Մինաս Ավետիսյանի վրձնին է պատկանում գրականագետ Նելլի Անանյանի երկու դիմանկար: Երկուսն էլ նկարիչը ստեղծել է կյանքի վերջին ամիսներին, որոնցից մեկը նվիրել է գրող Վախթանգ Անանյանի դստերը` Նելլի Անանյանին, մյուսը` մի անձնավորության. այդ նկարը ավելի ուշ հանգրվանել է Լոս Անջելեսում բնակվող Նավասարգյան ընտանիքում: Ալիս Նավասարգյանըՙ ծագումով իրանահայ, արվեստի, մշակույթի հանդեպ հետաքրքրություններ դրսեւորել է մշտապես, ինչը ավելի գործնական բնույթ է կրել հատկապես Մ. Նահանգներ տեղափոխվելուց հետո, որտեղ հեղինակել է երեք ստվար հատոր:
Մ. Նահանգներից նոր է վերադարձել հանրահայտ արվեստաբան Շահեն Խաչատրյանը եւ հերթական նվիրատվություն-նկարը բերել Հայաստան, այս անգամ` Մինաս Ավետիսյանի: Լոս Անջելեսում նա հանդիպել է Ալիս Նավասարգյանին, որի մոտ էր Մինասի «Նելլի Անանյանի դիմանկարը»:
«Դիմանկարը առինքնող է, գունային սքանչելի լուծմամբ, ներդաշն կատարելությամբ: Այդ նկարը առաջին անգամ Նավասարգյանների տանը տեսա 15 տարի առաջ, պատմում է Շ. Խաչատրյանը: Գարեգին Ա կաթողիկոսի առաջարկությամբ խմբագրական աշխատանքներով մասնակցեցի Ալիս Նավասարգյանի «Իրան-Հայաստան. Ոսկի կամուրջներ» գրքի (1997 թ.) հրատարակման աշխատանքներին: Գրքի արագ սպառումից ոգեւորվածՙ Ալիս Նավասարգյանը լույս ընծայեց եւս մեկ գիրքՙ վերաբերող նշանավոր հայ արվեստագետ կանանց գործունեությանը:
Վերջերս, երբ Լոս Անջելեսում էի, այցելեցի տիկին Ալիսին, նա աշխատում էր երրորդ գրքի վրաՙ նվիրված Իրանում ծնված եւ այդ երկրում ժամանակավոր ապրած ու ստեղծագործած բոլոր հայ արվեստագետներին: Գիրքը հարուստ է արժեքավոր փաստերով, հետաքրքրական մեկնաբանություններով, նոր, անհայտ լուսանկարներով: Երկու խոսքով իմ վերաբերմունքն էլ զետեղվեց գրքում:
Մի օր զրույց ունեցանք իր տանը գտնվող Մինասի «Նելլի Անանյանի դիմանկարի» շուրջը: Խոսքիս մեջ հիշատակեցի, որ անցյալ տարի անսպասելի հեռացավ գրականագետը: Զրույցի ավարտին նա ինձ անակնկալի բերեց: Մի պահ հեռացավ, ապա վերադարձավ նկարը ձեռքին: Ասաց, որ նվիրում է ինձՙ Սուրբ Էջմիածնի նորաստեղծ թանգարանում ցուցադրելու: 10 օր առաջ նկարը տեղ հասավ»:
Սուրբ Էջմիածնի թանգարանային հավաքածուն Շահեն Խաչատրյանի շնորհիվ հարստացավ եւս մեկ նվիրատվությամբ: Մեզ հետ զրույցում արվեստաբանը հավաստիացրեց, որ սփյուռքահայության նվիրատվությունները շարունակվում են: Սպասվում են նոր անակնկալներ:
Մեջբերել
Էջանիշներ