Ո՞վ է մեղավոր,ո՞վ պետք է պատասխան տա

[Susanna37]

2011-2012 ուսումնական տարին մտել է իր իրավունքների մեջ, ավարտվում է սեպտեմբեր ամիսը, 12-րդ դասարանների աշակերտների համար առաջին կիսամյակն ու տարին միասին փակվում են դեկտեմբերին, այսինքն` ծրագրային նյութերի ուսուցումը ավարտվում է առաջին կիսամյակում: Բայց արի ու տես, որ մեր դպրոցի աշակերտները չունեն հայ գրականության և ֆիզիկայի դասագրքերը, իսկ հանրահաշվի դասագիրքը ընդհանուր և հումանիտար հոսքի փոխարեն տվել են բնագիտական հոսքի դասագիրք: Քաղաքապետարանի կրթության վարչության համապատասխան բաժնից մի 15 օր առաջ ասացին, որ տպարանում է, կբերեն՝ կտանք, հիմա ասում են մյուս դպրոցներին իրենց անհրաժեշտ քանակից շատ ենք տվել, կհավաքենք՝ կտանք /կարելի է մտածել, որ եթե չհավաքեն՝ չեն տա/: Իսկ աշակերտները սպասում են…
Ո՞վ է մեղավոր, ո՞վ պիտի պատասխան տա: Անշուշտ, աշակերտները...քննությունների ժամանակ:

[Susanna37]

Հանրապետության դպրոցներում սկզբունքորեն որեւէ դասագրքի պակաս չկա. կրթօջախները ստացել են իրենց հայտերին համապատասխան չափով դասագրքեր:Ինչպես «Արմենպրես»-ի հետ զրույցում ասաց Դասագրքերի շրջանառու հիմնադրամի փոխտնօրեն Գարեգին Գարեգինյանը, նմանատիպ խնդիր կա միայն ավագ դպրոցներում, քանի որ այնտեղ սեպտեմբերին են հայտնի դառնում` որքան դասագիրք է անհրաժեշտ: Գ. Գարեգինյանի խոսքով` հնարավոր են դասագրքերի ընդհանուր հաշվարկի 1-5-ի չափով շեղումներ. այս դեպքում մի դպրոցում «ավելացած» դասագրքերը տալիս են մյուսին:

Դասագրքերը, ըստ Գ. Գարեգինյանի, ձեռք են բերվում երկու ճանապարհով. մի մասը` պետբյուջեի միջոցներով (բացի ավագ դպրոցից), մնացածը` դպրոցների բանկային հաշվի գումարով. դրանց գնի մեկ քառորդը մուծում է աշակերտը: Դասագրքերի արժեքը հիմնականում 300-ից 500 դրամ է: Հիմնադրամի փոխտնօրենի խոսքով" կան համեմատաբար քիչ տպագրվող դասագրքեր, որը պայմանավորված է պահանջարկով. դրանք ավագ դպրոցի հումանիտար հոսքերում դասավանդվող, ինչպես նաեւ «Ֆիզիկա», «Քիմիա», «Կենսաբանություն» առարկաների դասագրքերն են: Համեմատության համար նշենք. եթե մյուս դասագրքերի տպաքանակը հասնում է 30-35 հազարի, ապա այս դասագրքերինը` 7 հազարի:

Դպրոցական դասագրքերի 5-ամյա գործածման սկզբունքը մինչ օրս պահպանվել է, թեեւ երբեմն տարբեր պատճառներով 5-ամյա ժամկետը 1-2 տարով երկարացվել է. այս դեպքում աշակերտները գումար չեն մուծում: Այս ուսումնական տարում տպագրվել են 5-րդ դասարանի «Մայրենի», «Մաթեմատիկա», 6-րդ դասարանի «Ինֆորմատիկա», 7-րդ դասարանի «Հայոց լեզու», «Գրականություն», «Հանրահաշիվ», «Երկրաչափություն» առարկաների նոր դասագրքեր: Գ. Գարեգինյանի խոսքով" 8-րդ դասարանի դասագիրք տպագրելու համար հաշվի է առնվում 5-8- րդ դասարանների աշակերտների առավելագույն քանակը` բոլոր աշակերտներին դասագրքերով ապահովելու համար:

Աշխատանքներ են տարվում հաջորդ ուսումնական տարում ծրագրերի բեռնաթափման ուղղությամբ: Ըստ հիմնադրամի տնօրենի` 5-ամյա «հնության» դասագրքերը նորով փոխարինելու համապատասխան որոշում կկայացվի, որից հետո կորոշվեն տպագրվելիք դասագրքերը:

ԱՐՄԵՆՊՐԵՍ


Հոկտեմբերի 1-ի դրությամբ Երևանի հ. 37 դպրոցի 12-րդ դասարանների 33 աշակերտներ չեն ստացել ֆիզիկայի և հայ գրականության դասագրքերը, այդ մասին դպրոցի ղեկավարությունը մի քանի անգամ արդեն ահազանգել է, բայց ապարդյուն: Իսկ այսօր հարգարժան պաշտոնյան ասում է, դասագրքերի պակաս հանրապետության դպրոցներում չկա: Սրան չգիտեմ՝ ինչ անուն կարելի է տալ: Եթե 133 չէ, ընդամենը 33 է, ուրեմն դա կարելի է նաև անտեսել: Չգիտեմ ով ինչպես, ես սա ասում եմ աչքակապություն և հավելում, որ սա եզակի դեպք չէ մեր կյանքում: