Chuk-ի խոսքերից
Հարգելի Մեսրոպ, ես կարող եմ հիմա անել նման բացականչություններ, օրինակ «Հրաշալի նախաձեռնություն է», կամ «Դուք արեք, թող չուզողն էլ ես լինեմ» ու բազում նման օրինակներ, հետո ձեռքերս ծալեմ ու նստեմ, կամ կարող եմ ուղղակի գրառում չանել այս թեմայում, բայց դրանից Դուք կշահե՞ք: Կարծում եմ, որ ոչ:
Էնտուզիազմով, առանց անձնական շահի ակնկալիքով գործ անելն ինձնից էլ հեռու չէ, վկան իմ ստեղծած ու բավական մեծ ճանաչում ունեցող, այսօր հայկական ինտերնետային դաշտում ամենաակտիվ akumb.am ֆորումը, և իմ համահեղինակած, շատերի համար շատ օգտակար գործիք hayeren.am կայքերը, որոնք առայսօր աշխատում են իմ ու ընկերներիս անձնական միջոցներով, շահույթ հետապնդող չեն, անգամ գովազդ դրանցում մինչև հիմա չի տեղադրվում, չնայած 5 տարի է «ինտերնետային եթերում» են:
Բայց էդ կայքերից և ոչ մեկն առայսօր չէր աշխատի, եթե ի սկզբանե համակողմանի քննարկված չլինեին հենց դժվարությունները: Ես Ձեզ կոչ եմ անում իմ գրառումները դիտարկել ոչ թե «չուզողի» համատեքստում, այլ հենց որպես Ձեր առաջարկի իրագործմանը հնարավոր օգուտ տվող: Հիշեցնեմ Ձեր ամենաառաջին գրառումը.
Ահա ուրեմն ես արձագանքում եմ այս հարցին, ենթադրելով, որ թեման ստեղծողը ոչ թե ուզում էր միայն դրական և իրեն իրականում ոչինչ չտվող բացականչություններ ստանալ, այլ նաև քննարկվեր այդ նախաձեռնության արդիականությունը, իմաստավորվածությունը ու հնարավորությունները, այդ թվում՝ հնարավոր դժվարությունները: Որովհետև դժվարությունն առաջին հերթին ոչ թե արգելք է, այլ խոչընդոտ, որը ճիշտ քաղաքականության դեպքում կարելի է հաղթահարել:
Հարգելի Մեսրոպ,
ես ինձ թույլ եմ տալիս «մեծամտորեն» ենթադրել, որ եթե Դուք հենց այսօրվանից չքննարկեք դժվարությունները, ապա Ձեր նախաձեռնությունն դատապարտված է տապալման:
Ասում եք, որ խաղեր ստեղծելը դժվարություն չի: Էդ ո՞նց դժվարություն չի: Էդ երբվանից է նորմալ ու լուրջ, անթերի խաղ ստեղծելը դարձել հեշտ ու պարզ բան: Չկա այդպիսի բան: Լավ խաղ ստեղծելը բարդ գործ է: Դեռևս pascal-ով, սրանից մոտ 10 տարի առաջ, ստեղծել եմ մի քանի խաղեր (ընդլայնված հնարավորություններով տետրիս, Հանոյան աշտարակ, օձ, աշակերտական թվաբանական խաղեր), որոնք իմ շրջապատում դարձել էին խիստ հայտնի, դրանից հետո ուսումնասիրել եմ, ոչ խորությամբ խաղերի տրամաբանությունն ու ստեղծման մեթոդները, այդ թվում բավական լավ ուսումնասիրել եմ գրաֆիկական openGL գրադարանների աշխատանքի սկզբունքը, կիրառել դրանք visual C++-ով ծրագրեր ստեղծելիս, ուսումնասիրել եմ խաղեր ստեղծելու ավտոմատացված ծրագրերը, ստանդարտ սցենարներն ու հնարավորությունները, ապա նաև flash տեխնոլոգիան ու ActionScript ծրագրավորման լեզուն՝ ընդհուպ մինչև 3-րդ տարբերակը: Ու անգամ այս ոչ խորացած գիտելիքներով, որովհետև ես համարում եմ, որ մակերեսային եմ ուսումնասիրել խաղային տեխնոլոգիաները, վստահ պնդում եմ. խաղ ստեղծելը մեղմ ասած խաղ ու պար չէ: Լուրջ ու գրավող, անթերի խաղ ստեղծելը՝ առավել ևս: Լուրջ շարժուն խաղ ստեղծելու համար նվազագույնը պետք է.
1. Ժամանակ
2. Աշխատանքային թիմ, այդ թվում նվազագույնը
2.1. Խաղի սցենարիստ
2.2. Պրոֆեսիոնալ նկարիչ (դիզայներ)
2.3. Ծրագրավորող
2.4. Թեստավորող
Սա ասում եմ, նվազագույնն է, որ անհրաժեշտ է լուրջ ու նորմալ խաղ ստեղծելու համար: Անգամ իմ առաջարկած տրամաբանական ոչ լուրջ խաղերը (հիշեցնեմ, որ ես առաջարկում էի վերցնել ինչ-որ ֆլեշ խաղեր ու ստեղծել դրանց հայերեն տարբերակները) նորից ժամանակատար ու աշխատատար են: Կրկնեմ, չեմ ասում անհնար է, ընդամենն ասում եմ, որ խաղ ու պար չէ, որոշակիորեն դժվար ու երկար պրոցես է: Մինչդեռ խաղերով սոցիալական ցանց ստեղծելու համար մեկ խաղը, նույնիսկ 5 խաղը թերևս բավարար չէ (եթե իհարկե խոսքը չի գնում օրինակ բարդ ստրատեգիա ստեղծելու մասին, որը ստեղծելու համար մեծ թիմ ու երկար ժամանակ է պետք):
Լավ, Դուք այսօր ասում եք, որ էդ ամեն ինչից չվախենանք, որ Դուք դա կանեք: Իսկ ինչքա՞ն կտևի Ձեր էնտուզիազմը՝ անշահախնդիր նման գործ անելու համար: Չէ՞ որ ասում էիք, որքան հիշում եմ, որ այս նախագիծը պետք է զերծ լինի գովազդներից ու նման բաներից:
Քանի՞ անգամ նվիրյալ ուսուցիչներն իրենց առանց այն էլ սուղ միջոցներից պետք է էնտուզիազմով նվիրատվություններ անեն՝ աշակերտների մրցանակների համար:
Ի՞նչ է, սրանք դժվարություններ չե՞ն: Սրանց մասին չպե՞տք է մտածե(ն)ք ու անհանգստանա(ն)ք:
Եթե չպետք է մտածենք, ապա հենց այս պահից ես ինքս իմ համար որոշում եմ. ցավոք Ձեր հրաշալի միտքը չի իրագործվելու:
Եթե ամեն դեպքում Ձեր նպատակն է այստեղ քննարկումներ անցկացնելը ու նաև դրանց միջոցով առավել իրատեսական դարձնել նախագիծը, ապա պատրաստ եմ շարունակել իմ մտահոգություններով ու առաջարկներով կիսվել, հակառակ դեպքում անիմաստ կհամարեմ ու այլևս չեմ անդրադառնա այս թեմային՝ կողքից նայելով, թե ինչպես եք իրագործում Ձեր նպատակը, իրագործելու ու կայացնելու դեպքում՝ ուրախանալով դրա համար:
Կներեք մաքսիմալ անկեղծությանս համար:
Մեջբերել
Էջանիշներ