Քննական նորություններ

[Լիլիթ]

ՊԱՏԳԱՄԱՎՈՐՆԵՐԻՆ ԷԼ ԹԵՍՏԱՎՈՐԵՑԻՆ

Այս տարվա հայոց լեզվի ավարտական քննություններին մեր լեզուն կարծես իսկապես «ճկուն ու բարբարոս» լույսի տակ է ներկայացվել: Սա են վկայում այդ առնչությամբ չդադարող քննարկումները ինչպես մասնագիտական դաշտում, այնպես էլ դիմորդների, քննությունների հետ կապ չունեցող քաղաքացիների, լրագրողների, նաև արդեն՝ պատգամավորների շրջանում: Պարզվել է, որ մեր երկրի ընտրյալ պաշտոնյաները չեն հասկանում հարցարաններում ընդգրկված բառերի իմաստը: Այսպիսի հարցում է իրականացրել պատգամավորների շրջանում «Չորրորդ իշխանություն» թերթի լրագրողը և զետեղել նրանց պատասխանները թերթի 2010թ. հունիսի 9-ի համարում: Թեստի չափանիշներով պատգամավորները «չեն հանձնել» քննությունը:
Նքողնակ, գաղտակուր, պարտասուն, ընդահատ, ուրթ, որոմ, գուլ բառերը իմանալու վերաբերյալ մշակույթի նախարարը ասել է, որ գուցե հիմա ճիշտ է, որ այդ բառերն իմանան, քանի որ ցանկացած սերունդ իր լեզվամտածողությունն ունի և ուղարկել է մասնագետների մոտ՝ պարզաբանումներ ստանալու: Իսկ մասնագիտական աղբյուրներին արդեն դիմած Նաիրա Զոհրաբյանը նշել է, որ ստիպված է եղել բացել Հայկազյան բառարանը և համեմատել Է.Աղայանի բառարանի հետ` կատարելու համար սեփական համեմատական բառագիտական հետազոտությունը: Ըստ Վահան Հովհաննիսյանի` պարտասուն բառը նշանակում է պատասխանատվություն ունեցող անասուն, իսկ Լյովա Խաչատրյանը կատակում է, որ դա պարտքի տակ ընկած անասունն է: Սակայն ինչքան էլ, որ պաշտոնյաների տրամադրությունը բարձրացել է այդ բառերից, ամեն դեպքում լրագրողը փաստում է, որ «ամեն ինչ այդքան ծիծաղելի չէր լինի, եթե ամեն ինչ այսքան տխուր չլիներ»:
Իսկ թե իրականում ինչեր են կատարվում այդ թեստերը լրացնող 16-17-ամյա դիմորդների ներսում, պարզ չէ: Կամ արդյոք բարբարոս ասելով պոետը ինչ նկատի ուներ, դա էլ պարզ չէ: Արդյոք դա ստուգելու տարբերա՞կ էր սա:

ԳԱՅԱՆԵ ՄԱՐՏԻՐՈՍՅԱՆ
www.report.am

[Լիլիթ]

Ի դեպ, www.report.am-ում բավականաչափ մանրամասնորեն վերլուծության են ենթարկված այս տարվա հայոց լեզվի միասնական քննության թեստերը:

[Լիլիթ]

Ծանո՞թ եք հայոց լեզվի միասնական քննությունների թեստերին ու ի՞նչ կարծիք ունեք:

[Լիլիթ]

ԲԱՑ ՆԱՄԱԿ ՀՀ ՆԱԽԱԳԱՀԻՆ. ԱԿՆԿԱԼՈւՄ ԵՆՔ ՁԵՐ ՎՃՌԱՀԱՏՈւՄԸ (հզվդպ.)*

Հայաստանի Հանրապետության մեծարգո՛ նախագահ
Անտարակույս տեղյակ եք, թե ինչ է կատարվում այս տարվա «Հայոց լեզու» և «Գրականություն» առարկաներից ընդունելության միասնական քննություններում: Ավելորդ չենք համարում լրացուցիչ անգամ ասելու, որ հիշյալ քննությունն անցկացվում է խայտառակ սխալներ պարունակող թեստերով, իսկ աշխատանքները գնահատվում են կամայական չափանիշներով: Անտրամաբանական է, որ, օրինակ, որևէ ճիշտ պատասխան չպարունակող հարցին դիմորդը տա որևէ պատասխան, որը կարող է ճիշտ կամ սխալ համարվել:
Թեստերում սխալները, ինչպես ասացինք, բազմազան են ու բազմապիսի: Դա են վկայում նաև հայերենի մասնագետների՝ ուսուցիչների, գիտնականների, նաև հազարավոր դիմորդների և նրանց ծնողների բողոքները: Միակ ելքը ստեղծված իրավիճակից, թերևս, վերաքննության կազմակերպումն է կամ այս քննությունից ստացած գնահատականը մրցույթի մեջ չներառելը: Ինչ վերաբերում է առաջին հայտով հայկական բանասիրական ֆակուլտետների դիմորդներին, ապա նրանց գիտելիքները մասնագիտական առարկաներից կարելի է ստուգել առանձին քննությամբ:
Հույս ունենք, որ Դուք, նաև ի պաշտոնե, ամենաշահագրգիռ անձն եք Հայաստանում՝ նման խայտառակություն թույլ չտալու համար: Հետևաբար, հենց ձեզնից ենք ակնկալում արդար վճռահատում՝ հիմնված հայոց լեզվի և գրականության ճանաչված մասնագետների կարծիքի վրա:

Խորին շնորհակալությամբ
ԷԴԻԿ ԱՆԴՐԵԱՍՅԱՆ

(*) Ժամանակակից հայոց լեզվի բացատրական բառարան, Հայկական ՍՍՀ գիտությունների ակադեմիայի հրատարակչություն, Երևան 1980, Հատոր 4-րդ: (Վճռահատել-1.Որոշում կայացնել (հզվդպ), 2.Վճիռ կայացնել (իրավաբանական):

www.report.am

[manush]

Ծանո՞թ եք հայոց լեզվի միասնական քննությունների թեստերին ու ի՞նչ կարծիք ունեք:

Ծանոթ եմ, Լիլիթ ջան, քանի որ քրոջս աղջիկն էլ է դիմորդ։ Նրա թեստը երկրորդն էր։ 15 միավոր է ստացել միասնականի քննությունից, չնայած մենք վստահ էինք, որ ավելի բարձր միավորի գիտելիք ունի։
Հիմնականում հետևում եմ ԶԼՄ–ներում հնչած և կազմակերպված կարծիքներին ու քննարկումներին։
Ես հայոց լեզվի ու գրականության մասնագետ չեմ և թեստերում առկա սխալներին չեմ անդրադառնա։ Բայց հենց առաջին տպավորությունը, որ ստացա թեստերի հարցերը կարդալով այն էր, որ ձևակերպումները կազմված են դիմորդներին շփոթեցնելու միտումով, որ ոչ թե գիտելիքն է ստուգվում, այլ հնարագիտությունը։

[Լիլիթ]

Ու ամենացավալին գիտե՞ք որն է, որ թվում է` իրենք չեն էլ ուզում դիմորդի գիտելիքների ստուգում անցկացնել, այլ պարզապես թերևս ուզում են համոզվել` տեսնես կա՞ն երեխաներ, ովքեր առավելագույն` 20 միավոր կստանան 20-ից ավելի սխալ, խոտանված, 2 պատասխանով կամ ընդհանրապես պատասխան չունեցող հարցեր պարունակող թեստը լրացնելիս (սա որպես մասնագետ եմ ասում, քանզի երբ ծանոթացա թեստերին, ապշել էի, թե ինչպե՞ս կարող են նման թերություններ պարունակող թեստերը համարվել քննական): Իսկ ամենազավեշտականն այն է, որ, փաստորեն, 2 երեխա կա` 20 միավոր ստացած: Ծիծաղելի է, չէ՞

[Արմեն]

Ծանո՞թ եք հայոց լեզվի միասնական քննությունների թեստերին ու ի՞նչ կարծիք ունեք:

Ֆորումի հարգելի մասնակիցներ, թանկագին հյուրեր։
Հայոց լեզվի քննությունների թեստերին ծանոթ եմ այնքանով, որ քննության օրը, հետաքրքրասիրությունից դրդված որոշեցի ինքս լրացնել թեստը։ Մոտ 45 րոպեի ընթացքում 80 հարցի պատասխանելուց հետո (մի քանի հարցի պատասխանել եմ «արծիվ թե գիր» մեթոդով, մի քանի հարցի էլ, որոնք ինձ ձանձրալի թվացին՝ ուղղակի չպատասխանեցի) «ստացա» 17-17.5 միավոր։ Մանուշի հետ համաձայն եմ՝ երբեմն ստուգվում էր հնարագիտությունը, բայց չեմ ընդունում այն տարածված կարծիքները, թե դիմորդը որտեղի՞ց կամ ինչո՞ւ պետք է իմանար թե «Անլռելի զանգակատան» ո՞ր ղողանջից է տրված հատվածը և այլն։ Ինչ վերաբերվում է հարցերի դժվար լինելուն, կարծում եմ, որ դա ճիշտ է. մենք սովորել ենք, որ ընդունելության քննություններին դիմորդները պետք է «20» միավորներ ստանան։ Ինչո՞ւ։ Պարտադիր չէ։ Թող հարցերը իրոք դժվար լինեն և առավելագույն միավորներ ստանան իսկապես արժանիները։ Դա շատ լավ դաս կլինի հաջորդ տարվա դիմորդների համար և նրանք չեն բավարարվի միայն գրականության քրեստոմատիայով և «Օդնոկլասնիկներում» գյուղատնտեսական ֆերմա աշխատացնելու փոխարեն ծայրից ծայր կկարդան, ասենք, «Սասունցի Դավիթ» էպոսը կամ նույն «Անլռելի զանգակատունը»։
Այժմ անցնեմ «մեդալի մյուս կողմին»։ Անընդունելի է այն, որ որոշ հարցեր կարող են ճիշտ պատասխան չպարունակել կամ ընդհանրապես սխալ կազմված լինել։
Ես առիթ եմ ունեցել 2000-2003 թթ. աշխատել առարկայական հանձնաժողովի հետ, տեսել եմ, թե ինչպես է 7-10 բարձրակարգ մասնագետներից կազմված խումբը հատ–հատ լուծում տոմսերում ներառվող խնդիրները, բացառում շտեմարաններում տեղ գտած մի քանի պատասխան ունեցող հարցերի ընդգրկումը և որպես աշխատանքի արդյունք՝ հանգիստ, հնարավորինս քիչ բողոքներով ու բողոքարկումներով անցկացնում քննությունները։

Հ.Գ. Ցանկանում եմ մի միտք էլ ավելացնել։ 1997 թվականից դասավանդում եմ տարբեր բուհերում։ Առաջին պահից, երբ պահանջ առաջացավ ուսանողների քննությունները կազմակերպել թեստային համակարգով՝ ես համաձայն չեմ եղել, ասելով (և հիմա էլ համոզված եմ), որ թեստը գիտելիք ստուգելու լավագույն միջոցը չէ։

[Իրինա]

Դուք իրավացի եք: Ավարտական դասարաններում թեստով գիտելիքների քննումը բերելու է ուսման նկատմամբ համահայկական անտարբերության: Աշակերտն առանց թեստը կարդալու , միավոր է ,,հավաքում,, կա'մ ,, արծիվ թե գիր ,, մեթոդով կա'մ էլ կողքի ընկերոջից միայն պատասխանը իմանալով: Ամեն տարի ավելի ու ավելի է մշակվում իրարից պատասխան իմանալու նոր ու նոր ձևերը: Այսօրվա շրջանավարտի ձեռք բերված փորձով հաջորդ տարվա շրջանավարտը էլ դաս չի սովորելու: Ինչու սովորի, եթե քննությունը հանձնելու է առանց թեստը կարդալու և բավականին բարձր գնահատականներով: Քանի ուշ չէ հարկավոր է վերջ տալ այսպիսի քննություններին:

[Անահիտ19դպրոց]

Այս տարվա հայոց լեզվի և գրականության միասնական քննությունները դիմորդներին և ծնողներին շատ հիասթափեցրեցին: Իրոք ստացվում է, որ այն աշակերտները, որոնք 2 և ավելի տարի քրտնաջան պարապել են ավելի քիչ միավոր հավաքեցին, քան մյուսները: Ինչ է սովորեցնում են ծնողների դիմել այդ երկրորդ քայլին ի օգուտ իրենց, թե իրենց կարծիքով գերազանց գիտելիք են ապահովում: Նույնիսկ զարմանալի էր այն, որ այդքան սխալի մեջ 20 միավոր էլ էր եղել:

[Արեգ]

Միավորները ավելացրին
| Հունիս 21, 2010 |

Գնահատման եւ թեստավորման կենտրոնը որոշակի միավորներ է ավելացրել մաթեմատիկա առարկայից միասնական քննությունների արդյունքներում:

ԳԹԿ մամուլի քարտուղար Գայանե Մանուկյանը «Ա1+»-ին ասաց, որ մաթեմատիկայի թեստերի 4-րդ տարբերակի 28 առաջադրանքում տեխնիկական վրիպակ է եղել, դրա համար որոշվել է 0,25 միավոր ավելացնել:

Բացի այդ, մնացած 1-4 տարբերակների 2-րդ առաջադրանքներում, ինչպես նաեւ 37-40-ում եւս ավելացվել է 0,25-ական միավոր:
Հիշեցնենք, որ մաթեմատիկայի քննությունը տեղի է ունեցել հունիսի 15-ին:

Աղբյուր` «Ա1+»