PDA

Դիտել ողջ տարբերակը : Ինֆորմատիկայի դասագրքեր, 2011-2012 ուս. տարի



Chuk
27.01.2011, 13:07
Հարգելի ֆորումցիներ,
2009-2010 թթ.-ին մրցույթում հաղթած, 2011-2012 ուս. տարվա համար նախատեսված Ինֆորմատիկայի ընդհանուր և հումանիտար հոսքի 11-րդ դասարանի դասագրքի նախագիծը կարող եք գտնել «Կրթական համալիր էջ» պորտալի «Պաշարների կատալոգում». http://armedu.am/arm/materials.php?sec=library&cat_id=1729

Ինֆորմատիկա, 11-րդ դասարան, ընդհանուր և հումանիտար հոսք (http://armedu.am/arm/materials.php?sec=library&id=2238)
Ինֆորմատիկա, 11-րդ դասարան, բնագիտամաթեմատիկական հոսք (http://armedu.am/arm/materials.php?sec=library&id=2260)



Խնդրում ենք մինչև ս.թ. ապրիլի 30-ը ուսումնասիրել այդ դասագիրքն ու ներկայացնել Ձեր առաջարկներն ու դիտողությունները: Ձեր ակտիվ մասնակցությունը կարող է օգնել դասագրքի բարելավմանը:

Զառա
29.01.2011, 11:25
Ընդհանուր ուսումնասիրելուց կարող եմ ասել հետևյալը` ողջունելին այն է, որ ընդհանուր և հումանիտար հոսքի ծրագրում ծրագրավորում չի նախատեսված: Սլայդների պատրաստումն ու հրատարակչական ծրագրերն ավելի անհրաժեշտ են այս հոսքում ընդգրկված աշակերտների համար: Բայց երկրորդ բաժնում(Հեառահաղորդակցման տեխնոլոգիաներ) արժե? արդյոք անցնել HTML լեզու: Կարծում եմ HTML-ն ավելի հարմար է ուսումնասիրել բնագիտական հոսքում: Այս հոսքում ինտերնետային էջեր պատրաստելու համար ավելի լավ կյլինի աշակերտներին սովորեցնել ՎԵԲ ԿԱՅՔԵՐԻ ՊԱՏՐԱՍՏՄԱՆ ՀԱՄԱՐ նախատեսված որևէ խմբագրիչ` ասենք DREMVIVER ծրագիրը:

Chuk
30.01.2011, 01:23
Ընդհանուր ուսումնասիրելուց կարող եմ ասել հետևյալը` ողջունելին այն է, որ ընդհանուր և հումանիտար հոսքի ծրագրում ծրագրավորում չի նախատեսված: Սլայդների պատրաստումն ու հրատարակչական ծրագրերն ավելի անհրաժեշտ են այս հոսքում ընդգրկված աշակերտների համար: Բայց երկրորդ բաժնում(Հեառահաղորդակցման տեխնոլոգիաներ) արժե? արդյոք անցնել HTML լեզու: Կարծում եմ HTML-ն ավելի հարմար է ուսումնասիրել բնագիտական հոսքում: Այս հոսքում ինտերնետային էջեր պատրաստելու համար ավելի լավ կյլինի աշակերտներին սովորեցնել ՎԵԲ ԿԱՅՔԵՐԻ ՊԱՏՐԱՍՏՄԱՆ ՀԱՄԱՐ նախատեսված որևէ խմբագրիչ` ասենք DREMVIVER ծրագիրը:

Գիրքը դեռևս չեմ ուսումնասիրել, բայց պատրաստվում եմ մանրամասն նայել: Այս մեկնաբանության համար ասեմ, որ համաձայն չեմ: HTML լեզվի բազային գիտելիքները բավական պարզ են, դրանք ունակ են յուրացնել բոլորը՝ թե հումանիտար հոսքի աշակերտները, թե բնագիտական: Եթե իհարկե նյութը ճիշտ մատուցվի: Իսկ միայն խմբագրիչներ սովորեցնելը սխալ եմ համարում, ավելի լավ է ոչինչ չսովորեցնեն, քան միայն խմբագրիչներ՝ առանց լեզվի բազային գիտելիքները տալու:

Ruben
30.01.2011, 13:41
Ափսոսում եմ, որ ծրագրավորում չգիտեմ / Ինֆորմատիկ չեմ / : Ես էլ եմ գտնում, որ առանց բազային գիտելիքների շատ դժվար կլինի նույնիսկ օպերատորի, համակարգիչ օգտագործողի համար…

Զառա
30.01.2011, 17:06
Գիրքը դեռևս չեմ ուսումնասիրել, բայց պատրաստվում եմ մանրամասն նայել: Այս մեկնաբանության համար ասեմ, որ համաձայն չեմ: HTML լեզվի բազային գիտելիքները բավական պարզ են, դրանք ունակ են յուրացնել բոլորը՝ թե հումանիտար հոսքի աշակերտները, թե բնագիտական: Եթե իհարկե նյութը ճիշտ մատուցվի: Իսկ միայն խմբագրիչներ սովորեցնելը սխալ եմ համարում, ավելի լավ է ոչինչ չսովորեցնեն, քան միայն խմբագրիչներ՝ առանց լեզվի բազային գիտելիքները տալու:


HTML լեզու հին ծրագրով էլ էին անցնում, բավականին ծանոթ եմ աշակերտների մոտեցումներին : Թող դասավանդողներն ասեն, արդյոք աշակերտները յուրացնում էին այդ լեզվի տարրերը... Քանիսն են կարողացել էջեր պատրաստել:Ծրագրավորում էլ էին անցնում, դասարանում քանիսն էին կարողանում նորմալ խնդրի ծրագիր ինքնուրույն կազմել: Եկենք ասենք առանց ծրագրավորման ինչ խմբագիչների մասին է խոսքը: Շարունակենք բոլոր հոսքերում անցնել.... Էլ ինչ ինֆորմատիկա առարկա, որտեղ ծրագրավորում չեն անցնում...
Ֆիզմաթ հոսքում` խնդիրը լրիվ ուրիշ է: Կարծում եմ այստեղ իսկապես անհրաժեշտ է մատուցել բազային գիտելիքներ` HTML անցնել ավելի խորությամբ, գուցե աշակերտն արդեն ինքնուրույն էլ կսովորի խմբագրիչներից օգտվել: Այստեղ գտնում եմ նաև շատ կարևոր է ծրագրավորման դերը: Ավելի լավ է աշակերը խորացված ծրագրավորում անցնի, քան ասենք հրատարակչական ծրագիր:
Ես ինքս վերապատրաստող եմ եղել տարիներ շարունակ, առանց HTML լեզվի բազային գիտելիքների` խմբագիչներով մեր օպերատորները կարողացել են գոնե պարզագույն էջեր պատրաստել:
Բազային գիտելիքներից որ խոսենք, ուրեմն աշակերտը ոչ մի խմբագրիչ չպիտի անցնի....
Ասեմ նաև, որ ես էլ դեռ խորությամբ չեմ ուսումնասիրել գիրքը...
Ոչ մասնագիտական բաժիններում սովորող ուսանողին ինֆորմատիկայից այսօր ավելի շատ անհրաժեշտ են ոչ այնքան բազային գիտելիքներ, որքան կիրառական ծրագրերի տիրապետում....

Chuk
30.01.2011, 17:25
Ես ինքս վերապատրաստող եմ եղել տարիներ շարունակ, առանց HTML լեզվի բազային գիտելիքների` խմբագիչներով մեր օպերատորները կարողացել են գոնե պարզագույն էջեր պատրաստել:

Դե սա էլ մեր դժբախտություններից մեկն է: Հանգիստ կարող եմ ասել, որ նման էջերի մեծագույն մասը արդյունքում ստացվում են անգրագետ, վատ, ու արդյունքում մինչև հիմա էլ հայկական ցանցում կան բազում «ախմախ» կայքեր: Ես բոլորովին պարտադիր չեմ համարում, որ հումանիտար հոսքում HTML լեզու անցնեն: Թող չանցնեն: Ի վերջո դա կոնկրետ ոլորտ է, բազային չէ, որն անհրաժեշտ է իմանալ: Բայց էդ դեպքում պետք չէ նաև dreamweaver կամ այլ HTML խմբագրիչ անցնել: Ոչ մեկին պետք չէ, իրականում, օգտագործել նույն Dreamweaver-ը, եթե ինքը չունի HTML-ի գոնե բազային գիտելիքներ: Ստացված էջերը որպես կանոն դառնում են խայտառակություն: Եթե մարդուն պետք է սովորեցնել վեբ կայք, վեբ էջ պատրաստել, ապա պետք է սկսել դրա բազայինից: Եթե պետք չէ, ուրեմն ոչինչ էլ պետք չի սովորեցնել:

Զառա
30.01.2011, 17:30
Ես լրիվ Ձեզ հետ համաձայն եմ: Դրա համար պարզապես պիտի լինեն համապատասխան մակարդակի ուսանողներ, և իհարկե բավականին ժամանակ տրամադրեն սովորելու համար: Երևի Դուք ինքներդ լավ գիտեք դպրոցների մեծ մասում օպերատորները ինչ մասնագետներ են, և վերապատրաստումների համար մեր կազմակերպություններն ինչքան ժամանակ են հատկացրել` մոտ մեկ շաբաթ: Բազային գիտելիքներ հաղորդելու համար բավականին շատ է.... Կներեք որ մեր նման վերապատրաստողները խայտառակությամբ են լցրել ամբողջ ինտերնետը: Լավ կլիներ այս մասին մտածել և սկսել նոր վերապատրաստումների կատարյալ ծրագիր...

Զառա
30.01.2011, 18:05
Միգուցե պետք չի դասագրքերի մասին բացասական կարծիք հայտնել?.....Ուրեմն ամեն ինչ կատարյալ է....

Chuk
30.01.2011, 18:12
Միգուցե պետք չի դասագրքերի մասին բացասական կարծիք հայտնել?.....Ուրեմն ամեն ինչ կատարյալ է....

Այս գրառումն իմ արձագանքի հետ կա՞պ ուներ: Եթե այո, ապա ասեմ, որ ես կարծում եմ, որ որքան շատ տեղին քննադատություն հնչի, այնքան լավ: Բայց կոնկրետ Ձեր դիտարկման հետ համաձայն չէի ու բարձրաձայնեցի: Նաև նշեմ, որ իմ դիտողությունը ուղղված չէր դպրոցական օպերատորներին կամ վերապատրաստողներին, այլ բոլոր այն մարդկանց, ովքեր բազային գիտելքիներ չունենալով կայքեր են պատրաստում:

Chuk
30.01.2011, 18:33
Ի դեպ հենց նոր որոշեցի բացել դասագիրքը:
Առայժմ միայն ներածությունն եմ կարդացել: Մեջբերում եմ.

Կարծում ենք, որ ձեզ շատ կհետաքրքրի ուսումնասիրել HTML-ծրագիրը, որի օգնությամբ կարող եք ինտերնետային կայքեր ստեղծել:
HTML-ը ծրագիր չի: Այն ձևաչափման լեզու է: Ու նման ձևակերպմամբ աշակերտներին սովորեցնելը դառնում է ակամա սխալ բան սովորեցնել:

Մեկ այլ մեջբերում նույն ներածությունից.

Իսկ մի՞թե հետաքրքիր չէ իմանալ, թե ինչպես են ստեղծվել ձեր դասագրքերը. չէ՞ որ սովորական տեքստային խմբագրիչով դասագիրք ստեղծելիս բազմաթիվ խնդիրներ կառաջանային: Դասագրքում ձեզ հնարավորություն է ընձեռվում ծանոթանալու Adobe PageMaker-ը հրատարակչական առաջատար համակարգի հետ:
Մի կողմ թողնենք, որ անհասկանալի է, թե ինչու՞ պետք է աշակերտները սովորեն խիստ նեղ մասնագիտական ծրագրեր: Անդրադառնամ Adobe PageMaker ծրագրին: Այս ծրագիրը վաղուց իր դիրքերը զիջել է: Զիջել է այնքան, որ նույն Adobe-ի հայտնի կազմակերպությունն արդեն այն չի մշակում, փոխարենը առաջարկում է այլ, շատ ավելի պրոֆեսիոնալ ու հարմար ծրագիր. Adobe InDesign: Ոլորտում առաջատարներն են համարվում այդ նույն Adobe InDesign ու QuarkXPress ծրագրերը: PageMaker կիրառողները աստիճանաբար պակասում են: Այն դառնում է դժվար գտնվող ու ոչ կիրառական ծրագիր:

Ruben
30.01.2011, 22:56
Հարգելի Արտակ, այդ դեպքում մեր դպրոցի վիճակն ինչպես կլինի, երբ դասագիրք գրել են հանձնարարում այն մարդուն կամ մարդկանց, որոնք համապատասխան բնագավառների զարգացումներին ծանոթ չեն: Իմ կարծիքով Հայաստանում կան մարդիկ, որոնք այդ գործը ավելի բարձր մակարդակով կանեին: Հետո էլ եթե չկան, թող օգտվեն թարգմանություններից, ինչ է ամոթ է:

Գագիկ
31.01.2011, 00:02
Մեջբերում դասագիքից.


դուք ծանոթանալու եք ինֆորմացիայի ցուցադրման Microsoft PowerPoint
ծրագրի աշխատանքին, որի արդյունքում կկարողանաք սլայդներ ստեղծել ու դրանք
ցուցադրել

Ես ինֆորմատիկայի մասնագետ չեմ, բայց կարծում եմ, որ գոնե այն դասագիրքը, որը պատրաստվում է երեխաներին PowerPoint սովորեցնել իրեն կից այդ ծրագրով պատրաստված պրեզանտացիաներ պիտի ունենա, հենց այդ դասագրքի թեմաներով: Ու հենց այդ պրեզենտացիաներով էլ կարող էին երեխաներին ցույց տալ PowerPoint-ի օգտակարությունն ու հնարավորությունները:

Արտակի դիտողությունների հետ էլ համաձայն եմ: Իմ ունեցած ինֆորմացիան էլ է ասում, որ ավելի հաճախ օգտվում են QuarkXPress ծրագրից:

Զառա
31.01.2011, 10:36
Դասագրքում առաջին հերթին թեմաները եթե լավ բացատրված լինեն, դժվար չի լինի համապատասխան թեմաների վերաբերյալ պրեզենտացիաներ պատրաստել: Իսկ լավագույն պրեզենտացիաներ անհրաժեշտության դեպքում դժվար չի ինտերնետից գտնելը, օրինակ` ընկ. Աղեկյան, կարող են օգտվել Ձեր էջում տեղադրված պրեզենտացիաներից:

Ընդհանրապես վատ չէր լինի ուսուցչի ձեռնարկում էլ ունենալ թեմաներին համապատասխան լիքը տեստային առաջադրանքներ...

Գագիկ
31.01.2011, 11:53
Ես, իհարկե, կողմ եմ, որ դասագրքում նյութը լավ բացատրված լինի, բայց տվյալ դասագրքի համար շատ բնական եմ համարում, որ ունենար իրեն կից պրեզենտացիաներ, որոնցում ներկայացված կլիներ դասագրքի ամբողջ նյութը և մի քանի պրեզենտացիա էլ տարբեր առարկաների ինչ-որ թեմաներով: Ինչպես արդեն գրել եմ` նախ դա գործնականում ցույց կտար PowerPoint-ի օգտակարությունն ու հնարավորությունները , հետո էլ լավ օգնություն կլիներ ինֆորմատիկայի ուցուցիչներին` դասերը հետաքրքիր անցկացնելու համար: Բացի այդ, փոխանակ տեսականորեն երեխաներին ասելու, որ այս հնարավորությունը կարող է օգտագործվել ինչ-որ նյութ լսարանին մատուցելու համար` դաս, կուրսային, դիպլոմային և այլ աշխատանքներ, հենց իրենք գործնական կիրառման օրինակ կներկայացնեին: Չէ, որ պետք է ենթադրել, որ իրենք այդ գործի լավագույն մասնագետներն են, ու եթե իրենք այդ հնարավորությունը չեն օգտագործում էլ ոնց կարող են դա ուրիշներին հրամցնել:

Զառա
31.01.2011, 12:08
Երևի սխալվում եմ, բայց դպրոցներում ամենից շատ որ ցուցադրվում են ու մատուցվում համակարգչով` պրեզենտացիաներ են` ինտերնետից վերցրած ու առարկայական ուսուցիչների կողմից պատրաստված: Ինտերնետի առկայության դեպքում լիքը հետաքրքիր պրեզենտացիաներ կան, որոնք պարզապես պիտի թարգմանել ու մատուցել աշակերտին տարբեր առարկաների ժամերին: Հումանիտար հոսքում ավելի հարմար կլինի
''Հեառահաղորդակցման տեխնոլոգիաներ" բաժնում աշակերտը նախատեսված HTML լեզվի փոխարեն նման աշխատանքով զբաղվի: Կամ HTML- ին նախատեսված ժամաքանակը կարել է տրամադրել ասենք ,,Բլոգներ, կամ ցանցային օրագրեր,, թեմային..

gayane0803
31.01.2011, 18:37
Հարգելի Արտակ եթե միայն ներածությունը կարդալով այդքան թերություններ եք նկատել, ինչքան կնկատեք լրիվ ընթերցելուց հետո... Ես դեռ չեմ ուսումնասիրել, հետո անպայման կգրեմ կարծիքս:

Արեգ
01.02.2011, 11:06
Հարգելի ֆորումցիներ,
2009-2010 թթ.-ին մրցույթում հաղթած, 2011-2012 ուս. տարվա համար նախատեսված Ինֆորմատիկայի ընդհանուր և հումանիտար հոսքի 11-րդ դասարանի դասագրքի նախագիծը կարող եք գտնել «Կրթական համալիր էջ» պորտալի «Պաշարների կատալոգում». http://armedu.am/arm/materials.php?sec=library&cat_id=1729

Ինֆորմատիկա, 11-րդ դասարան ընդհանուր և հումանիտար հոսք (http://armedu.am/arm/materials.php?sec=library&id=2238)



Խնդրում ենք մինչև ս.թ. ապրիլի 30-ը ուսումնասիրել այդ դասագիրքն ու ներկայացնել Ձեր առաջարկներն ու դիտողությունները: Ձեր ակտիվ մասնակցությունը կարող է օգնել դասագրքի բարելավմանը:

Հարգելի ֆորումցիներ, ինչպես տեսնում ենք, դասագիրքը կազմված է երեք բաժնից: PowerPoint, HTML և Page Maker:
PowerPoint-ը հրաշալի ծրագիր է և ուսանելի:
HTML-ը լավ է, որ ընդգրկել են, շատ խնդիրներ կլուծվեն այդ լեզվի գրագիտությունով: Ես համաձայն եմ Արտակ ջան քեզ հետ, որ կան դպրոցական ահավոր վատ, անգրագետ կայքեր:
Իսկ ինչ վերաբերվում է Page Maker-ին, զարմանում եմ, թե որտեղից են այդ մեռած ծրագիրը գտել ու դասագիքի մեջ ընդգրկել: Խայտառակություն է:
Եթե մեր խոսքը լսող է լինելու (որին խիստ կասկածում եմ) եկենք առաջարկենք հանել այդ ծրագիրը:
Ոչ մի բոուհ ապագա Ինֆորմատիկայի ուսուցչին այդ ծրագիրը չի սովորեցնում: Իսկ ուսուցիչը եթե չգիտի սովորեցնելու նյութը, ուրեմն խոտան կտա:
Այս դեպքում խիստ անհրաժեշտ են վերապատրաստումները:

Զառա
01.02.2011, 11:22
HTML-ը լավ է, որ ընդգրկել են, շատ խնդիրներ կլուծվեն այդ լեզվի գրագիտությունով: Ես համաձայն եմ Արտակ ջան քեզ հետ, որ կան դպրոցական ահավոր վատ, անգրագետ կայքեր:

Արեգ ջան, հումանիտար հոսքում հետաքրքիր է ինչ խնդիրներ կլուծվեն HTML լեզուն անցնելով`ընդամենը մի քանի ժամով: Համաձայն եմ, եթե իսկապես մեր նպատակն է լինելու աշակերտներին պատրաստելու լավագույն էջեր ստեղծելու համար` թող ծրագրում այդ լեզվին հատկացվի գոնե 10 -12 ժամ: Դրանից հետո էլ` վեբ/դիզայների համար անհրաժեշտ բոլոր ծրագրերը: Անգրագետ կայքեր չունենալու համար ստիպված պիտի շատ բան փոխել` առնվազն սկսել ոչ թե մի քանի օրով վերապատրաստումներ, այլ խորացված ու բազային հիմքից սկսած...Որը կտևի ամիսներ:
Հանաձայն չեմ նաև այն մտքին, որ պարտադիր պիտի անցնել այն ծրագրերը, որոնք ուսուցիչը անցել է բուհում: Բոլորս էլ գիտենք կիրառական ծրագրերը որքան արագ են կատարելագործվում...

Արեգ
01.02.2011, 11:58
Արեգ ջան, հումանիտար հոսքում հետաքրքիր է ինչ խնդիրներ կլուծվեն HTML լեզուն անցնելով`ընդամենը մի քանի ժամով: Համաձայն եմ, եթե իսկապես մեր նպատակն է լինելու աշակերտներին պատրաստելու լավագույն էջեր ստեղծելու համար` թող ծրագրում այդ լեզվին հատկացվի գոնե 10 -12 ժամ: Դրանից հետո էլ` վեբ/դիզայների համար անհրաժեշտ բոլոր ծրագրերը: Անգրագետ կայքեր չունենալու համար ստիպված պիտի շատ բան փոխել` առնվազն սկսել ոչ թե մի քանի օրով վերապատրաստումներ, այլ խորացված ու բազային հիմքից սկսած...Որը կտևի ամիսներ:
Հանաձայն չեմ նաև այն մտքին, որ պարտադիր պիտի անցնել այն ծրագրերը, որոնք ուսուցիչը անցել է բուհում: Բոլորս էլ գիտենք կիրառական ծրագրերը որքան արագ են կատարելագործվում...

Զառա ջան, նախ` մանկավարժական ինստիտուտի Ինֆորմատիկայի բաժինը ավարտածը իրավունք ունի դպրոցում դաս պարապի: Իսկ նրան բուհը չի սովորեցնում???
Հետո` մենք խոսում ենք ապագայում երեխային պետք եկող ծրագրերի և լեզուների մասին, ոչ թե ինչ-որ հոսքում խնդիր լուծելու մասին:
Իսկ որ ինտերնետում դպրոցական կայքերի մի խումբ խոտան կա, որ կարելի է խակել, դա փաստ է:

Զառա
01.02.2011, 12:09
Զառա ջան, նախ` մանկավարժական ինստիտուտի Ինֆորմատիկայի բաժինը ավարտածը իրավունք ունի դպրոցում դաս պարապի: Իսկ նրան բուհը չի սովորեցնում???
Հետո` մենք խոսում ենք ապագայում երեխային պետք եկող ծրագրերի և լեզուների մասին, ոչ թե ինչ-որ հոսքում խնդիր լուծելու մասին:
Իսկ որ ինտերնետում դպրոցական կայքերի մի խումբ խոտան կա, որ կարելի է խակել, դա փաստ է:

Արեգ ջան, դու բուհում բոլոր ծրագրերն անցել ես?, հնարավոր է անցնել բոլոր ծրագրերը?: Կամ իմ օրինակով ասեմ` հիմա դասագրքային ծրագրերից շատերը ես բուհում չեմ անցել, հնարավոր էլ չէր: Դու ինքդ դասախոս ես, և ինձանից լավ կպատկերացնես..... Այսօրվա բոլոր ծրագրերն անցածը մի քանի տարի հետո կպարզվի` բան չգիտի, եթե իր վրա չաշխատի...Ամեն օր նոր ծրագրեր են ստեղծվում ու կատարելագործվում....
Իմ կարծիքով հոսքային դասարանների ընտրությունը հենց նրանում է, որ ճիշտ ընտրվի ծրագրերն ու լեզուները... Վատ կայքերի մասին էլ կասեմ հետևյալը` անգրագետ ու վատ կայքերին թույլ չտան ինտերնետում տեղադրելու... Վերահսկումներ լինեն հատկապես դպրոցական կայքերի վրա....

Chuk
01.02.2011, 15:53
HTML-ը լավ է, որ ընդգրկել են, շատ խնդիրներ կլուծվեն այդ լեզվի գրագիտությունով: Ես համաձայն եմ Արտակ ջան քեզ հետ, որ կան դպրոցական ահավոր վատ, անգրագետ կայքեր:

Ճիշտն ասած իմ գրառման թիրախը դպրոցական կայքերը չէին, թեև դրանց մեջ էլ, բոլորս գիտենք, բազում են վատ պատրաստված, ինչու ոչ, անգրագետ կայքերը:
Բայց թիրախս իսկապես դա չէր: Համացանցի այսպես կոչված հայկական տիրույթում ընդհանրապես շատ են անգրագետ կայքերը, երբ մարդիկ շատ սակավ բան իմանալով որոշում են կայքեր ստեղծել: Մեր թիրախը աշակերտներն են. եթե մենք որոշել ենք դպրոցում աշակերտներին սովորեցնել կայքեր պատրաստելու տեխնոլոգիաներ, ապա գոնե այն մակարդակի պատրաստենք, որ եթե իրենք այդքանը սովորելով կարծեն, թե կարող են կայքեր գրել, գրեն, սարքեն գրագետ կայքեր:

Հիմա կոնկրետ HTML-ի մասին: Ինքս իմ համար չեմ կարողանում պարզել. լա՞վ է, որ պետք է դպրոցում անցնեն, թե՞ ոչ:
Ախր մի կողմից սա էլ խիստ նեղ մասնագիտական բան է: Միջին վիճակագրական աշակերտին բնավ պետք չի HTML իմանալ:
Բայց մյուս կողմից թեգային կառուցվածք, թեգային մտածողություն սովորեցնել, կարծում եմ, որ արժի: Հեռու չգնանք. թեգային կառուցվածքները օգտագործվում են նաև բազում ինտերնետային հարթակներում, թեկուզ այս ֆորումում: Իհարկե այս ֆորումում գրառում անելիս HTML լեզվի հնարավորություններն օգտագործելու ֆունկցիան անջատված է (կարող է նաև միացվել), բայց BB կոդի կիրառումը թույլատրվում է: Իսկ BB կոդը ոչ այլ ինչ է, քան HTML-ի հիման վրա ստեղծված թեգային լեզուն: Իրականում BB կոդի կիրառումը շատ պարզ է, կարելի է արագ յուրացնել, առավել ևս որ այն կիրառվում է բազում հարթակներում: Բայց այ փորձը ցույց է տալիս, որ շատ-շատերը չգիտեն դրա կիրառման ձևը, կանոնները, տրամաբանությունը: Ու այդ իմաստով իհարկե դրական է HTML-ին տեղ հատկացնելը, թեգային լեզվի տրամաբանություն սովորեցնելը:

Բայց հասկանանք, որ HTML սովորելը բավարար չի կայք սարքել իմանալու համար: Այսքան գիտելիքը ինտերնետի ստեղծման սկզբանական ժամանակների մակարդակի կայքեր ստեղծելու հնարավորություն հազիվ է տալիս:

Արեգ
01.02.2011, 21:46
Արտակ ջան, լրիվ համաձայն եմ HTML լեզվի մասին քո դատողությունների հետ: Ես էլ եմ տեգերի մասին հենց այդպես մտածում: Բավականին տրամաբանություն կա դրա մեջ: Թող ծանոթ լինեն երեխաները այդ լեզվին, ոչ ոք չգիտի թե կյանքում ինչը երբ պետք կգա:
Բայց Page Maker-ի հետ չեմ հաշտվում: Այդ ծրագիրը ոչ պիտանի է (իմ կարծիքով):
Օգոստոսյան խորհրդակցություններին տարիներ շարունակ նախարարության ներկայացուցչին ասում էինք, որ 9 և 10 դասարանների սև գույնի դասագրքերը զիբիլ են, ամեն անգամ նա մեզ ասում էր, որ այդ գրքերը պետք են իրենց ինքնարժեքը հանեն, հետո նոր դուրս գան: Ու քանի սերունդ անգրագետ մնաց Ինֆորմատիկայից, էլ չեմ ասում խայտառակ օլիմպիադաները.... Մեզ ով էր լսում, ոչ ոք:
Հիմա էլ նույն է, կտպեն ու վերջ:

Զառա
01.02.2011, 21:56
Հիմա կոնկրետ HTML-ի մասին: Ինքս իմ համար չեմ կարողանում պարզել. լա՞վ է, որ պետք է դպրոցում անցնեն, թե՞ ոչ:
Ախր մի կողմից սա էլ խիստ նեղ մասնագիտական բան է: Միջին վիճակագրական աշակերտին բնավ պետք չի HTML իմանալ:
:
Կարծում եմ բնագիտական հոսքում արժե անցնել: Բավականին շատ ժամանակամիջոց հատկացվի, ու HTML_ով չսահմանափակվի, շարունակի վեբ/դիզայնի ծրագրեր անցնել: Աշակերտի մեջ թեգային մտածողություն զարգացնելուն զուգահեռ` հասցնենք այն մակարդակի, որ նորմալ կայքեր ստեղծելու հնարավորություն ունենան....

Chuk
03.02.2011, 12:53
Բայց Page Maker-ի հետ չեմ հաշտվում: Այդ ծրագիրը ոչ պիտանի է (իմ կարծիքով):

Ես էլ չեմ հաշտվում: Դասագիրքն արդեն որոշ չափով ուսումնասիրել եմ ու դեռ կշարունակեմ ուսումնասիրել՝ աստիճանաբար այստեղ անդրադառնալով որոշ հարցերի: Բայց հիմա ուզում եմ նորից գրել PageMaker անցնելու աննպատակահարմարության մասին՝ որոշակի հիմնավորումներով: Ու իհարկե միայն ուրախ կլինեմ լսել, կարդալ փաստարկված հակառակ հիմնավորումները:

Նախ խոսեմ ոչ թե կոնկրետ Adobe PageMaker ծրագրի, այլ որևէ հրատարակչական ծրագիր անցնելու նպատակահարմարության մասին: Արդյո՞ք պետք է, որ դպրոցում աշակերտին ընդհանուր պատկերացումներ տրվեն ծրագրային մի տիպի մասին, որը միջին վիճակագրական աշակերտին ուղղակի պետք չի գալու: Իմ կարծիքով դա կարելի է անել միայն այն դեպքում, եթե համակարգչային անհրաժեշտ գիտելիքները արդեն տրվել են ու կողքից ծանոթացնում ենք նաև ուրիշ հնարավորությունների:

Ինչու՞ եմ ասում ընդհանուր պատկերացում: Որովհետև հրատարակչական ծրագրերը բավական բարդ ծրագրեր են, սրանցով աշխատելու համար բացի զուտ ծրագրային գիտելիքներից անհրաժեշտ է ունենալ հրատարակչական այլ բազում գիտելիքներ, կանոններ, առանձնահատկություններ: Սա առանձին մասնագիտություն է, խորը, ծավալուն: Դպրոցում այն սովորեցնելը պարզապես անհնար է, հնարավոր է միայն խիստ մակերեսային գիտելիքներ տալ: Ավելին, այս մասնագիտության պահանջարկն այնքան շատ չէ, որ դպրոցներում բոլորին սկսենք պատրաստել դրան: Իհարկե հրաշալի կլինի, եթե ավագ դպրոցներում լինեն առանձին մասնագիտական դասարաններ, որոնցում խորությամբ կսովորեն հրատարակչական արհեստը, բայց բոլոր աշակերտներին սովորեցնելը անիմաստ եմ համարում: Ունենք հաշված քանակով հրատարակչություններ ու խմբագրություններ, որոնցում այս տիպի ծրագրերը կիրառվում են: Աշակերտին այս գիտելիքները պետք չեն գալու նաև հետագայում՝ ռեֆերատներ, թեզ, դիպլոմ, ատենախոսություն ու նման բաներ գրելիս: Օֆիսային ծրագրերը այդ խնդիրը լիարժեք լուծում են: Փաստորեն աշակերտը ստանալու է գիտելիք, որն իրեն ուղղակի պետք չի, առավելագույն դեպքում կարող է ընդամենը որոշակի հետաքրքրություն բավարարել: Բայց անկեղծ ասած չեմ կարծում, որ նման ծրագրերը հետաքրքրեն աշակերտներին:

Մինչդեռ իսկապես կան անհրաժեշտ գիտելիքներ, որոնք աշակերտները չունեն: Խոսքս որոշակի բազային գիտելիքների մասին է: Չգիտեմ, օրինակ տառատեսակների կոդավորումների, Unicode-ի ու ArmSCII-ի տարբերությունների մասին, խորացված չգիտեն թեկուզ նույն MS Word-ից այն ամենը, ինչն իրենց կարող է պետք գալ և այլն:

շարունակելի

Chuk
03.02.2011, 13:27
Հիմա գանք կոնկրետ Adobe PageMaker ծրագրին:
Դասագրքում այն ներկայացվում է, որպես առաջատար ծրագիր: Այդ պնդումը թերևս ճիշտ էր սրանից մոտ 15 տարի առաջ: Բայց հետո հրատարակչական ծրագրերի ոլորտում «հեղափոխություն» եղավ:

Ներկայացնեմ մի քանի տվյալ:

Adobe PageMaker ծրագրի վերջին՝ 7-րդ տարբերակը թողարկվել է 2001 թ.-ի հուլիսի 9-ին: Այսինքն մոտ 10 տարի առաջ:

Մինչև 2004 թ.-ը թողարկվում են ծրագրի մի քանի թարմացումներ, որոնք ոչ թե նորամուծություններ էին պարունակում, այլ ընդամենը սխալների շտկումներ: Իսկ 2004 թ.-ին Adobe կազմակերպությունը պաշտոնապես հայտարարեց, որ դադարեցնում է ծրագրի հետագա զարգացումը, թեև պատրաստի արտադրանքը կշարունակի վաճառել: Ավելին, թեև իրականում դժվարությամբ լինում է ծրագիրն աշխատացնել նոր օպերացիոն համակարգում՝ Windows Vista և Windows 7, սակայն նույն Adobe-ի կազմակերպության հայտարարությամբ այդ ծրագիրը այդ օպերացիոն համակարգերում չի աջակցվում: Սա նշում եմ ցույց տալու համար, որ ծրագիրը գնում է պատմության գիրկը: Բոլորս էլ գիտենք որ շարքային կիրառողների շրջանում արդեն կտրուկ տեմպերով պակասում է Windows XP օգտագործողների քանակը: Մեր հասարակությունում Mac OS օպերացիոն համակարգը էկզոտիկա է, կիրառողները քիչ են, բայց համենայն դեպս նշեմ, որ այս դեպքում էլ կա նույն խնդիրը: Mac OS օպերացիոն համակարգի համար նախատեսված PageMaker ծրագիրը աշխատում է վերջին 9.1 և ավելի հին տարբերակներում:

Այս տասը տարվա մեջ հրատարակչական ծրագրերի աշխարհում բազում նորամուծություններ են եղել, փոփոխություններ: Շատ հարցեր պարզվեցվել են, շատերը ճկունացվել:

Adobe կազմակերպությունը դեռ 1999 թ.-ից թողարկում էր InDesign անունը կրող հրատարակչական ծրագիրը: PageMaker ծրագրի հետագա զարգացումը դադարեցնելու մասին հայտարարելիս Adobe-ը այս ծրագիրը հանրությանը ներկայացրեց որպես PageMaker ծրագրի «էլիտար հետնորդ»:

2001 թ.ից հետո, որն ինչպես վերում նշեցի PageMaker-ի վերջին տարբերակի թողարկման տարին էր, Adobe թողարկել է InDesign ծրագրի 9 տարբերակ, յուրաքանչյուրում մտցնելով նոր հնարավորություններ՝ մրցակցելով իր հիմնական հակառակորդ QuarkXPress ծրագրի հետ: Adobe InDesign ծրագրի վերջին՝ CS5 տարբերակը թողարկվել է ընդամենը անցյալ տարի՝ 2010 թ.-ին:

Նույն կերպ զարգացում է ապրում QuarkXPress հրատարակչական ծրագիրը, որն ըստ որոշ վիճակագրական տվյալների ներկայումս հրատարակչական ոլորտի առաջատար ծրագիրն է, թեև InDesign-ի հետ մրցակցությունը շատ սուր է ու աստիճանաբար շատ հրատարակիչներ անցում են կատարում InDesign-ին: Այս ծրագրի վերջին տարբերակը՝ 8.5, նույնպես 2010 թ.-ին է թողարկվել: 2001-ից մինչև հիմա թողարկվել է 5 հիմնական տարբերակ և մոտ 20 միջանկյալ տարբերակներ: Յուրաքանչյուր տարբերակում եղել են նորամուծություններ:

Այս թարմացումների թիվը նշում եմ հասարակ պատճառով: Դեռ 2001-ին Adobe PageMaker ծրագիրը հրատարակչական ոլորտի ծրագրերի շրջանակում զիջել էր իր դիրքերը, արդեն չէր դիմանում QuarkXPress-ի ու Adobe InDesign-ի մրցակցությունը: Դա դեռ 2001-ին: Իսկ հիմա նորից նայենք, թե այդ ծրագրի մրցակիցները այս ընթացքում ինչ ահռելի ճանապարհ են անցել:

PageMaker-ը լավ ծրագիր էր: Մինչև հիմա կան այն օգտագործողներ: Բայց օգտագործողները որպես կանոն մարդիկ են, ովքեր հին սովորության համաձայն են այն օգտագործում: Ինքս գիտեմ բավական շատ մասնագետների, ովքեր անցում են կատարել PageMaker-ից QuarkXPress-ի կամ Adobe InDesign-ի ու այլևս ետ վերադառնալ չեն ուզում: Ու չեն էլ կարող շարունակել, որովհետև նոր ծրագրերով նույն գործերը կարելի է անել ավելի արագ ու ավելի որակով: Որովհետև նոր ՕՀ-երում այդ ծրագիրն աշխատացնելն արդեն խնդիր է: Որովհետև ծրագիրը նաև բազում այլ խնդիրներ ունի: Ես կարծում եմ, որ շատ չափազանցրած չեմ լինի, եթե ասեմ, որ Հայաստանում այս ծրագիրը պրակտիկայում կիրառողները մնացել են մատների վրա հաշվելի քանակով:


շարունակելի

Chuk
03.02.2011, 13:43
Հաջորդ, ոչ պակաս կարևոր հանգամանքը:
Adobe PageMaker ծրագիրը տարածվում է վճարովի հիմունքներով: Adobe կազմակերպությունը թեև դադարեցրել է ծրագրի զարգացումը, բայց շարունակում է վաճառքը ու այն արժի 499 ԱՄՆ դոլար: Եթե պետական միջոցներով գնվել ու բոլոր դպրոցներին բաժանվել է օրինակ Microsoft Office ծրագրային փաթեթի արտոնագիրը, ապա այս ծրագիրը չի գնվել ու չէր էլ կարող գնվել: Ու ստացվում է, որ թե դպրոցները, թե աշակերտները կանգնում են մի լուրջ խնդրի առջև. ինչպես ձեռք բերել այս ծրագիրը, որպեսզի կարողանան դասավանդել:

Գնելը ռեալ չի: Ավելին՝ անիմաստ է: Ու թերևս մնում է միայն մեկ տարբերակ. քրեք արված՝ անօրինական տարբերակի գտնելն ու կիրառելը: Ու ստիպված հիմա բոլորը պետք է ման գան, գտնեն ծրագիրը, այդ անօրինական տարբերակով ու ինչի՞ համար: Որպեսզի ստանան գիտելիք, որը չե՞ն կիրառելու, ընդամենը հետաքրքրությու՞ն են բավարարելու (լավագույն դեպքում):

Եթե խնդիրը կանգնում է ինչ-որ հրատարակչական ծրագիր անպայման ուսուցանելու վրա (իսկ անձամբ ես կարծում եմ, որ դրա կարիքը չկա), ապա կարծում եմ, որ գոնե պետք էր ընտրել որևէ անվճար տարածվող ծրագիր: Մասնավորապես կա Scribus անվամբ անվճար տարածվող հրատարակչական հրաշալի ծրագիր (http://www.scribus.net/canvas/Scribus), որը թողարկվում է 2003 թ.-ից, իսկ վերջին տարբերակը թողարկվել է 2010 թ.-ին: Աշխատում է Linux, Unix, Mac OS X և Windows օպերացիոն համակարգերում, իր հնարավորություններով չի զիջում առաջատար ծրագրերին:

Ու իսկապես, եթե խոսքը գնում է ընդամենը հրատարակչական ծրագրերի կառուցվածքի մասին ընդհանուր պատկերացում կազմելու մասին (իսկ դասագրքում ավելին չկա էլ, շատ մակերեսային է), ապա այս ծրագիրը իմ կարծիքով միակ ընդունելի տարբերակն է: Թեև ես նորից կարծում եմ, որ ընդհանրապես կարիք չկա դպրոցում հրատարակչկան ծրագիր սովորեցնելու:


Adobe PageMaker ծրագիրն անցնելու նպատակահարմարության մասին այսքանը:

Ֆոտոն
03.02.2011, 14:14
Չուկի հետ լիովին համաձայն եմ: Մի փաստ էլ հավելեմ: Երբ 2002 թվականին աշակերտների փոխանակման Desktob publishing ծրագրի շրջանակում հրատարակչական գիտելիքներ էինք ստանում, QuarkXPress ծրագիրն էինք կիրառում, որով էլ հրատարակեցինք թերթ:

Զառա
03.02.2011, 15:10
Հիմա գանք կոնկրետ Adobe PageMaker ծրագրին:
Դասագրքում այն ներկայացվում է, որպես առաջատար ծրագիր: Այդ պնդումը թերևս ճիշտ էր սրանից մոտ 15 տարի առաջ: Բայց հետո հրատարակչական ծրագրերի ոլորտում «հեղափոխություն» եղավ:


Ես անձամբ օգտագործել եմ QuarkXPress ծրագիրը: Adobe PageMaker ծրագրին տեղյակ չլինելով` կարծիքս չեմ կարողացել հայտնել` մեռած ծրագիր է, վատն է, թե լավը: Վերևի գրառումնեը կարդալով` արդեն ես էլ հարմար եմ գտնում անցնել QuarkXPress ծրագրը: Ու նաև այն կարծիքին եմ, որ անընդհատ պիտի թարմացվեն ու նորացվեն դասագրքերի նյութերը, հին ծրագրերով կանգնած չմնանք, անկախ այն բանից 10-15 տարի առաջ ինչ ենք մենք` ուսուցիչներս ԲՈՒՀ-երում անցել...
Հումանիտար հոսքում կարծում եմ ավելի հարմար է հրատարակչական ծրագրեր անցնել... քան ասենք ծրագրավորոմ ու HTML տեգային լեզու` այն էլ մակերեսային, որից աշակերտն ընդհանրապես գլխի էլ չընկնի ինչի համար է անցնում..(Ով գիտի գլխին ինչ է գալու, հնարավոր է կյանքում պետք կգա???????????)::)

Սրբազան
03.02.2011, 16:15
Ուշացումով միանալով ծավալված քննարկումներին՝ կցանկանայի խոսել այն թերությունների, վրիպակների և սխալների մասին, որոնք նկատել եմ գրքի (ոչ շատ խորը) ուսումնասիրությունից հետո։ Դիտել եմ մինչև 80-րդ էջը և նկատել մեծաքանակ բազմաբնույթ վրիպակներ։ Ահա նրանցից մի քանիսը.

Էջ. 3 Դասագրքում ձեզ հնարավորություն է ընձեռվում ծանոթանալու Adobe
PageMaker -ը հրատարակչական առաջատար համակարգի հետ։

Կանգ չեմ առնում Adobe Pagemaker «առաջատար» ծրագրի վրա, քանի որ արդեն հասկանալի է, որ այս ծրագիրը արդիական չէ և դպրոցում վերջինիս ուսուցանումն, ըստ իս, նպատակահարմար չէ։ Ուղղակի ուշադրություն ենք դարձնում տառասխալին, ժպտում ենք և անցնում առաջ։

Էջ 4 Համակարգչային ցուցադրումների (Prezentation)

էջ. 14 MS PowerPoint ծրագրում անիմացիա են անվանում շարժապատկերը, որը կարելի
է կցել ցուցադրման մեջ առկա տեքստին կամ օբյեկտին:
Կարծում եմ անկախ նրանից թե որտեղ են, անիմացիա և շարժապատկեր տերմինները նույնանիշ են։

էջ. 20 Համակարգչային ցանցի էական գործոններից մեկն էլ ցանցային ընդհանուր
միջոցներից օգտվելու հնարավորությունն է: Նման ընդհանուր օգտագործման
միջոցները կարող են լինել երեք տիպի. ապարատային, ծրագրային և տեղեկատվական:

Այս մի օրինակի վրա ցանկանում եմ նշել ևս մի թերություն. դասագրքում առանց որևէ օրնաչափության և տրամաբնության տերմինների մի մասը հայացված է, մի մասը՝ ոչ։ Նայեք նաև հաջորդ կետը (Սերվեր)։

էջ. 27 Օրինակ. 192.25.26.05 IP-հասցեում 192-ը ցույց է տալիս, որ սերվերը կցված է C
դասի ցանցին: Ընդ որում 192.25.26.05-ը համապատասխան սերվերի հասցեն է, իսկ
0,5-ը` համակարգչի հասցեն:

Ահա այսպիսի խուճուճ–մուճուճ և ոչ ճիշտ ձևակերպումներ դասագրքում բավականին հաճախ են հանդիպում։

էջ. 33 Ներկայումս ամենից տարածված բրաուզերներից են Microsoft Internet Explorer-ն ու Netscape Navigator-ը:

Կարծում եմ, որ այս նախադասությունը սազական կլիներ 10 տարի առաջ։ Ներկայումս կարծում եմ, որ Mozilla Firefox դիտարկիչը շատ ավելի տարածված է, քան Netscape Navigator–ը։

Իսկ հիմա մի քանի նախադասություն առանց մեկնաբանությունների։

Համակարգը հնարավորություն է տալիս on line ռեժիմում փոխանակել ինչպես կարճ հաղորդագրություներ, այնպես էլ այլեր:;)

վրեն գիծ քաշած տեքստ ;)

3 գլուխ ՀՐԱՏԱՐԱԿՉԱԿԱՆ ԾՐԱԳՐԵՐ
3.1. պարագրաֆ Սկաներ ;)

Templates պատուհանի ընձեռած հնարավորություններից հրաժարվելու դեպքում անհրաժեշտ է փակել այդ: :D

Զառա
03.02.2011, 16:28
Մտածում եմ հումանիտար հոսքում հատկապես ինչ ծրագրեր կարելի է անցնել: Եթե խոսքը վերաբերվում է խորացված գիտելիքներին` 1 ժամի համար բավական քիչ է հրատարակչական ծրագրերի, վեբ/դիզայնի, գրաֆիկայի, HTML-ի ... համար: Այդպես որ մտածենք, գուցե մենակ Word ծրագիրն անցնենք, այս ծրագրի բազային հիմքն բավականին ամուր է ` աշակերտներն սկսել են անցնել դեռևս 6-րդ դասարանից...Բայց աշակերտն ինքն էլ է նորություն ուզում: Ուղղակի պիտի հաշվի առնել աշակերտն որ հոսքում է գտնվում, ինչպիսի ուղղվածություն ունի, դրան համապատասխան թեմաներ ընտրեն: Այսպես թե այնպես ոչ մի ծրագրից էլ խորացված գիտելիքներ ստանալ չեն կարող... Չմոռանանք որ խիստ մասնագիտական գիտելիքներ աշակերտն ստանում է համապատասխան ԲՈՒՀ-երում: Չնայած երբեմն ճիշտ հակառակն է լինում, դպրոցն ավարտելուց աշակերտն ավելի շատ գիտելիքներ է ունենում տվյալ առարկայից, քան մասնագիտական ԲՈՒՀ-ն ավարտելուց հետո: Մանկավարժական ինստիտուտում մեր ապագա մանկավարժներն արդյոք ստանում են նորմալ բաժային գիտելիքներ????

Ֆոտոն
03.02.2011, 16:39
Չե՞ք տեղեկացնի, ո՞ր դասարանից են սկսում ինֆորմատիկա անցնել ու մինչև այս գրքին հասնելը ի՞նչ են հասցնում անցնել:
Եթե կա, այդ գրքերի հղումները կարող եք տալ:

Զառա
03.02.2011, 17:25
Չե՞ք տեղեկացնի, ո՞ր դասարանից են սկսում ինֆորմատիկա անցնել ու մինչև այս գրքին հասնելը ի՞նչ են հասցնում անցնել:
Եթե կա, այդ գրքերի հղումները կարող եք տալ:
Չգիտեմ հարցն ինձ է ուղղված? Եթե այո` 6-րդ դասարանից են անցնում: Թվարկեմ բոլոր այն ծրագրերը, որոնք անցնում են 6-9 -րդ դասարաններում:?

Ֆոտոն
04.02.2011, 11:58
Չգիտեմ հարցն ինձ է ուղղված? Եթե այո` 6-րդ դասարանից են անցնում: Թվարկեմ բոլոր այն ծրագրերը, որոնք անցնում են 6-9 -րդ դասարաններում:?

Եթե հնարավոր է, ուղղակի հակիրճ: Շատ շնորհակալ կլինեմ: :)

ԺաննաՀ
04.02.2011, 14:24
Ինֆորմատիկայի գրքի քննարկման հետ կապված` հաճելի է տեղեկություն ստանալ լավատեղյակ մասնագետներից, քանի որ հենց այնպես, առանց ծանոթ լինելու կարծիք հայտնել հնարավոր էլ չի: Տպագրական թերությունները, վրիպակները, սխալները, իրոք, մի քիչ ուշադիր լինելու դեպքում կարելի է հայտնաբերել:

Մյուս կողմից, անկախ այս դասագրքում ներառված նյութից, ծրագրերի լավ կամ վատ լինելու հանգամանքից, ուզում եմ ասել, որ բազային գիտելիքներ պետք է ունենան նաև ուսուցիչները: Նույն ինֆորմատիկայի ուսուցիչներից շատերը չունեն գործնական հմտություններ, չունեն այն տրամաբանությունը, որով կարելի է աշխատել ծրագրերում: Էլ չեմ ասում օտար լեզուներին չտիրապետելու հանգամանքը, որը թույլ չի տալիս ինքնակրթությամբ լրացնել բացը: Դրանից է նաև, որ ամեն օր դասագիրք փոխելու պարագայում էլ երեխաները /թող լինի` միջին վիճակագրական աշակերտը/ դպրոցն ավարտում են MS Word-ից, զանազան տառատեսակներ գործածելուց անտեղյակ:
Իմ կարծիքով, դասագրքերում պետք է ընդգրկվի հնարավորինս պիտանի նյութ, որը և ընդհանուր գիտելիք տա և մեծամասամբ կիրառական լինի:

Մյուս կարևոր հարցը` նորացվող գրքերում ներառված ծրագրերի տրամադրումը: Ինչպե՞ս են պատկերացնում ծրագրերի ուսուցումը առանց ծրագրի առկայության: Օպերատորները պետք է հայթայթե՞ն:

Ruben
04.02.2011, 15:47
Օպերատորները կարող են համապատասխան ծրագրեր հայթայթել, բայց իմ կարծիքով ճիշտ կլինի, որ համապատասխան կազմակերպությունները / երևի ԿՏԱԿ-ը կամ... / դպրոցներին տրամադրեն համապատասխան ծրագրերի խտասկավառակներ... Խոսքը համակարգային կամ գրասենյակային փաթեթների մասին չէ, որոնք տրամադրված են և շարունակվում է նորացումները...

Chuk
04.02.2011, 17:56
Օպերատորները կարող են համապատասխան ծրագրեր հայթայթել, բայց իմ կարծիքով ճիշտ կլինի, որ համապատասխան կազմակերպությունները / երևի ԿՏԱԿ-ը կամ... / դպրոցներին տրամադրեն համապատասխան ծրագրերի խտասկավառակներ... Խոսքը համակարգային կամ գրասենյակային փաթեթների մասին չէ, որոնք տրամադրված են և շարունակվում է նորացումները...

Հարցադրումը ճիշտ է: Բայց տվյալ պահին մեր կազմակերպությունը նման լիազորություն, հանձնարարություն չունի: Կփորձենք ուսումնական ծրագիրը կազմող կազմակերպությունից ճշտել, պարզել, թե ինչպես է այդ գործընթացը կազմակերպվելու ու կտեղեկացնենք:

Զառա
05.02.2011, 14:45
Շատ լավ է, որ մասնագետներն են իրենց կարծիքը հայտնում, առաջարկություններ անում ու թերություններն ասում: Բայց ինչու են ինֆորմատիկայի ուսուցիչները լրում.... Երևի գոհ են, կամ մեկ է` իրենց համար ինչ կանցնեն:
Հետաքրքիր է, ծրագիր կազմողներն ու դասագրքի հեղինակները կարդում են այս ամենը:? Որևէ կարծիք հաշվի կառնվի?: Բոլոր դեպքերում լավ կլինի, ուսուցիչների ձեռնարկների հետ դպրոցներին տրվեն դասագրքում նախատեսված ծրագրերի խտասկավառակները:

Ruben
05.02.2011, 16:31
Խոսքը վերաբերվում է նրան, որ Ձեր կազմակերպությանը պետք է նման լիազորություններ տրվեն...

Chuk
08.02.2011, 18:08
Տեղեկացնում եմ, որ «Հայկական կրթական միջավայր» պորտալում արդեն տեղադրվել է նաև ինֆորմատիկայի՝ բնագիտամաթեմատիկական հոսքի 11-րդ դասարանի դասագիրքը, այն կարող եք բեռնել այստեղից.


Ինֆորմատիկա, 11-րդ դասարան, բնագիտամաթեմատիկական հոսք (http://armedu.am/arm/materials.php?sec=library&id=2260)


Այս դասագրքի քննարկումները ևս կանցկացվեն այս թեմայում:

Զառա
09.02.2011, 16:23
Դասագրքում նախատեսված է 2 ծրագրավորման լեզու` Պասկալ լեզու և C++: Որքան հասկացել եմ` այս երկու լեզուներից մեկն ենք անցնելու` ըստ ուսուցչի ցանկության: Պասկալ լեզուն բավականին պարզ բացատրված է: Թեմաներից հետո էլ բավականին խնդիրներ կան: Ուսուցիչների մեծ մասը կխուսափի C++-ից` չիմանալու պատճառով:
Կիրառական ծրագրերի հարցում և ծրագրավորման հետ կապված բավականին տարբեր մոտեցումներ ունեմ: Եթե բուհում տվյալ կիրառական ծրագիրը չանցնելով ուսուցիչը կկարողանա իր վրա աշխատելով` սովորի ու մատուցի նյութը, հասկանալի է: Բայց ծրագրավորում անցնելու համար ուսուցիչն ինքը պիտի ունենա բազային գիտելիքներ: Ես համոզված եմ` մանկավարժական բուհերից ապագա ուսուցիչը ծրագրավորումից շատ ավելի քիչ գիտելիքներ է ստանում, քան գրված է դասագրքում: Չգիտեմ մանկավարժականի ինֆորմատիկայի բաժնում C++ անցնում են?, կամ եթե այո` ինչ խորությամբ: Այս մասին էլ պիտի մտածել...
Շատ ցանկալի կլիներ ինֆորմատիկայի ուսուցիչների վերապատրաստում լիներ ծրագրավորման թեմայով:

Chuk
09.02.2011, 16:48
Դասագրքում նախատեսված է 2 ծրագրավորման լեզու` Պասկալ լեզու և C++: Որքան հասկացել եմ` այս երկու լեզուներից մեկն ենք անցնելու` ըստ ուսուցչի ցանկության: Պասկալ լեզուն բավականին պարզ բացատրված է: Թեմաներից հետո էլ բավականին խնդիրներ կան: Ուսուցիչների մեծ մասը կխուսափի C++-ից` չիմանալու պատճառով:
Եթե լեզուներից մեկն են անցնելու, ապա սկսում եմ հասկանալ:
Որովհետև երեկվանից ուզում էի հասկանալ, թե ի՞նչ տրամաբանությամբ պետք է սկսեն անցնել Pascal, հետո կեսից անցում կատարեն C++-ին, այդ թվում բավական շատ հասկացություններ նորից քննարկելով: Այնուամենայնիվ կարծում եմ, որ այնքան էլ ճիշտ ձև չէ: Ավելի լավ կլիներ, ըստ իս, կանգ առնել լեզուներից մեկի վրա ու դա շարադրել շատ ավելի մատչելի, հանգամանալից:

Այս մի գիրքն էլ եմ դեռ շատ քիչ կարդացել, բայց առաջին տպավորությամբ բավական բարդ գիրք է: Ոչ թե մատուցվող նյութի պատճառով, այլ մատուցման ձևի պատճառով:

Sash
10.02.2011, 20:28
Ճիշտ է, ես էլ եմ մտածում, որ հումանիտար հոսքում սովորող երեխայի համար, ավելի լավ է ծանոթություն կամ նախնական ինչ-որ մի բան, կամ էլ որևէ ծրագիր, օրինակ Dreamweaver

Համլետ
13.02.2011, 00:20
Ես շատ ուրախ եմ, որ 11-րդ դասարանի դասագրքերում նեռարվել են նաև C++ կամ Pascal ծրագրավորման լեզուներ ու HTML ձևավորման լեզուներ: Ես ինքս հետաքրքրվում եմ վեբ-ծրագրավորումով: Իմ ուժերով ես սովորել եմ HTML, JavaScript, PHP, ու հետաքրքիր չէր լինի կրկին ուսումնասիրել դրանք, չնայած դրանով ես կխորացնեի իմ գիտելիքները:
Ես սովորում եմ ֆիզիկա-մաթեմատիկական հոսքոում, և մյուս տարի պետք է անցնենք ինֆորմատիկա առարկայից С++ կամ Pascal: Դա էլ է ինձ ուրախացնում. վաղուց էի ուզում սովորել այդ լեզուներից մեկը: Ինձ հետաքրքիր կլինի ուսումնասիրել այդ լեզուները: Չէ՞ որ ինֆորմատիկայի առարկայական օլիմպիադաներում խնդիրները լուծվում են հենց այս լեզուներով:

Զառա
13.02.2011, 22:31
Ներկայացնում եմ իմ կայքի `mathnet.am-ի ֆորումում արված գրառումս:


[B]Հ.Գ. Ինչո՞ւ ակտիվ չեն ուսուցիչները այս քննարկումներին:
Դրա համար մի քանի պատճառ կա:
Մի մասի գիտելիքները չեն հերիքում:
Մի մասը անտարբեր է:
Մի մաս էլ կա, որ գիտելիքներ ունի, անտարբեր չէ, բայց իմաստ չի տեսնում, որովհետև հույս չունի, որ իր ասելով ինչ-որ բան կփոխվի: Դասագրքերը արդեն մրցույթով անցած են, և ոչ հեղինակները, ոչ էլ հրատարակիչները առանձնապես իրենց նեղություն տալու կարիք չունեն:

Այնուամենայնիվ, այս թեմայում ավելի շատ մտահոգվում են ոչ ինֆորմատիկայի ուսուցիչներ, այլ մարդիկ ու մասնագետներ` որոնք պարզապես անտարբեր լինել չեն կարող... Շուտով լույս կտեսնեն դասագրքերը, և մեր հարգարժան ուսուցիչներն արդեն կսկսեն քննատասել, մեկնաբանել ու ինչու չէ` հայտարարել, որ իրենք ավելի լավ դասագրքեր կգրեին: Համոզված եմ, ի տարբերություն մյուս առարկաների ուսուցիչների` ինֆորմատիկայի ուսուցիչների մեծ մասը կարդացել են այս բաժնի գրառումները և գիտեն ֆորումի տեղը:

Chuk
14.02.2011, 12:05
Տեղեկացնում եմ, որ մի քանի գրառումներ տեղափոխվել են «2011-2012 ուս. տարվա 12-րդ դասարանի դասագրքերի քննարկում (http://forum.armedu.am/showthread.php/476-2011-2012-%D5%B8%D6%82%D5%BD.-%D5%BF%D5%A1%D6%80%D5%BE%D5%A1-12-%D6%80%D5%A4-%D5%A4%D5%A1%D5%BD%D5%A1%D6%80%D5%A1%D5%B6%D5%AB-%D5%A4%D5%A1%D5%BD%D5%A1%D5%A3%D6%80%D6%84%D5%A5%D6%80%D5%AB-%D6%84%D5%B6%D5%B6%D5%A1%D6%80%D5%AF%D5%B8%D6%82%D5%B4)» թեմա, որովհետև ասելիքն ընդհանուր էր, այլ ոչ թե կոնկրետ ինֆորմատիկայի դասագրքերի ներկայացված տարբերակների մասին: Խնդրում եմ, կոնկրետ դասագրքերին նվիրված թեմաներում խոսել միայն այդ դասագրքերի մասին՝ առարկայական:

gayane0803
15.02.2011, 22:58
Գիրքը չեմ հասցրել ուսումնասիրել: Թերթել եմ մի երկու անգամ, սակայն կհասցնեմ մինչև ապրիլի 30-ը ուսումնասիրել և կարծիք գրել: Ես ել համամիտ եմ Page Maker ծրագրի փոխարեն ավելի ժամանակակից ծրագիր անցնելուն: Ընդհանրապես, համակարգչային ծրագրերը օր-օրի կատարելագործվում են, ստեղծվում են նորերը, գրքերը մինչև տպագրվում են, ծրագրերը հնանում են: Օրինակ, Microsoft Office փաթեթի ծրագրերը` 2003, 2007, բոլորս ունենք: Մի համակարգչում եմ միայն 2007-ը տեղադրել: Դասագրքերը 2003-ով են գրված: 2010-ի մասին էլ չեմ խոսում: Նույնն էլ հրատարակչական ծրագրերը: Գրքերը գոնե նորով գրեն:
Շնորհակալություն:

gayane0803
24.02.2011, 20:32
11-րդ դասարանի <Ինֆորմատիկա> դասագիրքը նախատեսված է ընդհանուր և հումանիտար հոսքերի համար: Սակայն, ըստ <Ինֆորմատիկա> հանրակրթական ավագ դպրոցի չափորոշիչներ և ծրագրեր-ի` ընդհանուր և հումանիտար հոսքերի ծրագրերը տարբեր են: Ընդհանուր հոսքի 11-րդ դասարանում նախատեսված են անցնել հետևյալ թեմաները.
<Մոդելավորում>, <Ծրագրավորում>, <Գրաֆիկական խմբագրեր>, <Տվյալների բազաներ>, <Տեղեկատվության ներկայացում>, իսկ հումանիտար հոսքի 11-րդ դասարանում` <Գրաֆիկական խմբագրեր>, <Մուլթիմեդիա տեխնոլոգիաներ>, <Հրատարակչական ծրագրեր>, <Տեղեկատվության ներկայացում>, <Հաղորդակցական տեխնոլոգիաներ>: <Հրատարակչական ծրագրեր>, <Հաղորդակցական տեխնոլոգիաներ>, <Մուլթիմեդիա տեխնոլոգիաներ> թեմաները նախատեսված են դասավանդել ընդհանուր հոսքի 12-րդ դասարանում:
Հաջորդը`Հումանիտար հոսքի <Գրաֆիկական խմբագրեր> թեմային հատկացված է 4 ժամ` <Կետային և վեկտորային գրաֆիկա, գրաֆիկական խմբագրերի հիմնական գործիքաշար, սկաներ> և այլն: Դասագրքում խոսվում է միայն սկաների մասին, այն էլ, չգիտեմ ինչու, <Հրատարակչական ծրագրեր> թեմայում:
Ամեն դեպքում, շնորհակալություն պպ Ս. Ս. Ավետիսյանին, Ս. Վ. Դանիելյանին մատչելի և գործնական աշխատանքներով լի դասագրքեր գրելու համար:
6-րդ դասարանում ինֆորմատիկան անցնում ենք Լ. Բոսովա հեղինակի դասագրքով, իսկ պպ Ս. Ս. Ավետիսյան, Ս. Վ. Դանիելյան հեղինակների դասագիրքը, որից դպրոցում 3 հատ ունենք և որն ավելի է համապատասխանում ծրագրին, չենք անցնում: Երբեմն օգտագործում ենք գործնական աշխատանքների ժամանակ: Կցանկանայի, որ միջին դպրոցի նոր, բեռնաթափված դասագրքում սա ևս հաշվի առնվի:
Շնորհակալություն

Siran
24.02.2011, 21:01
Ուղջույն իմ գործընկերներին: Ճիշտն ասաց դեռ չեմ ավարտել 11 , 12-րդ դ դասարանի էլ. դասագրքերը
/ էլեկտրոնային տարբերակով ավելի դժվար է/ , բայց համամիտ եմ շատ կարծիքների հետ:
Ինչ վերաբվում է 6-րդ դասարանի դասագրքին Լ. Բոսովա հեղինակի, ապա հույս ունենք, որ հաջորդ սեպտեմբերից էլ չենք ունենա այդ անհաջող դասագիրքը:

MariSona
08.03.2011, 19:19
Ֆորումի հարգելի մասնակիցներ.
Մշտապես հետևում ենք ֆորումում ընթացող քննարկումներին և շատ շնորհակալ ենք թե° գովասանքի և թե° դիտողությունների ու առաջարկների համար. դրանք մեզ, Ինֆորմատիկայի դասագրքի հեղինակներիս` շատ են օգնում: Կատարված դիտողություններն ու առաջարկները հնարավորինս հաշվի կառնենք: Սակայն հաճախ Ձեր դիտողությունների և առաջարկների հետ համաձայն լինելով` հեղինակներով զորու չենք դրանք հաշվի առնելու: Այսպես, օրինակ` 11-րդ դասարանի դասագրքերի քննարկումներում կարծիք է հայտնվել PageMaker-ի հնացած լինելու վերաբերյալ: Համաձայն ենք, կարելի էր հրատարակչական ժամանակակից որևէ այլ համակարգ ուսումնասիրել, սակայն ՀՀ ԿԳ նախարարի կողմից 2009 թվականին հաստատված ծրագրում ուղղակի շեշտված է PageMaker-ը, որը հեղինակներին զրկել է ընտրելու հնարավորությունից: Այդ նույն ծրագրով պլանավորված է ուսումնասիրել HTML լեզուն. այստեղ ևս քննարկումներն ուշացած են:
Ընդհանրապես` ծրագրային բովանդակության առումով գրքի հեղինակները ինքնուրույն վճիռ չեն կարող կայացնել. նրանք պատասխանատու են միայն հաստատված ծրագրի շրջանակներում գրվելիք գրքի որակի համար:
Բնագիտամաթեմատիկական հոսքի համար հաստատված ծրագրում չնայած երկու`Pascal և C++ լեզուներ են ընդգրկված, սակայն դպրոցի ընտրությամբ յուրաքանչյուր կոնկրետ դեպքում ուսումնասիրվելու է դրանցից որևէ մեկը:

Հարգանքներով`
Ինֆորմատիկայի դասագրքերի հեղինակներ Ս.Ավետիսյան, Ս. Դանիելյան

gayane0803
09.03.2011, 18:00
Հարգելի Ս.Ավետիսյան, Ս. Դանիելյան կցանկանայի իմանալ (եթե գաղտնիք չէ), դուք եք լինելու միջին դպրոցի ինֆորմատիկայի նոր դասագրքերի հեղինակները?
Շնորհակալություն

Chuk
09.03.2011, 18:49
Հարգելի հեղինակներ,
ուրախ եմ Ձեզ ողջունել «Հայկական կրթական միջավայր» ֆորումում: Կարծում եմ, որ սա մի նոր ու լավ մշակույթի սկիզբ կարող է լինել, երբ դասագրքերի հեղինակները մինչ գրքի հրատարակումը կարողանում են լսել կարծիքներ, մտնել քննարկման մեջ, արդյունքում դասագիրքը շահի իր որակական կողմով: Հուսով եմ, որ հասարակություն-հեղինակ այս ոչ պաշտոնական համագործակցությունը արդյունվետ կլինի:

Ձեր մեկնաբանությունը իմ մոտ մի քանի հարց առաջացրեց, որոնք ուզում եմ բարձրաձայնեմ:
Այսպես, դուք ասում եք, որ «ՀՀ ԿԳ նախարարի կողմից 2009 թվականին հաստատված ծրագրում ուղղակի շեշտված է PageMaker-ը, որը հեղինակներին զրկել է ընտրելու հնարավորությունից»: Ես լրիվ հասկանում եմ սա, նոր ուսումնասիրում էի այդ չափորոշիչները: Պետք է խոստովանեմ, որ այդ չափորոշիչներն իմ համար խիստ տարօրինակ էին, իմ կարծիքով դրանք ամբողջովին շեղված են «ինֆորմատիկա» հասկացությունից, բավական բարդ ու ծավալուն են, դրանցում «հանձնարարված» է ուսումնասիրել մի շարք ծրագրեր, որոնք այս կամ այն պատճառով ինքս նպատակահարմար չեմ համարում: Բայց ինչպես ասացիք, դրանք արդեն հաստատված են: Ես թերևս ֆորումում կառաջարկեմ դրանց մասին առանձին քննարկում ծավալել, որովհետև ըստ իս շատ լուրջ խնդիր է:

Այժմ դրանց հավատարիմ մնալու խնդրին անդրադառնանք:

Չափորոշիչներում սահմանված է, որ տեքստային խմբագրերի ուսումնասիրությանը հատկացվելու է 8 ժամ՝ ընդհանուր 34 ժամից: Այսինքն ընդհանուր դասընթացի մոտավորապես 23%-ը: Մինչդեռ դասագրքում այդ նյութը (ավելի ճիշտ՝ հրատարակչական ծրագրեր բաժինը, որովհետև տեքստային խմբագրերն իր մեջ այլ պահանջներ էլ է ներառում) զբաղեցնում է գրեթե կեսը (64 էջ՝ 139-ից, ~46%):

Մի փոքր առաջ գնամ:
Մեջբերում եմ չափորոշիչներից այս նյութին առնչվող հատվածները.


Բովանդակային միջուկ
6. Տեղեկատվական տեխնոլոգիաներ
6.2 Տեքստային խմբագրեր: Տեքստերի ձևավորում և խմբագրում: Համակարգչային բառարաններ և թարգմանիչներ: Սկաներ: Հրատարակչակն ծրագրեր: (էջ 67)
----
Աշակերտին ներկայացվող պահանջներ


Ա մակարդակ.
Կարողանա ստեղծել և խմբագրել տարբեր տեսակի տեքստային փաստաթղթեր (doc, txt, dat, dot ընդլայնումներով), օգտվելո տարբեր տեքստային խմբագրերից: Կարողանա ընտրել լեզուն և տառատեսակը, փոխել լեզվի կոդավորումը (Unicode, ANSI): Կարողանա փոխել առանձին տառերի տեղաբաշխումը ստեղնաշարի վրա: Կարողանա տեքստում ավելացնել և ջնջել պարագրաֆի նիշերը: Գիտենա, թե տեքստի որ մասին են վերաբերվում ձևավորման տարբեր տարրերը: Կարողանա օգտվել ուղղագրական և քերականական սխալների ստուգման և ուղղման հնարավորություններից (Spelling, Grammer, AutoCorrect, AutoText): Կարողանա օգտվել համակարգչային բառարաններից և թարգմանիչներից: Կարողանա տպագրել փաստաթուղթը:

Բ մակարդակ.
Կարողանա խմբագրել տեքստը, օգտվելով ֆորմատավորման հնարավորություններից: Կարողանա ֆորմատավորման համար ընտրել պարագրաֆի հատկությունները՝ աջ, ձախ, ինդենտորներ, առաջին տողի ինդենտոր, տողամիջյան հեռավորություն, հեռավորություն պարագրաֆների միջև: Կարողանա համարակալել պարագրաֆները, օգտագործելով տարբեր նիշեր: Կարողանա տեքստային փաստաթղթի մեջ ներմուծել պատկերներ, աղյուսակներ, գրաֆիկներ: Կարողանա սկաներով տեքստը ներմուծել համակարգչի մեջ: Գաղափար ունենա հրատարակչական ծրագրերի մասին: Կարողանա օգտվել օգնության համակարգից:

Գ մակարդակ.
Կարողանա ֆորմատավորման համար օգտագործել աջ, ձախ կենտրոնացված տաբուլյատորները: Կարողանա կիրառել պարագրաֆը շրջանակի մեջ ներառելու, ֆոնը փոխելու հատկությունները: Կարողանա օգտվել պատրաստի ոճերից և կառուցել ֆորմատավորման նոր ոճեր: Կարողանա տեքստում օգտագործել մի քանի լեզուներ: Կարողանա տպել փաստաթուղթը գրքային կամ ալբոմային տեսքով: Կարողանա կիրառել ավտոմատ էջակալումը փաստաթղթում: Կարողանա էջախորագրերում ավելացնել ամսաթիվը: Կարողանա սկաներով ներմուծված տեքստային փաստաթուղթը վերափոխել տեքստի և խմբագրել այն: Կարողանա օգտվել հրատարակչական ծրագրերից թերթ կազմելու համար:

Ահա այս ամենը ուսումնասիրելու համար հատկացվում է 8 ժամ:
Կարծում եմ դժվար չէ նկատել, որ այստեղ խոսքը գնում է հիմնականում Microsoft Word տիպի ծրագրի՝ այլ ոչ թե հրատարակչական ծրագրի մասին:

Ա մակարդակում հրատարակչական ծրագրի իմացություն ընդհանրապես չի պահանջվում:

Բ մակարդակում պահանջվում է, նորից մեջբերում եմ, «Գաղափար ունենա հրատարակչական ծրագրերի մասին»: Ընդամենը գաղափար ունենալ:

Գ մակարդակում նոր միայն պահանջվում է «Կարողանա օգտվել հրատարակչական ծրագրերից թերթ կազմելու համար»: Իրականում ես համարում եմ որ 60-70 էջում և 8 ժամում հնարավոր չէ PageMaker-ի այնքան գիտելիք տալ, որ աշակերտը կարողանա թերթ կազմել, շատ-շատ թերթի տնազ, անճոռնի, բոլոր կանոնները խախտող մի բան սարքի:

Ու ուզում եմ հասկանալ, թե ինչքանո՞վ է իմաստավորված գրքում այդքան տեղ հատկացնելը PageMaker-ին, եթե, ըստ էության, ոչ մեկը չի էլ սովորելու:

Ես հասկանում եմ, որ չափորոշիչները պարտադրում են այդ մասին գրել: Բայց նույն չափորոշիչները պահանջում են` Ա մակարդակում, «փոխել լեզվի կոդավորումը (Unicode, ANSI)», օրինակ, մինչդեռ կարծես թե դասագրքում այդ մասին խոսք չկա: Չափորոշիչները պահանջում են նաև «Կարողանա սկաներով ներմուծված տեքստային փաստաթուղթը վերափոխել տեքստի և խմբագրել այն», էլի Գ մակարդակ, բայց դրա մասին էլ կարծես թե ոչինչ չկա:

MariSona
09.03.2011, 22:30
Հարգելի Գայանե0803-ի հարցին պատասխանելով ասենք, որ մենք, ամենայն հավանականությամբ, մասնակցելու ենք միջին դպրոցի ինֆորմատիկայի դասագրքերի հրատարակման համար հայտարարված մրցույթին: Հաղթելու դեպքում կաշխատենք հնարավորինս(ծրագրի շրջանակներում) հաշվի առնել ֆորումի մասնակիցների կողմից արված լավագույն առաջարկները:
Ի դեպ` քանի որ ժամանակի սղության պատճառով քննարկմանը ներկայացված են դասագրքերի նախնական, դեռևս չմշակված տարբերակները, ապա դրանք վրիպակներ, որոշ դեպքերում նույնիսկ ոչ կոռեկտ ձևակերպումներ են ընդգրկում. դրա հետ կապված` հայցելով քննարկման մասնակիցների ներողամտությունը` շնորհակալ կլինենք նման թերություններին առընչվող ցանկացած նշումների համար:

Հարգանքներով` Ս.Ավետիսյան, Ս. Դանիելյան

gayane0803
09.03.2011, 23:45
Անչափ ուրախ կլինեմ, որ ձեր հեղինակած գրքերը հաղթեն մրցույթում, որովհետև դրանք շատ մատչելի են և գործնականներով հագեցած: Մեկ էլ կխնդրեի, որ առարկայական ծրագրից դուրս թեմաներ չընդգրկվեն, ինչպես Բոսովայի 6-րդ դասարանի դասագրքում:
Շնորհակալություն

MariSona
10.03.2011, 20:41
Հարգելի Chuk
Հարգելի Chuk, մեզ հասկանալի չէ Ձեր հետևյալ պնդումը. Ահա այս ամենը ուսումնասիրելու համար հատկացվում է 8 ժամ: Կարծում եմ դժվար չէ նկատել, որ այստեղ խոսքը գնում է հիմնականում Microsoft Word տիպի ծրագրի՝ այլ ոչ թե հրատարակչական ծրագրի մասին:
Նախ` հասկանալի չէ, թե որ 8 ժամի մասին է խոսքը և ինչու միայն Microsoft Word:
Բովանդակային միջուկի 6.2 բաժնում ներառված են հետևյալ թեմաները.
Տեքստային խմբագրեր: Տեքստերի ձևավորում և խմբագրում: Համակարգչային բառարաններ և թարգմանիչներ: Սկաներ: Հրատարակչական ծրագրեր: (էջ 67)
Այդ բաժնում ներառված թեմաների համար ուսումնական ծրագրում նախատեսված են հետևյալ ժամաքանակները.
ՏԵՔՍՏԱՅԻՆ ԽՄԲԱԳՐԵՐ - 8 ժամ - էջ 89, ՀՐԱՏԱՐԱԿՉԱԿԱՆ ԾՐԱԳՐԵՐ – 8 ժամ – էջ 99: Սկաներներ թեման ներառված է ԳՐԱՖԻԿԱԿԱՆ ԽՄԲԱԳՐԵՐ բաժնում – ընդհանուրը 4 ժամ – էջ 96, իսկ Համակարգչային բառարաններ և թարգմանիչներ թեման` ՀԱՄԱԿԱՐԳՉԱՅԻՆ ԳՐԱԳԻՏՈՒԹՅՈՒՆ բաժնում - ընդհանուրը 4 ժամ – էջ 87:
Ընդ որում նշված թեմաները ընդգրկված են ավագ դպրոցի տարբեր դասարանների համար նախատեսված ծրագրերում: Այնպես, որ դրանք պետք չէ որոնել միայն 11-րդ դասարանի դասագրքում:
Համաձայն ենք, որ հրատակաչական ծրագրերին վերաբերող բաժինը առաջարկվող դասագրքում ծավալուն է ստացվել: Նախատեսում ենք գրաֆիկական խմբագրիչներին առնչվող բաժին ստեղծել` ուր “Հրարակչական ծրագրեր”-ից կտեղափոխվեն սկաներներին և գրաֆիկական ֆայլի ձևաչափի ընտրությանն առընչվող պարագրաֆները: Քանի որ ստեղծվելիք բաժնի համար այս ընթացքում ևս երկու պարագրաֆ ենք նախապատրաստել, ապա անհրաժեշտ կլինի “Հրարակչական ծրագրեր”-ը երկու պարագրաֆով պակասեցնել և այսպիսով հարմարեցնել ծրագրի պահանջներին:
Շնորհակալ ենք Ձեր դիտողությունների և հայտնաբերած վրիպակների համար:
Համաձայն ենք, որ որոշ հարցերի վերաբերյալ արժե առանձին քննարկումներ ծավալել:

Հարգանքներով Ս.Ավետիսյան, Ս.Դանիելյան

Զառա
12.03.2011, 12:01
Քանի որ այս բաժնում 6-րդ դասարանի դասագրքի մասին էլ խոսվեց, ես էլ կփորձեմ ներկայացնել իմ կարծիքը: Անընդհատ խոսվում է 6-րդ դասարանի անհաջող դասագրքի(հեղինակ Բոսովա)մասին: Ընդունում եմ , որ բավականին բարդ են գրված ու ներկայացված թեմաները: Երբեմն ստիպված ենք լինում անցումներ կատարել մի գլխից մյուսը, որը 6-րդ դասարանցուն դժվարություն է առաջացնում:Ս. Ավետիսյան, Ս. Դանիելյան հեղինակների դասագիրքը ավելի մատճելի ու հասկանալի է, որից օգտվում ենք գործնականների ժամանակ: Շատ հետաքրքիր է նաև ամեն դասից հետո <<Օգտակար է իմանալ>> բաժինը:
Բայց Բոսովայի դասագիրքն ամբողջովին թերի կամ անհաջող չեմ ընդունում: Այս դասագրքի առաջին գլուխը (Տեղեկույթը մեր շրջապատում) բավականին լավ է ներկայացված( իհարկե բառերի հետևից չեմ ընկնում և չեմ ուզում ամեն տեղ թերություն գտնել): Ահա այս բաժնում է, որ ներկայացված են բավականին տրամաբանակն խնդիրներ (վատ չեն նաև էջ 125-126 էջերի առաջադրանքները),
ինչը հիմք է հանդիսանում աշակերտների մոտ նոր տեսակի` ալգորիթմական մտածողության ձևավորմանը: Չմոռանանք որ մեր առարկայի անվանումը ոչ թե <<Քոմփյութեր>> է, այլ` <<Ինֆորմատիկա>>: Այս տարիքի աշակերտները մեծ հետաքրքրությամբ կատարում են տրամաբանություն պահանջող առաջադրանքները, պահանջում ավելին ու ինքնուրույն մշակում ու առաջադրում նոր խնդիրներ:
Իսկ դասագրքի վերջում որպես հավելված բոլորովին չի խանգարում ծրագրից դուրս որոշ թեմաների ընդգրկված լինելը: Ավելին, լավ կլիներ վերջում ունենալ խնդիրների և գործնական աշխատանքների շտեմարան: