2010-2011 ուս. տարվա հանրակրթական ավագ դպրոցի դասագրքեր և ուսուցչի ձեռնարկներ

[Chuk]

Հարգելի ֆորումցիներ,
Ձեր քննարկմանն ենք ներկայացնում 2010-2011 ուս. տարվա հանրակրթական ավագ դպրոցի դասագրքերի և ուսուցչի ձեռնարկների «ձեռագրերը» (մրցույթի պայմանին համապատասխան դրանք ներկայացված են ամբողջ ծավալի 60 տոկոսի չափով):

Շուտով յուրաքանչյուր ձեռնարկի ու դասագրքի համար «Դասագրքեր և ուսումնաօժանդակ ձեռնարկներ» բաժնում կբացվեն առանձին թեմաներ, որոնց հղումները կներկայացնենք նաև այս թեմայում:

Խնդրում ենք մինչև ս.թ. հունիսի 15-ը ներկայացնել Ձեր առաջարկներն ու դիտողությունները, ակնկալում ենք Ձեր ակտիվ մասնակցությունը:

[Chuk]

Հարգելի ֆորումցիներ, արդեն բացվել են թեմաներ քննարկելու համար ֆրանսերենի, անգլերենի, գերմաներենի և քիմիայի 2010-2011 ուսումնական տարվա հանրակրթական ավագ դպրոցի դասագրքերի ու ուսուցչի ձեռնարկների «ձեռագրերը»: Այդ թեմաների հղումը կներկայացնեմ ստորև, բոլորիդ հրավիրելով ակտիվ քննարկումների: Իսկ մյուս առարկաների դասագրքերը կներկայացնենք կարճ ժամանակ անց:

• Անգլերենի դասագրքեր և ուսուցչի ձեռնարկներ
• Ֆրանսերենի դասագրքերն ու ուսուցչի ձեռնարկը
• Գերմաներենի դասագրքերն ու ուսուցչի ձեռնարկը
• Քիմիայի դասագրքերն ու ուսուցչի ձեռնարկը

[Chuk]

Բացվել են թեմաներ նաև նախնական զինվորակն պատրաստություն, ռուսաց լեզու, կենսաբանություն և աշխարհագրություն առարկաների համար.

• Նախնական զինվորական պատրաստության դասագրքերն ու ուսուցչի ձեռնարկը
• Ռուսաց լեզվի դասագրքերն ու ուսուցչի ձեռնարկը
• Կենսաբանության դասագրքերն ու ուսուցչի ձեռնարկը
• Աշխարհագրության դասագրքերը

Շուտով կավելացվեն նաև ֆիզիկայի և ինֆորմատիկայի դասագրքերն ու ուսուցչի ձեռնարկները:

[Chuk]

Տեղեկացնում եմ, որ բացվեցին թեմաներ նաև ֆիզիկայի ու ինֆորմատիկայի դասագրքերի ու ուսուցչի ձեռնարկների համար.

• Ինֆորմատիկայի դասագրքերն ու ուսուցչի ձեռնարկները
• Ֆիզիկայի դասագրեքրն ու ուսուցչի ձեռնարկը

[Արմինե Մ]

Երբ կներկայացվեն քննարկման ավագ դպրոցի հայոց լեզվի և գրականության նոր դասագրքերն ու ուսուցչի ձեռնարկները:

[Susanna55]

Հանրահաշիվ 10 և հանրահաշիվ 11 դասագրքերի էլեկտրոնային տարբերակը մենք դպրոցում ունեմք և այն ես ուսումնասիրել եմ , բայց Ձեզ մոտ այն չի տեղադրված և չի ընդգրկված չանցած դասագրքերի խմբում : Կուզենայի մանրամասներ իմանալ Հանրահաշիվ 11 դասգրքի մասին

[manush]

Երբ կներկայացվեն քննարկման ավագ դպրոցի հայոց լեզվի և գրականության նոր դասագրքերն ու ուսուցչի ձեռնարկները: Արմինե Մ

Հանրահաշիվ 10 և հանրահաշիվ 11 դասագրքերի էլեկտրոնային տարբերակը մենք դպրոցում ունեմք և այն ես ուսումնասիրել եմ , բայց Ձեզ մոտ այն չի տեղադրված և չի ընդգրկված չանցած դասագրքերի խմբում : Կուզենայի մանրամասներ իմանալ Հանրահաշիվ 11 դասգրքի մասին։ Susanna55

Հարգելի բարեկամներ, «Հայոց լեզու», «Հայ գրականություն», «Հանրահաշիվ եւ մաթեմատիկական անալիզի տարրեր», «Հայոց պատմություն», «Երկրաչափություն», «Համաշխարհային պատմություն» եւ «Հասարակագիտություն» առարկաների դասագրքերըի մրցույթը կազմակերպվել է անցյալ տարի՝ 2009-2010 ուստարվա համար։
Ֆորումում առաջարկվել է միայն այս տարվա մրցույթում հաղթած դասագրքերի («Ֆիզիկա», «Քիմիա», «Կենսաբանություն», «Ինֆորմատիկա», «Աշխարհագրություն», «Նախնական զինվորական պատրաստություն», «Ռուսաց լեզու», «Անգլերեն», «Ֆրանսերեն», «Գերմաներեն» առարկաների) «ձեռագրերի» քննարկումը՝ դրանց ծանոթանալու, դիտողություններ ու առաջարկություններ կատարելու համար։
Արդյունքում միայն ավագ դպրոցի հումանիտար հոսքի 4 անուն դասագիրք չի ընտրվել` ֆիզիկա, քիմիա, կենսաբանություն, ռուսաց լեզու։

[26 dproc]

Քանի որ խոսքը գնում է բնագիտական առարկաների մասին, ասեմ, որ ավագ դպրոցի հանրանաշվի դասագիրքը պետք է համալրվի առարկայական չափորոշիչային 3 մակարդակներն ապահովող վարժություններով, քիչ են հատկապես Ա և Գ մակարդակի վարժությունները:Դասագրքերի խնդիրների և վարժությունների պահանջները շատ են <<հեռացված>> ավարտական քննական թեստերի պահանջներից: 7-9-րդ դասարանների երկրաչափության դասագրքերը հաջող են կազմված, ավագ դպրոցի X դասարանի երկրաչափության դասագրքի խնդիրների մեջ գերակշռում են տրամաբանական հարցադրումներով վարժությունները, դա իհարկե լավ է, սակայն պետք է ավելանան նաև հաշվարկներ պարունակող խնդիրները:

[Petrosyan]

Եթե դժվարանում եք որևէ մեկին ավելի տպավորիչ կերպով ներկայացնել ,,խառնափնթոր,,, ,,խայտառակ,,, ,,այլանդակ,, և նմանատիպ էլի մի շարք բառերի իմաստը, ապա նրան ցույց տվեք ,,Հայոց պատմության,, դպրոցական դասագրքերը: Հատկապես ավագ դպրոցի այդ դասագրքերը, բացառությամբ առանձին մի քանի թեմաների, կարելի է անվանել ,,ազգային ամոթ,,:
Մի կողմ թողնելով գիտական օբյեկտիվության խնդիրը` նշենք առավել հիմնական թերությունները: Նյութը տրված է չափազանց խիտ տեսքով: Փաստահեղձության այդ հորձանքում պատկառելի է անէական, անկարևոր մասի կշիռը, այսինքն` փաստերի մի զգալի մասը տվյալ դեպքում հանդես է գալիս որպես ավելորդ ինֆորմացիա, որը ոչ միայն չի նպաստում որևէ օգտակար բանի, այլև մեծապես խանգարում է: Հազվադեպ կարելի է հանդիպել կապակցված շարադրանքի: Բացակայում են անհրաժեշտ բացատրություններն ու մեկնաբանությունները: Այդ դասագրքերի բնութագրական կարևոր հատկանիշներից են նաև լեզվա-ոճական անհարթություններն ու խրթնաբանությունները: Նկատվում են ավելորդ կրկնություններ: Բազմաթիվ են ներքին հակասությունները և այլն, և այլն:
Հանոզված եմ, որ անգամ հեղինակներն ու խմբագիրները չեն կարող այդ գրքերով սովորել հայոց պատմություն: Տպավորությունն այպիսինն է, որ այդ մարդիկ պատվեր են ստացել ստեղծելու այնպիսի դասագիրք, որը վերջնականապես կհիասթափեցնի ու կխրտնեցնի հայ աշակերտին:
Արդյոք այդ դոկտորներն ու թղթակից անդամները կարողանալու են պատասխան տալ այն բանի համար, որ ,,մեծ ավանդ,, են ունեցել ևս մի սերնդի ապազգայնացման և ուսումից հեռացնելու համար:

[ԺաննաՀ]

«ԹՈՂ ՀԻՆԳ ՈՒՍՈՒՑԻՉ ԷԼ ԴԺԳՈՀ ՄՆԱ»
Կրթության ազգային ինստիտուտը ա՞յս սկզբունքով է աշխատում

Դասագրքերի եւ օժանդակ ձեռնարկների մասին դժգոհությունները երբեք չեն դադարում: Դրա պատճառներից մեկն այն է, որ գրքերի մեծամասնությունը գրված է խրթին լեզվով, հաճախ դրանք զուրկ են տրամաբանությունից, չեն համապատասխանում դպրոցական ծրագրին, քանի որ դասագրքերն ընտրվում են «մաֆիայի» սկզբունքներով: Մշտապես մասնագետների նույն խումբն է գրում դասագիրքը, մրցույթին մասնակցում է հիմնականում միայն մեկ հեղինակային խումբ:
Ներկայումս ծնողական եւ ուսուցչական դժգոհության թիրախ է դարձել 5-6-րդ դասարանների համար նախատեսված՝ Ռիտա Խաչատրյանի 90-ականներից գործածվող «Մաթեմատիկայի ստուգողական աշխատանքների եւ թեստերի ժողովածուն»: «Առավոտը» պարբերաբար այս ձեռնարկի մասին դժգոհություններ է ստանում դպրոցների ուսուցիչներից ու ծնողներից: Մանկավարժների դժգոհությունները համընկնում են այն հարցում, որ այստեղ ընդգրկված են մատուցված նյութից դուրս առաջադրանքներ: Ներկայումս ՀՀ դպրոցների 5-6-րդ դասարաններում շրջանառության մեջ է դրված Բ. Նահապետյանի, Ա. Աբրահամյանի «Մաթեմատիկա» դասագիրքը: Օրինակ՝ ստուգողական աշխատանքների նշված ձեռնարկի 127-րդ էջում կա մի առաջադրանք, որտեղ աշակերտից պահանջվում է «ուղղի նկատմամբ կառուցել համաչափության կենտրոնը»: Ըստ ուսուցիչների՝ սա շփոթության մեջ է գցում երեխաներին, քանի որ դասագրքում նմանատիպ խնդիրների օրինակներ չկան, ուստի ուսուցիչը ստիպված է լրացուցիչ բացատրել այդ օրինակը աշակերտներին: Այսպիսի ծրագրային անհամապատասխանությունների պատճառով ծնողներն էլ են կրակն ընկնում:
«Առավոտի» հետ զրույցում թիվ 156 դպրոցի ծնող Նարինե Հակոբյանն ասաց, որ իրենց մաթեմատիկայի ուսուցիչներն այս դեպքերում աշակերտների «բերանով» ծնողներին հասկացնել են տալիս, թե պիտի իրենց մոտ մասնավոր պարապեն, որպեսզի ծրագրից դուրս առաջադրանքները հասկանան, ստուգողական աշխատանքների ժամանակ բարձր միավորներ ստանան: Ըստ ուսուցիչների՝ դասագրքում ընդգրկված չեն նաեւ հավանականությանը վերաբերող մի շարք խճճված խնդիրներ, որոնք կան Ռ. Խաչատրյանի ժողովածուում:
Կրթության ազգային ինստիտուտի (ԿԱԻ) բնագիտամաթեմատիկական առարկաների բաժնի մաթեմատիկայի մասնագետ Ռիտա Խաչատրյանը «Առավոտին» պարզաբանեց. «Սա օժանդակ ձեռնարկ է, որի նպատակն է ուսուցիչներին աջակցել: Ըստ չափորոշչի եւ ծրագրի, ձեռնարկի ստեղծման դեպքում դասագրքի հետ բացարձակ համապատասխանություն սկզբունքորեն չի դրվել: Բայց ես հնարավորինս փորձել եմ պահպանել համապատասխանությունը: Խնդիր է առաջացել այն պատճառով, որ փոխվել են որոշ պահանջներ: Օրինակ՝ այժմ ստուգողական բառը փոխարինվել է կիսամյակային գրավոր աշխատանքով, կրճատվել է նաեւ գրավորների քանակը: Մյուս կողմից էլ, նախընտրելի է, որ միջին դասարաններում հնարավորինս շատ գրավոր աշխատանքներ հանձնարարվեն աշակերտներին»: Դառնալով խնդրահարույց օրինակներին՝ տիկին Խաչատրյանը նշեց. «Կարող են լինել այդպիսի ինքնատիպ, տրամաբանական քայլերով առաջադրանքներ, որոնք սովորաբար գրավոր աշխատանքներում 5-րդ կետի տակ են դրվում եւ պարտադիր չէ, որ բոլոր աշակերտները դրանք լուծեն»: Մեր այն դիտարկմանը՝ ուսուցիչների դժգոհությունների պատճառն այն է, որ նման ձեռնարկներ կազմելիս իրենց կարծիքը հաշվի չի՞ առնվում, Ռ. Խաչատրյանը պատասխանեց. «Թող տասը ուսուցիչ էլ դժգոհ լինի, չէ՞ որ ունենք եւս հինգ հազարը: Մյուս կողմից էլ, եթե ուսուցիչները մեզ դրական աշխատանք են ներկայացնում, ընդունում ենք, մրցակցային դաշտն ազատ է: Ընդհանրապես մեր ժողովուրդը սկսել է ամեն ինչին կասկածել, չգիտեմ ինչն է պատճառը: Ես չեմ կարող հինգ հոգու կարծիքը հիմք ընդունել, եթե հազարավոր ուսուցիչներ գոհ են, ի վերջո՝ ուսուցիչները կարող են իրենք կազմել առաջադրանքներ, եթե դժգոհ են ձեռնարկից»:
20.11.2010թ.
ՏԱԹԵՎ ՀԱՐՈՒԹՅՈՒՆՅԱՆ
Աղբյուրը`http://www.aravot.am/am/articles/education/85869/view