմի ընտրություն, այլ գործիքներ),
- կայքի հիմնական գործառույթները,
- մեդիայի այլ միջոցների, կրթական և դպրոցական այլ կայքերի հետ համագործակցության հնարավոր ձևերը,
- ձևավորման առանձնահատկությունները (նկարների ֆորմատներ, ընդունելի գույներ, տառատեսակներ, տառաչափեր և այլն),
- կայքը շահագործող խմբի նկարագիրը և խմբի աշխատակարգը (աշակերտների և ուսուցիչների ներգրավումը ինչպես կայքի ստեղծման, այնպես էլ հետագա սպասարկման գործում),
- հետադարձ կապը,
- շահառուներին (օգտագործողներին) ներգրավման մեթոդները,
- այլ խնդիրներ:

Ակնկալում ենք դպրոցների ղեկավարների և ոլորտի մասնագետների շահագրգիռ ու ակտիվ մասնակցությունը, ինչն էապես կնպաստի ԿՏԱԿ-ի՝ դպրոցական կայքերի ստեղծման ու զարգացման ուղղությամբ իրականացվող աշխատանքներին։

Կրթական տեխնոլոգիաների ազգային կենտրոն
հեռախոսահամարներ՝ (010) 57 84 53, (010) 57 84 55,
էլեկտրոնային փոստի հասցեներ՝ ktak@arminco.com, artak@ktak.am



--------------------------------------

1. (դպրոցական կայքերի հղումների ցանկն ըստ մարզերի կարելի է գտնել «Հայկական կրթական միջավայր» պորտալում (http://www.armedu.am/arm/materials.php?sec=library&cat_id=324):

Mary
06.06.2011, 19:46
Կոտայքի մարզի դպրոցների կայքերը ծայրահեղ վիճակում են: Չգտա գոնե մեկ դպրոցի կայք,որ նորմալ լինի:
Կայք չկա , որ խնդիրներին անդրադառնանք:

Chuk
07.06.2011, 15:15
Հարգելի բարեկամներ,
իմ դիտարկումները ցույց են տալիս, որ այսօր շատերը, այդ թվում դպրոցների տնօրենները չեն պատկերացնում դպրոցական կայքի իմաստը, նշանակությունը: Շատերը սրան վերաբերվում են որպես «պարտականության», մտածելով, որ «դե լավ, որ պահանջում են, մի բան արագ սարքենք, դնենք, էնքան որ ունենանք»: Մինչդեռ ինտերնետն այսօր դարձել է մեր կյանքի անքակտելի մասնիկը ու շարունակում է ավելի ու ավելի տարածել իր ազդեցության ոլորտը: Դպրոցական կայքերը այսօր կարող են դառնալ դպրոցի դեմքը, որը ոչ միայն կնպաստի ուսումնական գործընթացի կազմակերպմանը, այլև հնարավորություն կտա այն գովազդել, հանրությանը ծանոթացնել վերջինիս գործունեությանը, ներգրավվել նոր աշակերտների, գտնել խնդիրների նոր լուծումներ:

Ես առաջարկում եմ այս խորհրդաժողովի ընթացքում առանձնահատուկ ուշադրություն դարձնել դպրոցական կայքի բովանդակային կողմին, այլ ոչ թե միայն տեխնիկականին: Ու այստեղ կարելի է ակնկալել ոչ միայն համակարգչային մասնագետների, այլև դպրոցի այլ ներկայացուցիչների, այդ թվում ուսուցիչների, ուսմասվարների, անգամ տնօրենների մասնակցությունը:

Դիտարկենք մի պարզ օրինակ նայենք. այժմ դպրոցներում ֆինանսավորումն աշակերտների քանակով է: Դա նշանակում է, որ դպրոցը ու մասնավորապես ուսուցչական կազմը՝ տնօրենի գլխավորությամբ, շահագրգռված են հնարավորինս շատ աշակերտ բերել դպրոց: Իսկ այսօր դպրոցը գովազդելու հրաշալի գործիք կարող է լինել հենց դպրոցի վեբ կայքը, որն այցեքարտ է, որը դպրոցի դեմքը կարող է դառնալ, որը կարող է ծնողին համոզել, որ հենց հատկապես այդ դպրոցն է նախատեսված իր զավակի համար: Իսկ սա նշանակում ա, որ շահագրգռվողները շատերը պետք է լինեն՝ ընդհուպ մինչև դպրոցի տնօրեն, ում համար կարևորագույն խնդիրներից է իր դպրոցը ցուցադրելը, այնտեղի ուսման մեթոդներին, ուսուցչական կազմին, ունեցած արդյունքներին և այլնին հասարակությանը ծանոթացնելը, դպրոցի գովազդ անելը, այլ կերպ ասած դպրոցի դեմք ստեղծելը՝ ի դեմս վեբ կայքի:

Ավելին: Ես մտածում եմ, որ հարցը կարող է հետաքրքրել նաև աշակերտներին, նրանց, ովքեր հետաքրքրվում են վեբ տեխնոլոգիաներով, կայքերով, ովքեր ուզում են իրենց ուժերը փորձեն, ովքեր գիտեն, թե իրենց ինչը կարող է հետաքրքրել կայքում (չէ՞ որ այսօր դպրոցական կայքերը ոչ միայն մեծահասակների, այլև հենց իրենց՝ աշակերտների համար են):

Ես առաջարկում եմ փորձել այս խորհրդաժողովի մասին տեղեկատվությունը փորձել հնարավորինս լայնորեն տարածել ու շատերին շահագրգռել մասնակցել քննարկումներին: Շատ հնարավոր է, որ բազմազան մասնակցությունը բոլորիս կօգնի հրաշալի լուծումներ գտնել դպրոցական կայքերի նախագծման, պատրաստման համար:

Mkhitaryan
08.06.2011, 12:49
Բարի օր բոլորին:
Համամիտ եմ Ձեր գրածի,մտքի հետ, ես հենց այսօր կփակցնեմ հայտարարությունը, բայց չե?ք կարծում որ մի քիչ ուշ է, քանի որ դպրոց հիմա գալիս են միայն քննության համար և աշակերտների մեծ մասը տեղյակ չի լինի, իսկ ուսուցիչները զբաղված են նույնպես քննություններվ և այլ հարցերով:
Ես կարծում եմ հիմա լավ կլիներ այդ գործը կատարողների համար նախապատրաստական դասընթացներ/ թեկուզ հեռավար/անցկացվեին, որ սեպտեմբերին թարմ ու գեղեցիկ տեսքով եկած երեխաներից և ուսուցիչներից ավելի լավ տեղեկություններ հավաքեն:

manush
08.06.2011, 15:18
Բարի օր բոլորին:
Համամիտ եմ Ձեր գրածի,մտքի հետ, ես հենց այսօր կփակցնեմ հայտարարությունը, բայց չե?ք կարծում որ մի քիչ ուշ է, քանի որ դպրոց հիմա գալիս են միայն քննության համար և աշակերտների մեծ մասը տեղյակ չի լինի, իսկ ուսուցիչները զբաղված են նույնպես քննություններվ և այլ հարցերով:

Բարև Ձեզ, շնորհակալություն գրառման համար։

Հարգելի Mkhitaryan, ես այն կարծիքին եմ, որ հիմա դեռ ուշ չէ, քանի որ ուսուցիչները աշխատանքի մեջ են և դեռ արձակուրդները չեն սկսվել։ Ինչ վերաբերվում է աշակերտներին, ապա նրանց կարող են տեղեկացնել ուսուցիչները։ Դպրոցական կայքերի ստեղծման խնդիրը շատերին է անհանգստացնում, կայքերի աշխատանքի բարելավման, զարգացման վերաբերյալ շատ հարցեր ենք ստացել ու կարծում եմ, որ շահագրգիռ մասնագետների համար հիմա հարմար ժամանակ է։


Ես կարծում եմ հիմա լավ կլիներ այդ գործը կատարողների համար նախապատրաստական դասընթացներ/ թեկուզ հեռավար/անցկացվեին, որ սեպտեմբերին թարմ ու գեղեցիկ տեսքով եկած երեխաներից և ուսուցիչներից ավելի լավ տեղեկություններ հավաքեն:

Ինչ վերաբերվում է դասընթացին, ապա խորհրդաժողովին մասնակցելու համար հատուկ նախապատարաստական աշխատանքի կարիք չկա, այն կազմակերպում ենք դպրոցների ղեկավարների, համապատասխան մասնագետների, ուսուցիչների ու աշակերտների տեսակետներին, առաջարկներին ու լուծումներ ծանոթանալու, դրանք վերլուծելու նպատակով։ Կայքեր ստեղծելու նպատակով վերապատրաստման դասընթացներ կազմակերպելու մասին մտածում ենք ու նախապատրաստվում։

Որքանով, որ տեղյակ եմ, սեպտեմբերին դպրոցներն ավելի զբաղված ու ծանրաբեռնված են լինելու։

Կրկին շնորհակալություն եմ հայտնում արծարծած հարցերի համար։

Լյուբա
08.06.2011, 15:46
Ես համամիտ եմ և ողջունում եմ այս թեմայի շուրջ կազմակերպված խորհրդաժողովը , ասեմ ավելին շատ կուզենայի հենց տնօրեններին ներգրավել այս համաժողովի մասնակցությանը: Փորձում եմ ընդլայնել դաշտը քանզի այս թեման շատ կարևոր եմ համարում : Ես ինքս մասնակցել եմ երկու անգամ <Web design> դասընդացներին, և գտնում եմ , որ պետք է յուրաքանչյուր դպրոցի աշխատակից լինի տեղեկացված , դպրոցը ունենա կայք և աշխատակիցը կարողանա այն պարերաբար թարմացնել: Լավ կլիներ , որ ավելի շուտ կազմակերպվեր այս թեմայով համաժողով , որպեսզի տնօրեն-ուսուցիչ-աշակերտ օղակը համատեղ մասնակցություն ունենար:
Հաջողություն եմ մաղթում խորհրդաժողովի մասնակիցներին:

Mary
08.06.2011, 16:22
Լավ կլինի եթե կայքի ստեղծմանը մասնակցեն նաև աշակերտները: Որպեսզի դպրոցները շահագրգռվեն ,կարելի է նաև մրցույթ հայտարարել:

Mary
08.06.2011, 16:24
Երևանի դպրոցներից հետևել եմ վարժարանների կայքերին: Ամենահաջողը Քվանտ վարժարանի կայքն է: Ֆիզմաթ դպրոցի կայքի թերությունն այն է, որ կայքը շատ ուշ-ուշ է թարմացվում:

Գագիկ
08.06.2011, 16:36
Ասելիքս ուզում եմ սկսել նախորդ գրառումներից արված մեջբերումներով:

Այստեղ առանձնահատուկ դեր ունի ճիշտ կազմակերպված, անընդհատ թարմացվող դպրոցական կայքը, որի օգնությամբ կարելի է լուծել փոխհամագործակցության, տեղեկատվության, փորձի փոխանակման և այլ արդիական խնդիրները, այն դարձնել ընդգրկուն ու հարուստ ուսումնակրթական միջավայր: (Մանուշ)

…այսօր շատերը, այդ թվում դպրոցների տնօրենները չեն պատկերացնում դպրոցական կայքի իմաստը, նշանակությունը: (Արտակ)

Կարծում եմ, դպրոցական կայքից “ընդգրկուն ու հարուստ ուսումնակրթական միջավայր լինելու” սպասելիքը իրական չէ, դա խիստ չափազանցեցված է: Նման մակարդակի կարող են հասնել հատ ու կենտ կայքեր` որպես բացառություն, այսինքն դա չի կարող լինել օրինաչափություն, պատճատների մասին կխոսեմ ավելի ուշ:

Ինչ վերաբերվում է երկրորդ մեջբերմանը, ապա կարծում եմ, որ ավելի բարձր ղեկավարությունը նույնպես հստակ չի պատկերացնում դպրոցական կայքի իմասը, կառուցվածքը, էությունն ու նշանակությունը:
Հակառակ դեպքում կմշակեին համապատասխան հայեցակագ, կկազմեին համապատասխան հանձնարարական, կտրամադրեին համապատասխան միջոցներ ու հնարավորություններ և հարցը լուծված կարելի էր համարել: Դրանից հետո կարելի էր քննարկել դրանց բարելավման, առկա խնդիրների և այլ հարցեր: Ներկա պայմաններում քննարկել դրանց բարելավման և զարգացման հարցը անիմաստ է, քանի որ չեղած բանի բարելավման և զարգացման հարց չի կարող լինել: Կասեք կան, ձևականորեն` այո, կան (բացառությունները չհաշված, որոնք մատների վրա կարելի է հաշվել):

Հստակեցնեմ երկու բան.
1) ես դեմ չեմ այս թեմային ու քննարկումներին, այլ հակառակը` կողմ եմ դրանց,
2) կարծում եմ, որ ոչ ոք հստակ չգիտի դպրոցական կայքի իմասը, էությունն ու նշանակությունը, հստակ չի պատկերացնում դրա հիմնական ֆունկցիաները, առավել ևս, որ դրանք բոլոր դպրոցների համար նույնը չեն կարող լինել:

Թեման բացվելուց հետո ահագին մտածել եմ այս հարցի մասին, գրառումս էլ հա խմբագրել եմ, նաև ասեմ, որ դպրոցական կայքերից մի 20-30 հատ նայել եմ վաղուց, հատկապես ոչ երևանյան դպրոցներինը, հիմնականում դժգույն, խղճուկ կայքեր են:

Այս “կարճ” նախաբանից հետո, ներկայացնեմ իմ պատկերացումները ավելի կոնկրետ հարցերի մասին, հիշեցնելով, որ ես նույնպես հստակ չգիտեմ դպրոցական կայքի իմասը, էությունն ու նշանակությունը, հստակ չեմ պատկերացնում դրա հիմնական ֆունկցիաները:

1. Բոլո՞ր դպրոցները պետք է կայք ունենան:
2. Ի՞նչ միջոցների ու հնարավորությունների հաշվին են ստեղծվելու և շահագործվելու այդ կայքերը:
3. Միջին պոտենցիալ ունեցող դպրոցի կայքը ի՞նչ կառուցվածք կարող է ունենալ և ի՞նչ ինֆորմացիա կարող է տրամադրել:

Այս հարցերին անդրադառնալուց առաջ ուզում եմ նշել, որ իմ կարծիքով, դպրոցական կայքը առաջին հերթին պետք է նախատեսված լինի այդ դպրոցի աշակերտների, ուսուցիչների, ծնողների և դպրոցի ղեկավարության համար, այսինքն նրանց պետք է ծառայի որոշ հարցեր լուծելու համար: Դպրոցական կայքի ձևավորման, նյութերով հարստացման աշխատանքներին պիտի մասնակցեն և ուսուցիչները, և աշակերտները:

Հիմա վերևի հարցերի մասին:

1. Պատկերացնենք գյուղական մեր փոքր դպրոցներն ու պատկերացնենք թե գյուղացիներից քանիսն համակարգիչ ու ինտերնետ ունի: Ինձ թվում է, նման դպրոցներին կայք եթե պետք էլ է, ապա միայն երեխաներին ստեղծագործելու նոր միջավայր տրամադրելու համար, այլ ֆունկցիաներ այդ կայքը չի կարող կատարել:
Արտակի ասած “դպրոց աշակերտ բերելու” ֆունկցիան ոչ միայն գյուղի, այլ քաղաքների շատ դպրոցների համար իրական չէ, քանի որ մեզանում նման հարցերը ծանոթ-բարեկամների շրջանում անցկացվող հարցումների հիման վրա են լուծվում: Այստեղ կուզեի մի համեմատություն էլ անել. Խոշոր ֆիրմաները կամ խանութները ուեն իրենց կայքերը (հաճախ, չգիտես ինչու, միայն անգլերեն), բայց պատկերացնո՞ւմ եք թաղի միջին կամ փոքր խանութ, որի մտքով անցի կայք ունենալ ու ներկայանալ ինտերնետում:

2. Նախ ի՞նչ է տրամադրվում դպրոցներին դոմեյնի, հոստինգի, հոստիգի ծավալների ու տեխնիկական հնարավորությունների մասով: Եվ ի՞նչ ֆինանսներ են տրամադրվում դպրոցական կայքի ստեղծման ու սպասարկման աշխատանքների վճարման համար:
Եթե տրամադրվում է անվաճար դոմեյն ու հոստինգի, բայց շատ սահմանափակ ծավալով ու միայն html-ով, ապա լավ կայք սպասելն անիմաստ է, գումարած, եթե ստեղծման ու սպասարկման աշխատանքները չեմ վճարվում:

3. Միջին պոտենցիալ ունեցող դպրոցը, եթե նրան տրամադրեն, վեևում ասածս իմաստներով, նորմալ հնարավորություններ, ապա կարող է ստեղծել ու վարել դինամիկ ու մշտապես թարմացվող կայք, որ կարող է որոշակի ինֆորմացիա տրամադրել թե աշակերտներին ու ուսուցիչների, թե ծնողներին:
Իմ պատկերացմամբ այդ ինֆորմացիան հիմնականում կարելի կլինի ներկայացնել հետևյալ բաժիններով.
ա) դասացուցակներ, սպասվող միջոցառումների գրաֆիկներ և նմանատիպ այլ բաներ,
բ) կարող են տեղադրվել, օրինակ, տնայինների համարները, բայց դրանք անպայման պետք է նաև դասարանում տրվեն,
գ) աշակերտների գնահատականներն ու բացակայությունները,
Սրանք եթե օպերատիվ մուտքագրվեն, ապա լավ հնարավորություն կլինեն ծնողների համար` իրենց երեխաներին հետևելու համար: Ինչքան հիշում եմ նմանատիպ մի ծրագիր բոլոր դպրոցների համար էին ուզում կյանքի կոչել, խոսքս dasaran.am-ի մասին է:
դ) տնօրինության և ուսուցիչների միջև որոշակի կապ կարող է ապահովել, հնարավոր է ապահովի կապ նաև ծնողների ու տնօրինության միջև, եթե ցանկություն ունենան նման բան կազմակերպելու:
Իհարկե, կներկայացնեն նաև դպրոցի տնօրինությանը և ուսուցիչներին, լավագույն շրջանավարտներին և այլ բաներ, կախված նրանից, թե ինչ ունեն:

Կարևորում եմ նաև աշակերտներին ստեղծագործելու նոր միջավայր տրամադրելու հնարավորությունը:
Սա կարող է լրացուցիչ խթան լինել աշակերտների համար` մի բան է, օրինակ, երբ շարադրություն է հանձնարարվում, մի այլ բան է, եթե դրանցից լավերը տեղադրվելու են դպրոցական կայքում:

Վերջում մի բան էլ: Կարծում եմ, բոլոր առումներով պետք է օգնել դպրոցներին այդ հարցում, գուցե ինչ-որ չափով էլ ստիպել, բայց քանի դեռ դա չի դառել կենսական պահանջ ու անհրաժեշտություն հենց դպրոցի համար, կայքերը կապահովեն դրանք ունենալու միայն ձևական կողմը, դրանց որակն էլ կլինի ցածր:

Mary
08.06.2011, 16:54
Հարգելի' Մանուշ , մոտավորապես ինչ չափի ֆինանս է հարկավոր նորմալ կայք ստեղծելու համար? Իսկ նախարարությունը չի հովանավորի?

Ruben
08.06.2011, 17:10
«Դպրոցի ինտերնետային կայքերի ստեղծման և զարգացման հիմնախնդիրները» առցանց խորհրդաժողով

Նկատառումներ
Ժամանակակից տեղեկատվական տեխնոլոգիաները ուսումնական գործընթացը կազմակերպելու, դրա արդյունավետությունն ու որակը բարձրացնելու լավագույն միջոցներից են: Չպետք է բացառել նաև տեխնոլոգիաների ազդեցությունը դաստիարակության մակարդակը բարձրացնելու առումով: Նշված գործառույթները իրականացնելու առումով մեծ դեր կարող են ունենալ դպրոցական կայքերը: Նշենք որ մինչ օրս այդ առումով դպրոցական կայքերը , հիմնականում իրենց զգացնել չեն տվել: Իհարկե հանրապետությունում կային դպրոցներ որոնց կայքերը իրենց բովանդակային, գեղագիտական , փոխհամագործակցության և այլ առումներով որոշակիորեն օգնել են վերոնշյալ խնդիրները լուծելու գործերին (Անուններ չեմ ուզում նշել, նման դպրոցներ կային և Երևանում, և մարզերում):Հարցը վերաբերվում է մասսայականությանը, որի առումով վիճակը բավարար համարել չի կարելի: Նման իրադրությունը պայմանավորված էր թե օբյեկտիվ և թե սուբյեկտիվ գործոններով: Մի կողմից դպրոցների համապատասխան կաբինետների աշխատակիցների ոչ բավարար պրոֆեսիոնալ մակարդակը, ուսուցիչների անբավարար մասնակցությունը և միջամտությունը տվյալ գործին, ավելին` ուսուցիչների մեծամասնության համակարգչին չտիրապետելու , ինչու չէ նաև տիրապետել չուզենալու, ՏՏ միջոցների նկատմամբ անվստահության և այլ հանգամանքները, մյուս կողմից որոշ օրենսդրական հարցեր` ՏՏ միջոցների օգտագործման պարտադիր լինելուն ոչ բավարար հսկողությունը: Խանգարող հանգամանք է նաև հանրապետության դպրոցների տեխնիկապես անբավարար հագեցվածությունը:
Քանի որ հանրապետության դպրոցների մեծամասնությունը ընդգրկված է ՀԴԻՑ-ում, առաջիկայում նախատեսված է հնարավորինս չափով բոլոր դպրոցների ընդգրկում, ուստի անհրաժեշտ է մտածել ծախսվող միջոցների արդյունավետ օգտագործման ուղղությամբ: Խոսքը վերաբերվում է ոչ միայն կայքերին, այլ ՏՏ միջոցները նաև դպրոցների կառավարման ողջ գործընթացում արդյունավետ օգտագործելուն: Նախ անհրաժեշտ է դպրոցների հաստիքային աշխատողի (տեխնիկ-օպերատոր) պարտականությունների հստակեցում (ավելի շուտ` ամրագրում), ինչու չէ նաև աշխատավարձի հարցի կարգավորում:
Երևի մեզ մոտ էլ ճիշտ կլինի “պարտադրել” դպրոցական կայքեր ունենալը, իհարկե համապատասխան նախապատրաստական փուլ անցնելուց հետո: Դպրոցներում պետք է ունենալ համապատասխան մասնագետ կադրեր, հակառակ դեպքում իրականացնել եղած կադրերի վերապատրաստում (Տարածքների մասնագետների վերապատրաստում` տեղերում վերապատրաստումներ իրականացնելու համար), ինչպես նաև օգտագործել հեռավար ուսուցման հնարավորությունները:
Այժմ նկատառումներ կայքերի վերաբերյալ.
Կայքի հիմնական գործառույթը պետք է լինի տեղեկատվություն տրամադրելը, ուստի այն պետք է ունենա հետևյալ բաժինները (էջերը, թեմաները և այլն)`ըստ հղումների (պարտադիր)`
• Մեր դպրոցը (Պատմական ակնարկ համայնքի, դպրոցի մասին համապատասխան նկարներով),
• Մեր մասին(Աշխատակազմ` ղեկավարություն, ուսուցիչներ, աշակերտներ ),
• Միջոցառումներ, հաջողություններ և այլն
• Հայտարարություններ
• Նորություններ (մի քանի տող և այնուհետև մանրամասն հղումով)
• Կրթական պաշարներ (Հետագայում ընդհանուր պաշարների շտեմարան տեղափոխելու պայմանով),
• Կապվեք մեզ հետ (փոստային և ելեկտրոնային հասցե, այլ տվյալներ),
• Օգտակար հղումներ` ինչպես կրթական , այնպես էլ այլ կայքերին,
• Արխիվ
Արտաքին տեսքի առումով թույլատրել ցանկացած դիզայն`ըստ ճաշակի, միօրինակություն խախտելով:
Հնարավորությունների սահմանում կայք էջը պատրաստել նաև ռուսերեն և անգլերեն, գերակայություն տալով հայերեն տարբերակին (դիզայնով, նյութերի քանակով և այլն)
Պարտադիր պայման համարել տեքստերի որոշակի տառատեսակների օգտագործումը, նկարների համար օգտագործել առնվազն երկու չափ` տեքստերում, հայտարարությունների մեջ դնելու և մեծ դիտելու: Կարծում եմ վերջիններս համար մասնագետների կարծիքները բոլորի կողմից ընդունելի կլինի:
Կայքերի պատրաստման նախկին ծրագրերի փոխարեն (Dreamwiever և այլն) հիմնականում օգտագործել նորը, ավելի արդիականը:

gayane0803
08.06.2011, 19:15
Բարև Մանուշ ջան թեման հետաքրքիր ու արդիական է: Կայքի մասին կարծիքներ կարող ենք գրել: Սակայն, անձամբ ես, կայք պատրաստած չկամ: Շատ լավ կլինի, որ վերապատրաստումներ լինեն: Իսկ եթե Արտակը ժամանակ ունենա վերապատրաստի` դա արդեն Ok կլինի: Կարճաժամկետ, սակայն բովանդակալից դասընթացները ավելի էֆեկտիվ կլինեն:
Շնորհակալություն

Chuk
09.06.2011, 01:16
1. Բոլո՞ր դպրոցները պետք է կայք ունենան:
2. Ի՞նչ միջոցների ու հնարավորությունների հաշվին են ստեղծվելու և շահագործվելու այդ կայքերը:

Պարոն Աղեկյան, շնորհակալություն հետաքրքիր ու մանրամասն գրառման համար: Այն շատ արժեքավոր է, կարևոր հարցեր է բարձրացնում: Կարծում եմ, որ Ձեր բարձրացրած հարցերին ամենատարբեր պատասխաններ կհնչեն խորհրաժողովի ընթացքում, կամ գոնե հուսով եմ, որ կհնչեն: Մասնավորապես խոսքս Ձեր երրորդ հարցի մասին էր, որը չեմ մեջբերել՝ կայքերի կառուցվածքի ու տրամադրելիք տեղեկատվության մասին:

Բայց այժմ ուզում եմ հակիրճ իմ տեսակետն արտահայտել մեջբերածս երկու հարցերի մասին:

1. Ես կարծում եմ, որ այո՛, կայքեր պետք է ունենան բոլոր դպրոցները: Բայց կարծում եմ նաև, որ ոչ մեկս պատրանք չունենք, որ վաղը կամ թեկուզ մեկ տարի հետո դա իրականանալիք ծրագիր է: Բայց նաև վստահ եմ, որ գալու է մի պահ, երբ ցանկացած, այդ թվում ցանկացած հեռավոր գյուղի դպրոց ունենալու է իր կայքը: Խորհրդաժողովի իմաստը ես հասկանում եմ հետևյալում. լսել կարծիքներ ու հասկանալ, իսկապե՞ս պետք են կայքեր, թե՞ ոչ, ի՞նչ միջոցներով է դա հնարավոր անել, ի՞նչ ձևի պետք է լինեն այդ կայքերը: Մենք այս պահին խնդիր չենք դրել մեր առջև բոլոր դպրոցների կայքով ապահովելու. դա միայն հեռահար նպատակ, ցանկություն կարող է լինել: Բայց խորհրդաժողովը նաև կարող է խթան լինել պրոցեսի, այս գործընթացի ապահովման համար:

2. Սա բարդագույն խնդիր է: Խնդիր, որն, իմ համոզմամբ, պետք է լուծվի: Երևի բոլորդ գիտեք, որ ներկայումս անվճար ենթադոմեյններ ու հոստինգ է տրամադրվում դպրոցներին, սակայն տեխնիկական հնարավորությունները չեն բավարարում ժամանակակից դինամիկ կայքեր ստեղծելու համար: Այս խնդիրը մեր ուշադրության կենտրոնում է: Կարծում եմ, որ ուրախ կլինենք խորհրդաժողովի ընթացքում նաև առաջարկներ լսել այս մասին:

Chuk
09.06.2011, 01:23
Հարգելի' Մանուշ , մոտավորապես ինչ չափի ֆինանս է հարկավոր նորմալ կայք ստեղծելու համար? Իսկ նախարարությունը չի հովանավորի?

Հարգելի Mary, Դուք իսկապես բարդ հարց եք տալիս, որովհետև «նորմալ կայք» հասկացությունը չափազանց տարողունակ է: Խորհրդաժողովի իմաստներից մեկն էլ այն է, որ սահմանենք դպրոցական կայքերի համար «նորմալ կայք» հասկացությունը ու փորձենք լուծումներ գտնել: Լուծում, թե ինչպե՞ս կարելի է առանց մեծ ռեսուրսներ ծախսելու ստեղծել դպրոցի պահանջներին բավարարող կայք: Մի բան է, երբ գնում ու որևէ դիզայներական, կայքերի պատրաստմամբ զբաղվող ընկերության ենք կայք պատվիրում, մեկ այլ բան է, երբ մշակում ենք պլատֆորմներ, որոնցով դպրոցները կարող են հեշտորեն պատրաստել իրենց կայքերը: Հնարավո՞ր է նման հարմար պլատֆորմ ստեղծել, թե՞ ոչ, արվելու՞ է, թե՞ ոչ, այս բոլոր հարցերը կարող են իրենց պատասխանը ստանալ խորհրդաժողովի ընթացքում: Ես առաջարկում եմ այս պահին չկենտրոնանալ ֆինանսների վրա: Հրաշալի հասկանում եմ, որ դա կարևորագույն խնդիրներից մեկն է, բայց այս պահին ավելի կարևոր եմ համարում հարցով հետաքրքրվող, շահագրգիռ անձանց կողմից քննարկումը, որը կարող է ուրվագծել լուծումներ: Լուծումներ, որոնք գուցե այս պահին չենք էլ պատկերացնում:

Chuk
09.06.2011, 01:28
Բարև Մանուշ ջան թեման հետաքրքիր ու արդիական է: Կայքի մասին կարծիքներ կարող ենք գրել: Սակայն, անձամբ ես, կայք պատրաստած չկամ: Շատ լավ կլինի, որ վերապատրաստումներ լինեն: Իսկ եթե Արտակը ժամանակ ունենա վերապատրաստի` դա արդեն Ok կլինի: Կարճաժամկետ, սակայն բովանդակալից դասընթացները ավելի էֆեկտիվ կլինեն:
Շնորհակալություն

Հարգելի Գայանե,
նախ անչափ շնորհակալ եմ վստահության համար: Նման վերապատրաստման կարիք մենք էլ ենք տեսնում, մեր ամենօրյա ուշադրության կենտրոնում է: Թե դա երբ կլինի և ինչ ֆորմատով, ով կզբաղվի դրանով, առայժմ դժվար է ասել: Սահմանափակվեմ ցիտելով տիկին Ավետիսյանին.

Կայքեր ստեղծելու նպատակով վերապատրաստման դասընթացներ կազմակերպելու մասին մտածում ենք ու նախապատրաստվում։

Միայն հավելեմ, որ ակնարկված վերապատրաստման ձևի վրա իր ազդեցությունն է ունենալու այս խորհրդաժողովը:

ԺաննաՀ
09.06.2011, 13:53
Ես ողջունում եմ այն մարդկանց կամքը, որն ուղղված է դպրոցական կայքեր պատրաստելուն , բայց ինչքան էլ փորձում եմ մտածել, թե` գործնականում ինչպե՞ս ստեղծել, ի՞նչ նպատակի ծառայեցնել, ին՞չ ներկայացնել չեղած հետքրքիր նյութի փոխարեն կամ ի՞նչ ակնկալել դրանցից` չի ստացվում, քանզի ինձ թվում է, որ այն ինչ ուզում ենք անել , մեղմ ասած, բարի ցանկությունների դրսևորում է:
Տեսականորեն ինչքա~ն լավ կարծիքներ կարելի է հնչեցնել այդ առիթով: Իսկ իրականու՞մ: Դպրոցներում ՏՏ կիրառման ուղղությամբ զարգացումները , աճը որևէ մեկը զգու՞մ է: Անգամ ֆորումին հետևելով կարելի հասկանալ, թե հետաքրքրվածությունը, մասնակցությունը ինչ կարգի է:
Տարիներով ոլորտի կարգավորման փուլում ենք ու վերոնշյալ <<շահագրգիռ>> կողմերի տարրական հետաքրքրության բացակայության պայմաններում հազիվ թե արժեքավոր բան ստեղծվի:
Գագիկ Աղեկյանը ճիշտ է նկատում`<<ավելի բարձր ղեկավարությունը նույնպես հստակ չի պատկերացնում դպրոցական կայքի իմաստը, կառուցվածքը, էությունն ու նշանակությունը:
Հակառակ դեպքում կմշակեին համապատասխան հայեցակագ, կկազմեին համապատասխան հանձնարարական, կտրամադրեին համապատասխան միջոցներ ու հնարավորություններ և հարցը լուծված կարելի էր համարել>>:

manush
09.06.2011, 17:00
Ես ողջունում եմ այն մարդկանց կամքը, որն ուղղված է դպրոցական կայքեր պատրաստելուն , բայց ինչքան էլ փորձում եմ մտածել, թե` գործնականում ինչպե՞ս ստեղծել, ի՞նչ նպատակի ծառայեցնել, ին՞չ ներկայացնել չեղած հետքրքիր նյութի փոխարեն կամ ի՞նչ ակնկալել դրանցից` չի ստացվում, քանզի ինձ թվում է, որ այն ինչ ուզում ենք անել , մեղմ ասած, բարի ցանկությունների դրսևորում է:


Հարգելի բարեկամներ, շնորհակալություն ձեր կարծիքներով, տեսակետներով, մտահոգ հարցադրումներով խորհրդաժողովի նախապատրաստմանը օժանդակելու համար։

Սկսել ենք դպրոցական կայքերի ստեղծման, գործող կայքերի բարելավման աշխատանքներ և հունիսի 25-30 անցկացվող առցանց խորհրդաժողովն այդ ուղղությամբ իրականացվող առաջին քայլն է։

Mary
10.06.2011, 17:37
Հարգելի Mary, Դուք իսկապես բարդ հարց եք տալիս, որովհետև «նորմալ կայք» հասկացությունը չափազանց տարողունակ է: Խորհրդաժողովի իմաստներից մեկն էլ այն է, որ սահմանենք դպրոցական կայքերի համար «նորմալ կայք» հասկացությունը ու փորձենք լուծումներ գտնել: Լուծում, թե ինչպե՞ս կարելի է առանց մեծ ռեսուրսներ ծախսելու ստեղծել դպրոցի պահանջներին բավարարող կայք: Մի բան է, երբ գնում ու որևէ դիզայներական, կայքերի պատրաստմամբ զբաղվող ընկերության ենք կայք պատվիրում, մեկ այլ բան է, երբ մշակում ենք պլատֆորմներ, որոնցով դպրոցները կարող են հեշտորեն պատրաստել իրենց կայքերը: Հնարավո՞ր է նման հարմար պլատֆորմ ստեղծել, թե՞ ոչ, արվելու՞ է, թե՞ ոչ, այս բոլոր հարցերը կարող են իրենց պատասխանը ստանալ խորհրդաժողովի ընթացքում: Ես առաջարկում եմ այս պահին չկենտրոնանալ ֆինանսների վրա: Հրաշալի հասկանում եմ, որ դա կարևորագույն խնդիրներից մեկն է, բայց այս պահին ավելի կարևոր եմ համարում հարցով հետաքրքրվող, շահագրգիռ անձանց կողմից քննարկումը, որը կարող է ուրվագծել լուծումներ: Լուծումներ, որոնք գուցե այս պահին չենք էլ պատկերացնում:

Իսկ խորհրդատվություն իրականում կկայանա? Նկատի ունեմ ոչ առցանց: Ավելի ճիշտ չի լինի որոշ դպրոցներից պատասխանատու մեկ ուսուցիչ և մեկ աշակերտ հրավիրել յուրաքանչյուր դպրոցից ,հանդիպում կազմակերպել,և քննարկել? Իսկ այն առաջարկը , որ աշակեիրտները նույնպես մասնակցեն կայքերի ստեղծմանը: Շատ աշակերտներ գիտեն ծրագրավորում, համակարգչային հմտություններ ունեն:

Garik76
10.06.2011, 19:30
Բարև բոլորին:Շատ լավ նախաձեռնություն է, ցավում եմ ,որ մեր դպրոցը չունի սեփական կայքը:Նայել եմ Կոտայքի կայքերը պատկերացում կազմելու համար, թե ինչ կարելի է ընդգրկել կայքում:Բոլորն իրար նման են, ցանկալի կլինի, որ ստեղծվելիք կայքերը լինեն պայծառ, գրավիչ և օբյեկտիվորեն պատկերացում տան դպրոցի մասին` նրա կրթական հաջողությունների մասին, այլ ոչ թե տնօրենի գործունեության մասին::confused:
Պետք է ընդգրկի դպրոցի միջոցաառումները/եթե հնարավոր է նաև տեսաշարով/, աշակերտների և ուսուցիչների առօրյան, քննությունների և արտաքին գնահատման արդյունքները:
Չգիտեմ, ճիշտ էի հասկացել քննարկման էությունը, թե ոչ, բայց չկարողացա անտարբեր մնամ:

Chuk
10.06.2011, 19:37
Իսկ խորհրդատվություն իրականում կկայանա? Նկատի ունեմ ոչ առցանց: Ավելի ճիշտ չի լինի որոշ դպրոցներից պատասխանատու մեկ ուսուցիչ և մեկ աշակերտ հրավիրել յուրաքանչյուր դպրոցից ,հանդիպում կազմակերպել,և քննարկել? Իսկ այն առաջարկը , որ աշակեիրտները նույնպես մասնակցեն կայքերի ստեղծմանը: Շատ աշակերտներ գիտեն ծրագրավորում, համակարգչային հմտություններ ունեն:

Հարգելի Mary,
նման հանդիպում այս փուլում չի նախատեսվում: Բայց մենք քննարկում ենք հետագա աշխատանքի տարբեր տարբերակներ ու իհարկե քննարկում ենք նաև նման հանդիպումների հնարավորությունը: Ավելին, ոչ թե լոկ հանդիպումների հնարավորությունը, այլև որոշակի վերապատրաստումների, աշխատանքային խմբեր ստեղծելու և այլնի: Իհարկե, պարզ է, որ դա չենք կարող անել բոլոր դպրոցների համար:Քանակն ահռելի է, մեր հնարավորությունները՝ սահմանափակ: Պարզապես ճիշտ չի լինի, որ մենք հիմա որևէ նման բան խոստանանք: Կրկնեմ, որ դրանք առայժմ քննարկման մակարդակում են: Խորհրդաժողովի ավարտից հետո կարծում եմ, որ մեր համար էլ առավել հստակ կլինեն հետագա քայլերը, կուրվագծվի այն ուղղությունը, որով շարժվելու ենք:

Արմինե Աբգարյան
11.06.2011, 19:23
Ես լուռ հետևում էի քննարկումներին , տեսնելով հարգելի Mary առաջարկը որոշեցի որ ես էլ միանամ ձեզ ,իրոք պետք է օգնություն ցույց տալ , մեզանից շատերին շարժիչ ուժ է պետք որպիսի առաջ գնանք և ուղղություն , հատկապես գյուղական վայրերում , որտեղ հիմնականում ինֆորմատիկայի ուսուցիչը նաև օպերատոր է և դպրոցում միակ համակարգիչ գիտեցողը : Ես համամիտ եմ այն կարծիքի հետ , որ պետք է այդ գործում ներգրավել աշակերտներին և նրանց միջոցով կկարողանանք ստեղծել դպրոցական կայքը : Խնդրում ե , եթե վերապատրաստում անցկացնելու լինեք չմոռանաք Շիրակի մարզը , ես շատ կուզենաի մասնակցել նմանատիպ վերապատրաստման :
Հարգանքներով Շիրակի մարզի Հացիկ գյուղից :

Susanna55
11.06.2011, 22:28
Ես հետևում եմ բոլոր գրառումներին և ուզում եմ ֆորումցիների ուշադրությունը հրավիրել մեր դպրոցի նոր կայքի վրա : Կայքը նոր է և դեռ շատ բան կա անելու : gyumri12.schools.am
Կուզենայի կարծիք իմանալ կայքի մասին :

Արմինե Մ
11.06.2011, 23:03
Հարգելի Սուսաննա, ձեր դպրոցի կայքը դիտեցի, մի փոքր ուսումնասիրեցի. դուրս եկավ, շատ հագեցած էր, բազմաբնույթ բաժիններ ուներ: Ինձ թվում է՝ շատերին կգոհացնի: Սակայն չեմ կարող մի նկատողություն չանել. ուղղագրական սխալներ կային/ուղանկյունանիստեր, առարկայական ցանք, սփրտնել և այլն/:
Եկեք կայքերը ստեղծենք, ձևավորենք և այլն, բայց չմոռանանք մեր ամենամեծ հարստության՝ հայոց լեզվի մասին: Ի դեպ, դպրոցական շատ կայքեր կան, որոնց գլխավոր էջը ձևավորված է անգլերենով: Մի՞թե դա որակի և հաջողության նշան է:
Կցանկանայի, որ խորհրդաժողովին անպայման խոսվեր դպրոցական կայքերում հայոց լեզվի մաքրության, լեզվի պետական օրենքը հարգելու մասին:

arm.150yan
12.06.2011, 15:37
Ողջունում եմ ֆորումի բոլոր մասնակիցներին: Շնորհակալություն եմ հայտնում այս արդիական հարցը առցանց քննարկման ներկայացնելու համար:
Ցավով պետք է նշեմ, որ մեր դպրոցի կայքը շատ թույլ է և որակապես ցածր: Այն պատրաստվել է և տեղադրվել ուղղակի կայք ունենալու համար, առանց հետագայի… Նշեմ, որ կայքի պատրաստման ոչ մի գործընթացի չեմ մասնակցել` մի շարք օբյեկտիվ և սուբյեկտիվ պատճառներով:
Այժմ առաջարկում եմ հետևյալը`
1) Եթե կայքերը պատրաստվելու են մյուս դպրոցների հետ կապ պահպանելու, առցանց շփվելու, ֆորումներ կազմակերպելու և այլնի համար, ապա առաջարկում եմ մշակել չափորոշիչներ, ըստ որի բոլոր կայքերը պետք է ունենան ցանկի (մենյուի) նույն կետերը, որպեսզի կարողանանք համագործակցել, հակառակ դեպքում շփումը անիմաստ կդառնա: Իսկ դիզայնի մասը` գույն, ձևավորում, ոճ, թողնել ազատ, որտեղ կձևավորվի յուրաքանչյուր դպրոցի համար ինքնատիպ մոտեցում:
2) Եթե կայքերը պատրաստվելու են միայն դպրոցի ներկայացման, բաց և համադրված դասերը մուտքագրելու, միջոցառումների մասին տեղեկացնելու, ծնողների հետ առցանց կապ պահպանելու համար, ապա բոլոր դպրոցներին թողնել իրենց կայքը ձևավորելու ազատ ընտրության հնարավորությամբ: Միայն հետևել, որ ունենան պարբերաբար թարմացումներ:
3) Կայք պատրաստողների համար սահմանել վճարման կարգ (աշխատավարձին կից), հաշվի առնելով, որ այն բավականին աշխատատար գործընթաց է և թարմացումներն էլ կատարվելու են ողջ տարվա ընթացքում: Չմոռանանք, որ ցանկացած աշխատանք պահանջում է վարձատրություն, իսկ վարձատրությունը բարձրացնում է աշխատունակությունն ու ոգևորում սկսած գործին բարեխղճորեն հետևելուն… Ցավում եմ, որ շատ դպրոցների տնօրեններ չեն արժևորում դպրոցի կայք ունենալը, մյուս կողմից էլ չեն պատկերացնում այդ գործի բարդությունը` կայքը ինչպե՞ս է պատրաստվելու, ի՞նչ միջոցներով…
4) Շատ ցանկալի է, որ կազմակերպվի նաև վերապատրաստման դասընթացներ, որպեսզի ծանոթանանք կայքերի պատրաստման արդի ոճերի և գրագետ կիրառելով դրանք` ճիշտ ներկայանանք:
Հուսով եմ առաջարկություններս կհետաքրքրի ֆորումի մյուս մասնակիցներին և կքննարկվի:
Հարգանքներով` Արմենուհի Հարությունյան
Գյումրու թիվ 15 դպրոց:

Susanna55
12.06.2011, 21:08
Շնորհակալություն Արմինե ջան:

Lusine7
13.06.2011, 11:35
Շնորհակալություն Գագիկին մանրամասն քննարկման և վերլուծությունների համար: Կարծում եմ, Ձեր կատարած հարցադրումները ճիշտ են, պետք է հաստակեցնել դպրոցական կայքերի ստեղծման նպատակը ընդհանրապես, ստեղծել բոլորի համար ընդհանուր ելակետային որոշակի սկզբունքներ: Դրանից հետո արդեն յուրաքանչյուր դպրոց ինքը իր կայքը ստեղծելիս կառաջնորդվի դրանցով, կառանձնացնի իրեն անհրաժեշտ հարցերն ու խնդիրները, և ինքնուրույն կորոշի դրանց լուծման եղանակները:

dminasyan
13.06.2011, 14:13
«Դպրոցական կայքերի ստեղծման և զարգացման հիմնախնդիրները»

Նշված թեմայով խորհրդաժողովի անցկացման մտահղացումը բավականին հետաքրքիր է, իսկ ժամանակային առումով, գուցե, մի փոքր ուշացած: Թեման պիտի լինի ամենօրյա ուշադրության կենտրոնում, իսկ ինչ վերաբերվում է այն հարցադրմանը, թե արդյոք պետք են թե ոչ դպրոցական կայքերը, միանշանակ կարող եմ ասել, որ իհարկե դրանք անհրաժեշտ են: Վերջին հաշվով ապրում ենք մի ժամանակաշրջանում, երբ բավականին մեծ ուշադրություն է հատկացվում տեղեկատվական տեխնոլոգիաներին (ՏՏ), իսկ կառավարության ռազմավարական ուղղություններից է ՏՏ ոլորտին աջակցելը: Կարծում եմ նման առիթ ձեռքից բաց թողնելն այնքան էլ տրամաբանական չէ: Հիմնական խոսքս վերաբերվում է պատկան մարմիններին, ովքեր ի պաշտոնե պետք է աջակցեն կամ գոնե օգնեն դպրոցներին ունենալ սեփական ինտերնետային կայք: Իսկ ովքե՞ր են այդ պատկան մարմինները: Բնականաբար, այն սկսվում է կառավարությունից, կրթության և գիտության նախարարությունից և ավարտվում դպրոցի տնօրենով: Իսկ միջին օղակներում կարող են հանդես գալ համայքների կրթության բաժինները, հասարակական կազմակերպությունները, ուսումնական կենտրոնները, ՏՏ ոլորտի ընկերությունները, անհատ ձեռներեցները, ինչու չէ նաև ծնողները:

Իսկ ինչի համար են պետք դպրոցական կայքերը

Նախ և առաջ նրանք կարող են ներկայացնել լայն հասարակությանը տվյալ դպրոցում իրականացվող ուսումնական գործընթացները, լուսաբանել դպրոցում կատարվող տարաբնույթ միջոցառումները, ներկայացնել դպրոցի պատմությունը, կապ պաշտպանել ուսուցիչների, աշակերտների և ծնողների միջև, ներկայացնել աշակերտների և ուսուցիչներ հաջողություններն ու ձեռքբերումները: Ցանկության և հնարավորության դեպքում կայքը կարող է ներկայացնել նաև տվյալ համայնքը, իր պատմա-մշակութային հարստություններով, այն անձին, ում անունով կոչվում է դպրոցը, բարերարներին, անհատներին, ովքեր անմիջական մասնակցություն ունեն դպրոցի բարեկարգման և նյութական բազայով ապահովման գործում և այլն:

Իսկ ովքեր պետք է մասնակից լինեն կայքի ստեղծման աշխատանքներին

Առաջին հերթին ցանկալի է, որ դա աշակերտը կամ նրանց խումբը լինի, քանի որ նրանց կարելի է հանձնարարել կայքի յուրաքանչյուր էջի համար անհրաժեշտ նյութերի հայթայթումը և պատրաստումը: Այն կարող է լինել ուսումնական-հետազոտական աշխատանք: Բնականաբար, աշակերտների հետ միասին պետք է աշխատի նաև համապատասխան մասնագետ ուսուցիչը /ի նկատի ունեմ տարբեր բնագավառների` հայոց և օտար լեզվի, ֆիզիկայի, մաթեմատիկայի, պատմության և այլն/, ով պետք է ուղղություն ցույց տա, հետևի աշխատանքը ճիշտ և որակով կատարելուն: Այստեղ պետք է առանձնացնել նաև ինֆորմատիկայի մասնագետին: Փորձված և մասնագիտորեն լավ պատրաստված ինֆորմատիկայի ուսուցչի առկայության դեպքում աշխատանքներն կարող են լինել և´ արագ, և´ որակյալ: Ենթադրում եմ, որ կայքի թարմացման աշխատանքները կարելի է վստահել, որը հաճախ այդպես է, ինֆորմատիկայի ուսուցչին: Սակայն չի բացառվում նաև այդ աշխատանքներին այլ մասնագետի ներգրավումը, ինչու չէ, նաև աշակերտներին: Չմտածեք, որ մոռացել եմ տնօրենին կամ կազմակերպչին/փոխտնօրենին/: Իհարկե, հենց նրանցից է կախված, թե ինչքանով է դպրոցի կայքը ծառայում իր նպատակին, ինչ հաճախականությամբ են թարմացվում կայքի էջերը, ինչքանով է հետևողական, որ կայքում լուսաբանվեն դպրոցի առօրյային վերաբերվող հարցերը:

Իսկ ինչ միջոցներով պետք է պատրաստել կայքերը

Իհարկե, կայք պատրաստելն այնքան էլ հեշտ գործընթաց չէ, առավել ևս, որ այն լինի դինամիկ ու մատչելի թարմացումներ կատարելու համար: Համապատասխան դասընթաց կամ վերապատրաստումներ անցած ինֆորմատիկայի մասնագետը կարող է որոշ չափով, բայց ոչ ամբողջությամբ լուծել հարցը, սակայն երբ խոսքը գնում է հաճախակի թարմացումների մասին, այստեղ կարելի է մի քիչ մտածել: Լավ կլինի գտնել հովանավորներ, մասնագետներ տվյալ գործում աջակցելու համար: Ինչու չէ, դիմել վերադաս մարմիններին աջակցելու կամ համապատասխան դասընթացներ կազմակերպելու համար: Ցանկալի է նաև, որ դպրոցի տնօրինությունը կարողանա գտնել միջոցներ կայքի թարմացման աշխատանքները կատարող անձանց խրախուսելու համար:

Թերևս այսքանը դասավանդող-մասնագետի կողմից, ով երկար տարիներ զբաղվել է կայքերի /հատկապես դպրոցական/ ստեղծման գործով և մասնագիտական առումով պատրաստ է համապատասխան աջակցություն ցուցաբերել այս աշխատանքներում:
Լրացուցիչ, ներկայացնում եմ «ԴՊԻՐ» էլեկտրոնային պարբերականում թեմային վերաբերվող իմ կողմից հրապարակված հոդվածների ցանկը`
WEB կայք: Ստեղծման գործընթացը
http://dpir.mskh.am/arxiv/dpir18-11.html
Ուսումնական հաստատությունների WEB կայքեր, նրանց նախագծման և տեղադրման աշխատանքներ
http://dpir.mskh.am/arxiv/dpir19-14.html
Ուսումնական հաստատությունների WEB կայքեր, նրանց նախագծման և տեղադրման աշխատանքներ (սկիզբը նախորդ համարում)
http://dpir.mskh.am/arxiv/dpir20-11.html
Ինչէ HTML-ը: Համառոտ տեղեկություն
http://dpir.mskh.am/arxiv/dpir24-8.html

Դավիթ Մինասյան,
դասավանդող,
«Կիրառական մաթեմատիկա և ծրագրավորում» խորացված ուսուցման ղեկավար,
«Մխիթար Սեբաստացի» կրթահամալիր

gayane0803
13.06.2011, 17:19
Հարգելի Susanna55 կայքը նայեցի, հետաքրքիր է, բավականին աշխատանք է արված: Ով է սարքել և ինչքան ժամանակում? Տնօրինություն բաժինը չբացեց, 404 error տվեց: Գրատախտակը չհասկացա ինչի համար է: Շնորհակալություն

gayane0803
13.06.2011, 17:31
arm.150yan ջան շատ լավ հարցեր եք առաջ քաշել, նամանավանդ, վճարման պահով: Սակայն դա չլինող բան է: 2 տարի է խնդրում ենք օպերատորի իրավունքներն ու պարտականությունները սահմանեն, մի քիչ էլ աշխատավարձը բարձրացնեն, բայց...

Susanna55
14.06.2011, 13:26
Ով է սարքել և ինչքան ժամանակում?

Գայանե ջան , նախորդ կայքը լրիվ ես էի պատրաստել ,իսկ սրա ժամանակ իմ տղան է օգնել.պատրաստումը բավականին երկար է տևել,բայց դա չէ դժվարը, այլ ամեն օր,կամ մի քանի օրը մեկ նորից թարմացնելը, տարբեր ուսուցիչների պատրաստած նյութերը տեղադրել: Առանց վճարման ,կամ գոնե խրարուսանքների շատ դժվար է: Մեր տնօրենը հասկանում, գնահատում է, բայց փոխտնօրենների և ուսուցիչների վերաբերմունքը նման է .... Այս ամենի հետ միասին ոչ մի վճարում:

dminasyan
14.06.2011, 16:58
Ես հետևում եմ բոլոր գրառումներին և ուզում եմ ֆորումցիների ուշադրությունը հրավիրել մեր դպրոցի նոր կայքի վրա : Կայքը նոր է և դեռ շատ բան կա անելու : gyumri12.schools.am
Կուզենայի կարծիք իմանալ կայքի մասին :

Բարև Ձեզ հարգելի գործընկեր,
Ես ուշադիր ուսումնասիրեցի ձեր դպրոցի կայքը, ցանկանում եմ իմ նկատառումներն հայտնել կայքի վերաբերյալ / խոսքը gyumri12.schools.am-ի մասին է/՝
դրական կողմեր՝
1. դիզայնի առումով ընդունելի է, թեթև և հետաքրքիր կառուցվացքով,
2. մենյուների /գլխավոր-վերևի հորիզոնականը և հիմնական-ձախ կողմի/ ընտրությունը նույնպես լավ է,
3. հիմնականում օգտագործվել է *.html լեզվի հնարավորությունները:
բացասական կողմեր
4. հիմնական մենյուի մեջ օգտագործվել են ենթամենյուներ <Հոսքեր>, <Ուսումնական մաս> և <Խմբակներ> բաժինների համար, լավ կլիներ դրա փոխարեն օգտագործել առանձին ենթաէջեր և նրանք բացվեին հետևյալ ձևով՝ Հոսքեր --> Բնագիտական և այլն,
5. տառատեսակներ ընտրել քիչ թվով /5-ից 6/, օրինակ՝ վերնագրերի համար մի տառատեսակ, հիմնական տեքստի համար՝ մեկ այլ, հեղինակներին նշելու համար մեկ այլ և այդպես շարունակ: Տառատեսակներ կարելի է ստեղծել առանձին *.css տիպի ֆայլով,
6. կայքի ստեղծման ժամանակ չեն օգտագործվել շաբլոններ /*.dwt/, որոնք կարող են լինել 2-ից 3-ը, այն կարող է բավականին հեշտացնել էջերի պատրաստումը,
7. շաբլոններից օգտվելու դեպքում ցանկալի է մենյուների կետերը լինեն քիչ և համաձայնեցված տնօրինության հետ, այն հետագայում քիչ փոփոխելու համար,
8. ցանկալի է և դա հնարավոր է ամբողջ կայքը պատրաստել միայն *.html լեզվի հնարավորություններով, օգտագործելով Dreamweaver կամ նմանատիպ ծրագրային փաթեթ /խուսափեք javascript-ից կամ php-ից, եթե դրանում հմտացած չեք/,
9. մեծ ուշադրություն դարձրեք երկու կարևոր բաժինների առկայությանը՝ <Նորություններ> և <Հայտարարություններ>, դրանք ձեր մոտ չկան կամ բացվում են do.am-ից, որն իմ կարծիքով թույատրելի չէ մի շարք առումներով: Աշխատեք, որ այդ բաժինները լինեն գլխավոր մենյույում:
10. աշխատեք, որ առաջին էջում լինեն բոլոր վերջին փոփոխությունները:

Իհարկե, այսքան աշխատանքը կատարելու համար պետք է լինի համախոհների մեծ բանակ /տնօրեն կամ կազմակերպիչ, ուսուցիչներ և իհարկե աշակերտներ/, որոնց հետ կարելի է կատարել անհրաժեշտ աշխատանքներ:
Հարգանքով՝
Դավիթ Մինասյան

gayane0803
14.06.2011, 18:00
Սուսաննա ջան երևում է լավ համբերատար ես, հալալ է քեզ: Պարոն Մինասյանի դիտողություններն անպայման հաշվի առեք, ինքը մեծ փորձ ունի...

Արեգ
14.06.2011, 23:29
Կուզենայի կարծիք իմանալ կայքի մասին :

Հետաքրքիր կայք է, կներեք, բայց ուզում եմ մի քանի միտք արտահայտել:

1. Հատուկ սայթեր կան, որոնք առաջարկում են սայթերի կառուցվածքային պատրաստուկներ: Կարելի է ընտրել ցանկացած դիզայնը և մի քիչ ֆոնտային ձևափոխություն անել ու ամեն ինչ պատրաստ է: Կարծում եմ ձեր կայքերից մեկը այդպիսին է:
Լավ կլինի կայքն ամբողջությամբ կառուցեք HTML լեզվով և Macromedia Dreamweaver ծրագրով:
2. Ընդունելի չէ ֆոնտերի չափերի բազմազանությունը, ընտրեք վերնագրի համար մի չափ, տեքստի համար մի չափ:
3. Լավ կլինի, որ բոլոր օժանդակ լինկերը բացվեն առանձին պատուհաններով:
4. Գլխավոր էջում չարժե դնել ԳԼԽԱՎՈՐ ԷՋ և ԲԱՐԻ ԳԱԼՈՒՍՏ լինկերը, դրանք արդեն կան այնտեղ:
5. Իմ կարծիքով վերևի լինկերն անիմաստ են: Իսկ ՄԵՐ ԴՊՐՈՑԻ ՊԱՏՄՈՒԹՅՈՒՆԸ էջում բացակայում է ԳԼԽԱՎՈՐ ԷՋ լինկը: Դատարկ լինկեր էլ կան:
6. Առաջնային ուշադրություն պետք է դարձնել ՆՈՐՈՒԹՅՈՒՆՆԵՐ լինկին և լավ կլինի, որ այն բոլոր էջերում երևա:
7. և այլն:

arm.150yan
16.06.2011, 18:28
Հարգելի Գայանե, շնորհակալ եմ, որ հարցերը ձեզ հետաքրքրել են, համոզված եմ, որ եթե ոչ բոլորին, ապա մեծ թվով մասնագետների հուզող հարցերից է հենց աշխատանքի ճիշտ վճարման հարցը: Մարաթոնյան վազքով ուզում ենք հասնել Եվրոպային, նմանեցրել ենք ուսումնական ողջ գործընթացը` նրանց փոխանցելով մեր ունեցած "հին" կրթակարգը: Եթե պետք է ունենանք Եվրոպական չափորոշիչներ արդեն փուլ առ փուլ իրականացվող բազում ծրագրերում, ինչու չպետք է լինի նմանատիպ վարձատրություն: Ես ել եմ ձեր ասած "բայցը" բազմիցս կրկնել, ուղղակի համոզված եմ, որ արդեն ժամանակն է այդ բայցը բացառելը... Ուղղակի մենք շատ ենք սիրում մեր երկիրը, մեր դպրոցը և մեր ընտրած շատ ժամանակակից, շատ առաջնային, արդեն կառավարության կողմից ուշադրության արժանացած մասնագիտությունը, որով կերտվելու է ՏՏ տեղնոլոգիաների ապագան մեր հարազատ և անգնահատելի ՀԱՅԱՍՏԱՆՈւՄ: Իսկ մենք գիտակցում ենք, որ ցանկացած գործում առաջին քայլեր անողները խոչնդոտներ շատ են ունենում` եթե չկա աջակից և օժանդակող ՁԵՌՔ:
Հարգանքներով` Արմենուհի Հարությունյան
Գյումրու թիվ 15 դպրոց:

Hassmik
23.06.2011, 17:19
Կարծում եմ, դպրոցական կայքից “ընդգրկուն ու հարուստ ուսումնակրթական միջավայր լինելու” սպասելիքը իրական չէ, դա խիստ չափազանցեցված է: Նման մակարդակի կարող են հասնել հատ ու կենտ կայքեր` որպես բացառություն, այսինքն դա չի կարող լինել օրինաչափություն, պատճատների մասին կխոսեմ ավելի ուշ:

Կայքն իրոք հարուստ ու ընդգրկուն ուսումնական միջավայր է։ Այստեղ հնարավոր է ոչ միայն տեղադրել դպրոցի մասին այս կամ այն տեղեկությունը, այլև թույլ տալ, որ իրենց, իրենց ընտանիքի, ընկերների, դպրոցի, հույզ ու կատակի մասին պատմեն սովորողները։ Դրա համար պիտի նախ հանդուրժող լինել երեխայի հում խոսքի նկատմամբ, հետո՝ ունենալ տեխնիկային ու տեխնոլոգիային տիրապետող ուսուցչական կազմ, որպեսզի այդ խոքլը շտկվի դասարանում կամ առցանց՝ էլ. հասցեներին, գրելով, սոցկայքերում իրար փնտրելով։ Էստեղ նաև հետաքրքիր գնահատման ձև է մշակվում։ Գնահատում ոչ թե մեզ՝ ուսուցիչներիս համար, այլ իրենց՝ երեխաների։ Սա իրական գնահատում է։ Քո դրած նյութը քանի՞ հոգի կարդաց, ի՞նչ արձագանքներ եղան, ուսուցիչն ի՞նչ գրեց, ընկերները, հարազատները...

Hassmik
23.06.2011, 17:28
1. Հատուկ սայթեր կան, որոնք առաջարկում են սայթերի կառուցվածքային պատրաստուկներ:
(Գայանի գրառումից)

Եթե նոր եք կայք ստեղծելու, իհարկե, կարելի է դիմել եղած կառուցվածքային պատրաստուկներին։ Իրականում գործող կայքը, ի նկատի ունեմ՝ ամեն վայրկյան թարմացվող, իր պահանջներն է դնում։ Եթե ուզում ես նյութերը դասակարգել, ապա դպրոցում, ըստ իս ամենահարմարը ըստ հեղինակների դասակարգելն է (տե՛ս http://mijin.mskh.am/)։ Որպեսզի կայքը գործուն լինի, անհրաժեշտ է «մեկնաբանումներ» բաժին ունենալ։ Մնացածը՝ ըստ հավաքելիք տեղեկությունների։

գօգա1
23.06.2011, 23:16
Մեր դպրոցական կայքը վաղուց թարմանալու կարիք ունի, շատ լավ կլինի , որ մենք նույնպես լավ կայք ունենաք, ինքս շատ եմ կարևորում դրա դերը:

kudash
23.06.2011, 23:25
Բարև ձեզ: Շատ կարևոր խնդիր է առաջադրվել: Եվրոպական դպրոցների կայքերը այնքան կատարելագործված են ,որ երեխաները ինտերնետով են ստանում և ուղարկում իրենց հանձնարարությունները: Լավ կլինի, որ հայաստանն էլ ձգտի դրան: Ես վստահ եմ, որ եթե աշխատենք ` կարող ենք: միայն թե խրախուսանքներ էլ են պետք:

manush
24.06.2011, 16:15
Հարգելի գործընկերներ, շնորհակալություն առացանց խորհրդաժողովի նախապատրաստական փուլին մասնակցելու և կարևոր դիտարկումներ ներկայացնելու համար։

Ինչպես արդեն տեղեկացրել ենք, դպրոցական կայքերի ստեղծման և զարգացման հիմնախնդիրներին նվիրված առցանց համաժողովը կմեկնարկի վաղը՝ հունիսի 25-ին։ Նշված հիմանխնդիրների վերաբերյալ նյութերը (հոդվածներ, զեկուցումներ և այլն) կարող եք տեղադրել մինչև հունիսի 30–ը ներառյալ։

Ակնկալում ենք, որ դպրոցների ղեկավարները, ուսուցիչները, աշակերտները, ինչպես նաև կրթության ոլորտի պատասխանատուներն ակտիվորեն կմասնակցեն խորհրդաժողովին, ինչն էականորեն կօժանդակի կայքերի ստեղծման ու զարգացման ուղղությամբ նախատեսված աշխատանքների հաջող իրականացմանը։

Խորհրդաժողովի ընթացքում առաջացած տեխնիկական դժվարությունների մասին կարող եք հայտնել այս թեմայում կամ գրել մեզ էլեկտրոնային նամակով (artak@ktak.am)։

Հարգելի բարեկամներ, Արտակը ստեղծել է նաև «Ինչպե՞ս տեղադրել խորհրդաժողովի նյութերը» (http://forum.armedu.am/showthread.php/624-Ինչպե՞ս-տեղադրել-խորհրդաժողովի-նյութերը) ուղեցույցը, որում մանրամասն ներկայացրել է նյութերի տեղադրման համար անհրաժեշտ քայլերի հաջորդականությունը։

Սիրուն Սնեցունց
27.06.2011, 18:37
Բարև հարգելի գործընկերներ:
Կարդացի Ձեր բոլորի մտահոգությունների մասին, հարցերն ու պատասխանները, համամիտ եմ որոշների հետ:
Կայք ստեղծելը երևի ավելի հեշտ գործընթաց է, քան այն ժամանակին ու հաճախակի թարմացնելը: Ես բոլորիդ առաջարկում եմ այս գործընթացին ներգրավել դպրոցի ակտիվ աշակերտներին, ինչպես նաև` ուսուցիչներին:
Ես էլ ցանկանում եմ մեր դպրոցի էջը պատրաստել, ունեմ որոշակի հմտություններ, սակայն շատ բաներ դեռևս չեմ օգտագործել և հայցում եմ Ձեր օգնությունը: Եթե կարող եք, ցանկալի կլինի HTML կոդավորումը տեղադրեք, կամ անհրաժեշտ նրբությունները բացատրեք:
1. Ինչպես էջում տեղադրել Որոնում բաժինը:
2. Ինչպես տեղադրել Ֆորում հարց ու պատասխանների համար, որ աշակերտներն ու ուսուցիչները կարողանան իրեն անուններով մուտք գործեն և հարցեր առաջ քաշեն:
Կանխավ շնորհակալություն:
Սյունիքի մարզի Սիսիանի ավագ դպրոցի համայնքային ռեսուրս-կենտրոնի ղեկավար, օպերատոր:

Ruzan04
30.06.2011, 18:32
Բարև իմ կոլեգաներ ուրախ եմ, որ նման օնլայն կարծիքների փոխանակություններ են լինում, բայց ցավոք սրտի դրանց մասնակից են լինում հիմնականում ԻՀԿ-ի աշխատակիցները, մնացած ուսուցիչներին հեչ էլ չի հետաքրքրում… Ուստի լավ կլինի, որ պարտադրվի և՛ ուսուցիչներին, և՛ տնօրեններին

Ruzan04
30.06.2011, 19:03
Լավ բան եք մտածել, բայց դրա արժեքը ոչ բոլորն են հասկանում, ուստի լավ կլիներ այդ խորհրդաժողովը դասերի ընթացքում անցկացնել, որ ուսուցիչներն էլ կարողանային մասնակցել, մի գուցե հետաքրքրություն կառաջանար նրանց մեջ

Anush Avetisyan
30.06.2011, 22:51
Իմ կարծիքով խորհրդաժողովը ճիշտ ժամանակին է ընտրված:Հիմա ուսուցիչներն ազատ են դպրոցական հոգսերից և կարող են գոնե հետևել ֆորումի քննարկումներին, կիսել իրենց մտահոգություններն ու հետևել փորձառու մասնագետների խորհուրդներին:

Ruben
30.06.2011, 23:02
Հարգելիներս, կարևոր չէ դասերի ընթացքում, թե արձակուրդների ընթացքում, փաստ է, որ մենք շատ պասսիվ ենքկարևոր հարցերի քննարկման ընթացքում… Ոչ մի ծանրաբեռնված անձ ժամանակի պակասից չի բողոքում, Ժամանակ չունենալուց բողոքում է միայն ոչինչ չանողը...

manush
01.07.2011, 12:41
Հարգելի գործընկերներ,

ավարտվեց Կրթական տեխնոլոգիաների ազգային կենտրոնի կազմակերպած «Դպրոցական կայքերի ստեղծման և զարգացման հիմնախնդիրները» առցանց խորհրդաժողովը։

Շնորհակալություն ենք հայտնում բոլոր մասնակիցներին՝ համաժողովի նախապատրաստական փուլի աշխատանքներին աջակցելու, համաժողովի բաժնում նյութեր տեղադրելու, քննարկումներ ծավալելու, կարծիքներ, առաջարկներ, ինչպես նաև ձեր հաջողված ու առաջավոր փորձը ներկայացնելու համար։

Ճիշտ է, որ համաժողովը հայտարարվեց դպրոցների համար «թեժ» ժամանակահատվածում, երբ փոխադրական ու ավարտական հարցերն էին կարևոր ու առաջնային, իսկ ացկացվեց արդեն ուսումնական տարվա ամենավերջին օրերին, երբ բոլորը մտածում էին արձակուրդի ու հանգստի մասին։

Սակայն դուք, հարգելի գործընկերներ, որ արժևորում եք դպրոցական կայքերի դերը և հետաքրքրված եք սեփական կրթօջախի կայքը ստեղծելու կամ արդյունավետ շահագործելու հարցերով՝ նպաստեցիք համաժողովի կայացմանը՝ հանգամանորեն ներկայացնելով իրավիճակի նկարագրությունը, կայքերի ստեղծման ու շահագործման հիմնական նպատակը, հիմնախնդիրները, բովանդակային և տեխնիկական առանձնահատկությունները։

Խորհրդաժողովի նյութերի (զեկուցումները) ժողովածուն կտեղադրենք «Հայկական կրթական միջավայր» պորտալում և լրացուցիչ կտեղեկացնենք բոլոր դպրոցներին։

Ինչպես նշել էինք խորհրդաժողովի նախապատրաստման ընթացքում, սա կայքերի ստեղծման ուղղությամբ կազմակերպված առաջին քայլն էր։

Այժմ նախատեսում ենք մշակել դպրոցական կայքի առանձնահատկություններն ու բնութագրերը և ներկայացնել ձեր քննարկմանը։ Մշակման ընթացքում մեզ մեծապես կօգնեն ձեր ունեցած փորձը, ներկայացրած առաջարկները։ Ոչ պակաս օգտակար կլինեն նաև «անփորձ» դպրոցների առաջ քաշած խնդիրները, թվարկված դժվարությունները։

Chuk
28.07.2011, 12:32
Խորհրդաժողովի նյութերի (զեկուցումները) ժողովածուն կտեղադրենք «Հայկական կրթական միջավայր» պորտալում և լրացուցիչ կտեղեկացնենք բոլոր դպրոցներին։

Խոստումի համաձայն ստեղծվել է խորհրդաժողովի նյութերի ժողովածուն: Այդ մասին կարելի է կարդալ «Հայկական կրթական միջավայր» պորտալի նորություններ բաժնում (http://armedu.am/arm/official.php?sec=news&p=1&id=5614):

Ժողովածումն կարող եք բեռնել սեղմելով այստեղ: (http://armedu.am/arm/redirect.php?type=file&id=260)

manush
28.07.2011, 13:35
Խոստումի համաձայն ստեղծվել է խորհրդաժողովի նյութերի ժողովածուն: Այդ մասին կարելի է կարդալ «Հայկական կրթական միջավայր» պորտալի նորություններ բաժնում (http://armedu.am/arm/official.php?sec=news&p=1&id=5614):

Ժողովածուն կարող եք բեռնել սեղմելով այստեղ: (http://armedu.am/arm/redirect.php?type=file&id=260)

Հարգելի գործընկերներ, խորհրդաժողովի նյութերի ժողովածուն կազմեց Արտակ Հարությունյանը, մեր Chuk-ը։

Արտակ ջան, ժողովածուն շատ լավն է։ Եվ շրջագայումն է հարմար, և ձևավորվումն է ճաշակով, ...։

Կեցցե՛ս, հատուկ շնորհակալություն քեզ։

Գոհար Մուրադյան
14.09.2014, 18:05
Ես աշխատում եմ դպրոցում որպես օպերատոր: Ինքս շատ եմ կարևորում դպրոցական կայքերի դերը, շատ կցանկանայի, որ հանրապետության բոլոր դպրոցներն էլ ունենային կայքեր: Մեր դպրոցը կայք չունի, սակայն շատ կցանկանայինք ունենալ, ինչով կարող եք մեզ օգնել:
Կանխավ շնորհակալություն: